O se Agaga Tauofo e Maua ai Faamanuiaga
1. Na faapefea ona faataʻitaʻia e Tavita ma Neemia se agaga tauofo?
1 Ina ua faifai Koliata i le ʻautau a Isaraelu, sa ono ofo atu so o se fitafita e tau ma ia. Peitaʻi, na ofo atu se tama leoleo mamoe e leʻi aʻoaʻoina muamua e tau. (1 Samu. 17:32) