Taulimaina o le Tala Lelei ma se Uiga Mautinoa
1 O i tatou uma lava e mananao ina ia maua le olioli ma le loto malie i mea tatou te faia, ae maise lava i le galuega o le faia o soo. O le ā ua na aumaia ia i tatou lena loto malie? E amata mai i lo tatou mauaina o se uiga mautinoa faalemafaufau a o tatou pisi pea i le galuega e sili ona aogā o le fesoasoani atu lea i isi. (Faata. 11:25) O la tatou auala e taulima atu ai le tala lelei e ao ona faailoa atu ai o loo tatou talitonu moni i mea o tatou tautala atu ai. Afai tatou te tāutala mai mea o loo i o tatou loto, o le a mafai ai ona atagia atu o tatou loto faamaoni ma mea o tatou talitonu totino i ai. (Luka 6:45) O le faataitai muamua o a tatou taulimaga, o le a sili atu ai ona tatou lagona le mautinoa pe a talanoa atu i tagata o le oganuu. O le a aogā faapitoa lenei mea ia Setema pe a tatou ofoina le tusi o le Faia o Lou Olaga Faaleaiga ia Fiafia. E mafai ona aogā nai fautuaga nei ia te oe i le taulimaina atu o le tala lelei ma se uiga mautinoa.
2 Pe a ofoina le tusi “Olaga Faaleaiga,” e mafai ona e faapea atu i lau uluai asiasiga:
◼ “I lenei lalolagi faigata, pe e talafeagai ea ona tatou talitonu faapea, e mafai ona tatou maua se olaga faaleaiga fiafia? O le ā sou manatu? [Faatali mo se tali.] E ui lava ina toaaga le toatele o tagata i lotu, ae masani lava ona iai pea faafitauli i o latou aiga. Mātau le fetalaiga a Iesu iinei i le Tusi Paia. [Faitau le Ioane 13:17.] Pe e te lē ioe ea faapea e tele atu isi mea e manaomia mai ia i tatou nai lo le tau ina ō i le lotu? Mātau le mea ua fai mai ai lenei tusi.” Faitau le palakalafa e 3 i le itulau e 11 o le tusi Olaga Faaleaiga ma talanoa i le ata i le itulau e 12 faatasi ai ma le Mataio 7:24-27. Ofo i ai e ave ma le tagata le tusi pe a ioe mai na te faitauina. Afai o le a ia faia faapea, tuu i ai, ma faamatala i ai lo tatou fiafia e taliaina foai tauofo mo la tatou galuega i le lalolagi aoao.
3 A faia se toe asiga i se tane faaipoipo sa e tuua i ai le tusi “Faia o Lou Olaga Faaleaiga ia Fiafia,” atonu e te faapea atu:
◼ “I laʻu asiasiga talu ai, sa ta talanoaina le auala e mafai ai e le Tusi Paia ona fesoasoani i le mauaina o se olaga faaleaiga fiafia. E te manatu o ai e ao ona avea ma ulu o le aiga? [Faatali mo se tali.] O loo faaalia mai e le Tusi Paia le tatau i le tane ona avea ma ulu o le aiga. Ae e ao faapefea ona faatinoina lona tulaga ulu? Mātau le mea o taʻua i le Efeso 5:25-29, 33. [Faitau.] O loo tusia se faamatalaga e faatatau i lenei mau i le tusi Faia o Lou Olaga Faaleaiga ia Fiafia.” Suʻe i le itulau e 41 ma faitau nisi o manatu autū mai i palakalafa e 6-8. Afai e faaalia atili le naunau, atonu e te faapea atu: “E manao le tane e faaaloalogia o ia e pei lava ona sa iai ia Iesu. Ae faapefea ona ia maua lea faaaloalo mai i isi? Mātau le auala o taliina ai lenei fesili i le tusi.” Faitau le afa mulimuli o le palakalafa 2 i le itulau e 40, ona ofo lea i ai o se suesuega faale-Tusi Paia. Afai e talia, amata le suesuega i le tusi o Le Poto.
