Pusa Fesili
◼ O afea e talafeagai ai ona amataina se isi vaega o Suʻesuʻega Tautusi a le Faapotopotoga?
O le amataina o se vaega fou, e tatau ona iloiloina pe afai ua manaʻomia ina ia tausisia ai se aofaʻiga o tagata e tusa ma le 15 pe itiiti ifo foʻi e auai i nofoaga taʻitasi o suʻesuʻega tautusi, e aofia ai ma le Maota o le Malo. Aiseā ua fautuaina ai lenei fuafuaga?
Pe afai e tausia ia faatoʻaitiiti vaega o Suʻesuʻega Tautusi a le Faapotopotoga, o le a mafai ai e le faisuʻesuʻega ona uaʻi lelei atu i tagata taʻitoʻatasi e auai. E lē gata i lea, o le a maua ai foʻi e tagata uma se avanoa e faia ai se tali i se tulaga e faigofie ai ona taʻutino atu lo latou faatuatua. (Epe. 10:23; 13:15) O le iai o ni vaega toʻaitiiti i nisi o nofoaga i le oganuu a le faapotopotoga, o le a sili atu ai ona faigofie ona auai i le Suʻesuʻega Tautusi a le Faapotopotoga faapea ma faatasiga mo le auaunaga i le fanua. O faapotopotoga ua faateleina le aofaʻi o nofoaga o a latou suʻesuʻega tautusi, ua latou iloa ua faateleina foʻi le aofaʻiga o i latou e auai pe a tuufaatasi.
Atonu e iai ni tulaga faapitoa ua māfua ai ona fautuaina le amataina o se isi vaega, e tusa lava pe matuā toʻaitiiti. E faatatau lenei mea i nofoaga maotua po ua toʻatele naʻuā foʻi vaega ia o loo iai nei, po ua lē lava foʻi nofoaga e nonofo ai. Pe afai e manaʻomia, e mafai ona iai se vaega e fai la latou suʻesuʻega i le ao mo le lelei o tagata matutua, tagata faigaluega, po o tuafāfine e iai a latou tane e lē o ni Molimau.
E tatau i vaega o suʻesuʻega tautusi taʻitasi ona tofia i ai ni nai tagata e malolosi faaleagaga ma maelega i le talaʻiga, ma ia iai foʻi se faisuʻesuʻega ma se faitau tusi e taʻuagavaaina. E tatau i uso ona aapa atu ina ia faatumuina nei manaʻoga i le faapotopotoga.
E mafai e toeaina ona fesoasoani i le agaʻigaʻi i luma o le faapotopotoga i le faamautinoaina ua talafeagai le toʻatele o tagata i vaega o suʻesuʻega tautusi a le faapotopotoga, ma ua tausia lelei faaleagaga ma ua fetaui nofoaga e faia ai a latou suʻesuʻega. I so o se taimi lava e talafeagai ai, ua tatau ona amataina ni vaega fou ina ia mafai ai e tagata uma ona maua ai aogā mai lenei fuafuaga faaleagaga faapitoa. Pe e mafai ona e ofoina atu lou fale e avea ma nofoaga o se suʻesuʻega tautusi? O le toʻatele o tagata na latou faia faapea, ua tofo i faamanuiaga faaleagaga.