Ua Latou Faataatia se Faataʻitaʻiga o le Faamaoni

¹ O le tausaga e 1937 na amata ai se vala fou o le auaunaga faataimi atoa—le galuega o le paeonia faapito. O tane ma tamaʻitaʻi agavaa, e maua le tomai i le faiva faa-Kerisiano, na talia ma le loto malie tofiga e auauna po o fea lava e tofia i ai e le faalapotopotoga. O lea la, i le tele o tausaga mulimuli ane ai, o loo faaauau pea ona faataatia e paeonia faapito se faataʻitaʻiga o le faamaoni e ao ona faataʻitaʻi i ai.—Epe. 6:12.

² Na Latou Taʻimua: I le amataga, na muaʻau paeonia faapito i le galuega talaʻi e faaaogā ai laau pese, lea sa tā ai lauga i faitotoʻa o fale o aiga. Sa latou faaaogā foʻi lauga ua uma ona puʻeina e fai ma faavae o a latou talanoaga faale-Tusi Paia pe a fai toe asiga. Sa faia lenei mea i aai tetele ia ua uma ona faatū ai faapotopotoga. Mulimuli ane, na auina atu paeonia faapito i vaipanoa ia sa manaʻomia tele ai tagata talaʻi o le Malo. Sa latou toe asia tagata fiafia uma ma faia suʻesuʻega faale-Tusi Paia. O iʻuga o a latou taumafaiga filigā, na faavaeina ai le faitau selau o faapotopotoga fou. O la latou galuega talaʻi na faia ma le faamalosi na matuā faatoʻateleina ai le faalapotopotoga e pei ona tatou vaaia i aso nei. (Isa. 60:22) O loo faaauau pea ona faia e paeonia faapito se matafaioi tāua i le talaʻia o le tala lelei “i tagata uma lava i le lalolagi.”—Kolo. 1:23.

³ E Aogā Ona Faataʻitaʻi i Ai: Ua auauna nisi o paeonia faapito i le auaunaga faataimi atoa mo le tele o tausaga. Ma a o faagasolo tausaga, ua faamalosia atili le faatuatua o nei tane ma tamaʻitaʻi faamaoni i lalo o tulaga eseese na latou feagai ai. (1 Pete. 1:6, 7) Ua latou loto malilie e faataulaga lo latou maua o se olaga sologa lelei faaletino, ina ia latou auauna ai i nofoaga o loo iai se manaʻoga faapitoa. O nisi o i latou ua matutua ma ua feagai foʻi ma faigatā o le soifua mālōlōina, po o loo latou feagai foʻi ma isi tulaga faigatā. (2 Kori. 4:16, 17) Ae peitaʻi e ui lava “ina ulusinā, latou te fua mai pea lava.” (Sala. 92:14) Ua latou faalagolago atu iā Ieova ma maua ai ana faamanuiaga.—Sala. 34:8; Faata. 10:22.

⁴ E mautinoa ua tatau ona avatu i paeonia faapito le faamālō ma le alofa māfana. Pe afai ua maua so outou faaeaga o le tofia atu o ni paeonia faapito i la outou faapotopotoga, ia faaaogā atoatoa lenā avanoa e galulue ma i latou, ma maua ai aogā mai le poto masani ua iā i latou. Faailoa i ai le loto faafetai mo la latou auaunaga faamaoni i le folafola atu o le Malo. Ia faalaeiauina oe i lo latou tutumau. O i latou uma e faataʻitaʻi atu i lo latou faatuatua, e faapena foʻi ona latou maua faamanuiaga mai iā Ieova ona “o ē fai mea faamaoni, e fiafia i ai o ia.”—Faata. 12:22.