4 Afai o le tagata e lei faaipoipo, atonu o le a uigā lenei faafeiloaiga mo le amataina o lau talanoaga:
◼ “Ua fesiligia e le toatele o tagata le fesili, o le ā se faavae lelei mo faaipoipoga? Mātau le manatu ua fai mai ai le Faataoto e 31:30 e faatatau i le filifiliga o se avā lelei. [Faitau ma faatali mo se tali.] E ui lava o le toatele o talavou ua tosina i foliga mai i fafo, ae mātau le manatu o taʻua i le tusi Faia o Lou Olaga Faaleaiga ia Fiafia e uiga i lenei tulaga. [Faitau palakalafa e 33 ma le 34 i le itulau e 23.] Pe e te manatu faapea e tāua lenei fautuaga?” Tataʻi atu i isi tamai ulutala i le mataupu e 2 o le tusi Olaga Faaleaiga, ma faasino atu nisi manatu tāua mo le faataatiaina o se faavae lelei mo se faaipoipoga. Ofo i ai le tusi, ma taʻua la tatou fuafuaga mo foai tauofo.
5 I le toe asia o lena tagata, atonu e te taʻua lenei faafeiloaiga:
◼ “I nai aso ua tuanai atu sa ou iai iinei, sa ta talanoa ai i le tāua o le fesoasoani a le Tusi Paia ia i tatou i le mauaina o se faavae lelei mo faaipoipoga, ma sa ou tuua ai ia te oe le kopi o le tusi Faia o Lou Olaga Faaleaiga ia Fiafia. O le ā e te manatu e tatau ona faia e sui taitasi o le aiga ina ia fesoasoani i le aiga e galulue faatasi? [Faatali mo se tali.] Mātau le faamatalaga lenei i le itulau e 185 o le tusi.” Faitau uluai fuaiupu e fa o le palakalafa e 10 i le itulau e 185. Ofo i ai le faataitaiina o le auala o loo fesoasoani ai i le faitau miliona o tagata i le lalolagi atoa e suesueina le Tusi Paia. A faataga mai oe, faaali i ai le tusi o Le Poto ma amata se suesuega.
6 Pe a galue mai lea faleoloa i lea faleoloa, atonu e te faaaogā le faatomuaga puupuu lenei i le tusi “Olaga Faaleaiga”:
◼ “O loo matou avatua i le asō se tautua faapitoa mo tagata faipisinisi o lenei vaipanoa. O loo tatou manatu mamafa uma lava i le auala e toleniina ai ma le uigā a tatou fanau. E te lagona e mafai ona faia o lenei tulaga, pe a tagai atu i le tele o aafiaga lē mautinoa o fanau i aso nei? [Faatali mo se tali.] E ui ina faamamafa e tagata le tāua o aʻoaʻoga, ae ua lē amanaia pea taʻitaʻiga faaleagaga o le fanau. Mātau mea na faatonuina e le Atua ona tagata ina ia faia i le Teuteronome 6:6, 7.” Faitau le mau mai i le palakalafa e 13 i le itulau e 120 o le tusi Olaga Faaleaiga. Faaali i ai le ulutala o le mataupu e 9, ma ofo i ai le tusi. Faamatala i ai e faapea e ui ina leai se totogi mo le lomiga, ae tatou te talia sina foai tauofo mo la tatou galuega i le lalolagi aoao.
7 A faia se toe asiga i tagata faipisinisi sa e tuua ai le tusi “Olaga Faaleaiga,” atonu e te faapea atu:
◼ “I laʻu asiasiga talu ai, sa ou taʻua ai le tāua o faatonuga faaleagaga i le toleniina o fanau. Peitai o loo tau mānatu le toatele o tagata po o aogā pea faatonuga a le Tusi Paia mo le toleniina o fanau. O le ā sou manatu, o le ā le matua e oo i ai le tamaitiiti ona faatoʻā amata toleniina lea e mātua? [Faatali mo se tali.] Ona suʻe lea i le itulau e 115 ma faitau le ulutala ma le fuaiupu muamua o le palakalafa e 5. Ofo i ai se suesuega faale-Tusi Paia e aunoa ma se totogi, e faafoeina a lē i le fale faigaluega po o lo latou aiga.
8 O le avea ma ‘au faigaluega a le Atua,’ ua ia i tatou mafuaaga tatau uma e mautinoa ai i le taulimaina o le tala lelei. (1 Kori. 3:9) O le tatou faatumauina o lenei uiga o le a iu ai i le faamanuiaga faatamaoaigaina a Ieova.