Se Vitiō e Faamatilatila ai Faiga Fou Tāua Faafomaʻi
O ē e faapitoa lo latou tomai i mataupu tau tulafono ma le soifua mālōlōina, ua latou uaʻi atili atu i talitonuga ma aiā tatau o tagata gasegase. Ona o lea, ua maua ai togafitiga ma metotia fou e mafai ona aogā i Molimau a Ieova. (Galu. 15:28, 29) O le mea lenā o loo faaalia i le vitiō Transfusion-Alternative Health Care—Meeting Patient Needs and Rights. (Tausiga Tau i le Soifua Mālōlōina e Sui ai Tuigātoto—Le Faafetaiaʻia o Manaʻoga ma Aiā Tatau o Tagata Gasegase) Ia maimoa i ai, ona autalu lea o mea na e aʻoaʻoina mai ai.—Ia mātau: Talu ai o loo faaalia e le vitiō ni vaaiga pupuu o taotoga, e tatau la i mātua ona faautauta a o maimoa faatasi ma o latou alo.
(1) Aiseā ua toe iloilo ai e i latou o galulue i le matātā faafomaʻi, le faaaogāina o tuigātoto? (2) Aumai ni faaaʻoaʻoga se tolu o taotoga tetele e faia e aunoa ma ni tuigātoto. (3) E toʻafia fomaʻi tipitipi i le lalolagi aoao o loo naunau e togafiti a latou tagata gasegase, e aunoa ma ni tuigātoto? Aiseā ua latou naunau ai e faia lenā tulaga? (4) O le ā ua faailoa mai e suʻesuʻega talu ai nei a falemaʻi, e tusa ai ma le faaaogāina o le toto? (5) O ā lamatiaga e fesootaʻi atu i tuigātoto? (6) O le ā le faaiʻuga na faia e le toʻatele o tagata atamamai e tusa ai ma aogā o togafitiga e sui ai tuigātoto? (7) O le ā e māfua ai le totovaivai? O le ā le tele e mafai ai ona lavātia e le tino lenei faafitauli? E faapefea ona togafitia lenei gasegase? (8) O le ā e mafai ona fai e faatele ai sela mūmū i le tino o le tagata gasegase? (9) O ā auala ua faaaogā e faaitiitia ai le maumau o le toto a o faia taotoga? (10) Pe e aogā i tamaiti laiti po o ē ua aafia i faalavelave faafuaseʻi mataʻutia, ia togafitiga e sui ai tuigātoto? (11) O le ā se mataupu autū talafeagai e uiga i le tausiga lelei faafomaʻi? (12) Aiseā e tāua ai mo Kerisiano ona filifili mamao i togafitiga e lē faaaogā ai le toto? E mafai faapefea ona tatou faia lenā mea?
O le taliaina o nisi o togafitiga o loo faaalia i le vitiō, o le filifiliga lenā e fitoitonu i le tagata lava ia, e tusa ai ma lona lotofuatiaifo ua uma ona aʻoaʻoina e le Tusi Paia. Po ua faia ea sau filifiliga po o lē fea togafitiga e sui ai tuigātoto e te manaʻo e faia mo oe ma lau fanau? E ao foʻi ona faailoa atoatoa atu i ou ʻauaiga lē talitonu, lau filifiliga ma māfuaaga ua e filifili ai faapena.—Tagaʻi i “Fesili Mai le ʻAufaitau” i Le Olomatamata o Iuni 15 ma Oketopa 15, 2000.