Ia Faalautele Atu se Valaaulia ia i Latou Uma o Galala
1 E pei ona sa valoia e le perofeta o Amosa, ua pagatia le aiga faaletagata i aso nei ‘e lē o se gālala i le fia inu vai, a o le oge i le faalogologo i afioga a Ieova.’ (Amo. 8:11) Ina ia fesoasoani i tagata i lenei tulaga o le oge faaleagaga, e tatou te taʻu atu ai ia te i latou e uiga i sauniuniga ua faia e le Atua mo le toe faafoisiaina mai o le fanau a tagata usiusitai mai le agasala ma le oti, na o loo faaatagia mai i le mataupu mulimuli o le Faaaliga e faapea o “le vaitafe . . . o le vai o le ola.” Ua tatou maua le faaeaga o le faalautele atu lea o le valaaulia ia i latou uma o loo galala mo le amiotonu ina ia “ave fua ia le vai o le ola.” (Faaa. 22:1, 17) E mafai faapefea ona tatou faia lenei mea ia Fepuari? E ala i le ofoina atu lea ia i latou o ē fiafia moni le tusi, Faaaliga—Ua Latalata Lona Tumutumuga Matagofie! Atonu e te manao e faataitai nei taulimaga:
2 Talu ai e toatele tagata o loo manatu mamafa i mataupu tau i le soifua maloloina, atonu o le a e iloa le aogā o lenei faafeiloaiga:
◼ “E toatele tagata o loo popole e uiga i le siitai o le tau o le tausia lelei o le soifua maloloina. Atonu sa e mafaufau i lenei mataupu. [Faatali mo se tali.] Pe e iai se vaifofo tumau mo lenei faafitauli? [Faatali mo se tali.] O se faamoemoe matuā matagofie lenei.” Faitau le Faaaliga 22:1, 2. Ona suʻe lea o le tusi, Tumutumuga o le Faaaliga i le ata i le itulau e 308-309, ma faaaogā le palakalafa 22 i le itulau 311 e faamalamalama ai. Ona faaiu lea i lou faapea atu: “I lenei lomiga, o loo talanoaina ai fuaiupu taitasi o le Faaaliga.” Afai e faaalia e lē ona le fale le fiafia moni, ofo i ai le tusi, tuu atu ia te ia se avanoa e fai ai sana meaalofa tauofo mo le galuega i le lalolagi aoao. Fai ni fuafuaga e toe asiasi atu.
3 Pe a toe foi atu e faia le toe asiga, e mafai ona e toe faaauauina le lua talanoaga i lou faapea atu:
◼ “I le taimi talu ai lea na ou iai iinei, sa ta talanoa ai e uiga i se vaifofo tumau i faafitauli o le soifua maloloina. Pe e te manatu o le a iai se taimi o le a lē toe maʻi ai lava se tasi? [Faatali mo se tali.] Seʻi mātau mai lenei faamatalaga e faateia ai.” Faitau le Isaia 33:24. Ona suʻe lea i le lesona e 5 i le polosiua o le Manaomia, ma talanoa i le palakalafa e 5-6 i le fai atu o fesili e fesootai i na palakalafa o loo i le amataga o le lesona ma faitau nisi o mau o loo taʻua ai. Ia taʻu i ai e faapea, o le aveesea o maʻi ma le oti, o se vaega lea o le faataunuuga o le uluai fuafuaga a le Atua mo le lalolagi. Ia fuafua e toe foi atu e talanoaina le palakalafa 1-4 ma le 7 i le lesona lava lena.
4 Pe afai o iai ni tala fou o aafia ai se maliu faafuasei o loo mafaufau pea i ai tagata, e mafai ona e faataitaia lenei faafeiloaiga:
◼ “Atonu ua e faafofoga e uiga [taʻua mea na iloa mai i tala fou]. Pe a faapuupuuina soifua ona o ni mala matautia, e toatele lava e tau mānatu po o le ā se faamafanafanaga e mafai ona fai atu i aiga o ē na aafia ai. O le ā sou manatu?” Faatali mo se tali. Ona suʻe lea i le itulau e 299 o le Tumutumuga o le Faaaliga, ma faaali i ai le ata o le toetu lena o loo faaali mai ai. Ia faaauau i lou faapea atu: “E toatele ua maofa i le iloa e faapea, o le a toe faafoisia uma mai i le ola i le lalolagi Parataiso tagata amiotonu ma tagata amioletonu. [Faitau le Galuega 24:15 e pei ona sii mai ai i le palakalafa 9 i le itulau 297, ona faamalamalama lea i ai o le faamatalaga o loo maua i le palakalafa 10.] O lenei tusi o loo talanoaina ai le tele o isi faamatalaga auiliili faaoso fiafia e uiga i le fuafuaga a le Atua mo le lumanai. Afai e te fia iloa atili e uiga i lenei fuafuaga, e mafai ona tuu ma oe lenei tusi.” Fai ni fuafuaga e toe foi atu, ma ia mātau mea patino e fiafia i ai le tagata, faapea foi ma ona popolega.
5 Pe a e toe asiasi atu, ia faafetaui atu lau taulimaga i lē e ona le fale. Atonu e mafai ona e faapea atu:
◼ “I la ta talanoaga talu ai, sa ou fiafia lava i lou manatu na faaalia e uiga i le fuafuaga a le Atua mo le lalolagi. [Toe taʻu atu le manatu.] Sa ou sueina nisi o manatu ou te iloa o le a e fiafia i ai.” Suʻe le polosiua o le Manaomia i le lesona 5. Faitau ma talanoa i le po o le ā lava le tele o palakalafa e mafai ona talanoa i ai i le lesona lea e foliga mai o loo fiafia i ai lē e ona le fale. Pe a uma ona faataatia se taimi e toe foi atu ai e faaauau le talanoaina o le lesona, ia tuu atu i lē e ona le fale se pepa valaau o loo otooto atu ai taimi o sauniga a le faapotopotoga. Faamatala i ai e uiga i le Lauga Lautele, ma valaaulia o ia ina ia auai.
6 Afai e te filifili e fai se taulimaga faigofie e faatomua ai se sāvali, e mafai ona e faapea atu:
◼ “Ou te manao e tuuina atu ia te oe lenei sāvali ua faaigoaina, O le ā le Faamoemoe mo Ē Pele ua Maliliu?” Tuu le sāvali i lē ona le fale, ma valaaulia o ia ina ia mulimuli ai a o e faitauina le palakalafa muamua. Tuu atu se avanoa e tali mai ai o ia i le fesili o loo lāgā i le fuaiupu mulimuli. Faitau le palakalafa lona lua, ona suʻe loa lea i le ata i le itulau e 299 o le tusi, Tumutumuga o le Faaaliga. Ia faaauau le talanoaga i lou faapea atu: “O lenei tusi o loo aumaia ai le tele o faamatalaga auiliili e uiga i le toetu ma le tele o folafolaga matagofie a le Tusi Paia mo le lumanai. Afai o le a e faitauina le tusi, e mafai ona tuu le kopi lea ma oe.” Faailoa i lē ona le fale le avanoa e faia ai sana meaalofa tauofo i le galuega i le lalolagi aoao, ma fuafua mo se toe asiga.
7 O lo tatou faalauteleina atu o se valaaulia faatosina loto i isi, atonu o le a faapogaia ai i latou e ō mai i le vai o le ola, lea ua faaavanoa mai e Ieova i le taimi nei. O lea la, seʻi o tatou fai atu i ē uma o galala, ‘Inā ō mai ia!’—Faaa. 22:17.