‘Ia Faaauupegaina Atoatoa mo Galuega Lelei Uma Lava’

¹ Ua faamanuiaina tagata o Ieova i aso nei i le anoanoai o meaʻai susua faaleagaga. (Isa. 25:6) O loo tele lava mataupu faale-Tusi Paia e olioli ai e ala i suesuega totino ma suesuega faaleaiga, ma i sauniga a le faapotopotoga, fonotaga, ma tauaofiaga. Ae po o tatou faaaogaina atoatoa ea nei meaʻai faaleagaga ma le faanaunauga ina ia oo ina “atoatoa ona lelei ai ma faaauupegaina atoatoa mo galuega lelei uma lava”?—2 Timo. 3:17, NW.

² Seʻi manatu i lenei faasologa o meaʻai faaleagaga mo le tausaga e 1998 lea ua toeitiiti foi ʻafa! E ala i sauniga faalevaiaso a le faapotopotoga, ua tatou aʻoaʻoina ai nisi o mea tāua mai tusi e 23 o Tusitusiga Kerisiano Eleni autaluina nisi o faamatalaga o loo maua i le Insight on the Scriptures e faatatau i olaga o tagata o le Tusi Paia e toʻa 49, ma ua talanoaina ai foi itulau e 138 o le tusi Proclaimers. Ua tatou autaluina ai foi le tasi vaetolu o le tusi o Le Poto, ua toeitiiti foi uma ona talanoaina le tusi o le Fiafia i le Aiga, ma le silia i le 40 pasene o le tusi o le Tumutumuga o le Faaaliga. E lē gata i lea, o loo fafagaina foi i tatou e ala i lomiga e 12 o La Tatou Faiva o le Malo, suesueina mataupu mai kopi e 52 o Le Olomatamata, e faapena foi ma le tele o lauga lautele e uiga i mataupu eseese o le Tusi Paia. E faaopoopo atu i na mea uma le anoanoai o polokalame o tauaofiaga ma fonotaga. Maeu se anoanoai o mea lelei faaleagaga ua mafai ona faaavanoaina mai mo i tatou!

³ Ia Matuā Talisapaia Sauniuniga a Ieova: Ina ia maua atoatoa mai ai aogā, e manaomia ona tatou malamalama i le mafuaaga ua saunia ai e Ieova le anoanoai o nei meaʻai faaleagaga. O le fafagaina i nei mea lelei e atiina ae ai lo tatou faatuatua ma faamalosia ai la tatou faiā ma ia. (1 Timo. 4:6) Ae peitai, o meaʻai faaleagaga e lei saunia mai e tau ina faatonuina ai na o i tatou. Ua uunaia ai i tatou ina ia tufa atu le upu moni i isi ma faaauupegaina ai i tatou ina ia uigā i le faia faapea i le avea o ni faifeau o le tala lelei.—2 Timo. 4:5.

⁴ Aua lava neʻi o tatou faatamala i o tatou manaoga faaleagaga, ae ia ati ae pea se faanaunauga moomoo mo le anoanoai o sauniuniga e faamalieina ai faaleagaga mai le laoʻai a Ieova. (Mata. 5:3; 1 Pete. 2:2) Ina ia maua atoatoa ai aogā, e manaomia ona lava se taimi e faataatia ese mo na mea tāua faaleagaga e pei o le faia e lē aunoa o suesuega totino faale-Tusi Paia ma suesuega faaleaiga ma le auai i sauniga. (Efe. 5:15, 16) O taui e faafiafiaina ai ona o le faia faapea, o le a ogatusa lea ma le faalaeiauga faagaeeina na tusi atu ai Paulo i Kerisiano faamaoni i Eperu, e pei ona faamauina i le Eperu 13:20, 21.