“Le Upu ua Fai Faatatauina”
1 Po o avea o se luʻi mo oe le tufaina atu o le feʻau o le ola i isi? Po o ia te oe le lagona e tatau lava ona e fai atu ni upu maoaʻe ina ia faaofo ai lau ʻaufaalogologo? Ina ua aauina atu e Iesu ona soo, na ia tulei atu ia i latou: “A outou o, ia outou talaʻi atu, ia faapea atu, Ua latalata mai le malo o le lagi.” (Mata. 10:7) Sa leʻi fenuminumiaʻi le feʻau ma sa faigofie ona tufa atu. E lē ese foʻi la ma aso nei.
2 E masani lava e na o ni nai upu itiiti e manaʻomia ina ia amata ai se talanoaga. Ina ua feiloaʻi Filipo ma le eunuka Aitiope, na ia fesili atu ia te ia: “Po ua e lagona ea i mea ua e faitauina?” (Galu. 8:30) Maʻeu se talanoaga tauia na iʻu i ai mai “le upu ua fai faatatauina”!—Faata. 25:11.
3 E mafai ona e faaaogā se faafeiloaʻiga faapena i lau faiva. E faapefea? E ala i le mataalia ma le filifilia o upu e talafeagai ma tulaga o iai. Fai atu se fesili, ona faalogologo lelei lea i le tali e fai mai.
4 Ni Fesili Faavae: Ina ia amataina se talanoaga, e te ono faaaogā nisi o fesili nei:
◼ “Pe e te faaaogāina le Tatalo a le Alii (po o, lo Matou Tamā e) i lau tapuaʻiga?” (Mata. 6:9, 10) Toe fai atu se vaega o le tatalo ona e faapea atu lea: “Ua fesili mai nisi, ‘O ai le suafa o le Atua na fetalai mai ai Iesu e faapaia?’ Ua fesili foʻi isi, ‘O le ā le Malo lea na fetalai Iesu tatou te tatalo i ai?’ Po ua e maua ni tali faamalieloto i nei fesili?”
◼ “Pe sa e tau manatu ea e faapea: ‘Po o le ā le uiga o le olaga?’” Faailoa i ai e fesootaʻi atu lena fesili ma le poto e uiga i le Atua.—Fai. 12:13; Ioa. 17:3.
◼ “Pe e te manatu e iai se taimi o le a aveesea ai le oti?” Faaaogā le Isaia 25:8 ma le Faaaliga 21:4 e avatu ai se tali e maufaatuatuaina.
◼ “Pe e iai se vaifofō faigofie i mea o loo matuā fesouaʻiina ai le lalolagi?” Ia faailoa i ai e faapea ua aʻoaʻo mai e le Atua le “alofa atu i lē lua te tuaoi.”—Mata. 22:39.
◼ “Po o le a faaumatia e se mala faalevateatea lo tatou lalolagi i se aso?” Faailoa i ai le folafolaga a le Tusi Paia e faapea, o le a tumau le lalolagi e faavavau.—Sala. 104:5.
5 Ia molioo atu le tala lelei i se auala faigofie, tuusaʻo, ma i se faafeiloaʻiga agalelei. O le a faamanuia e Ieova au taumafaiga ina ia tufa atu e oo lava i se “upu” o le upu moni i isi.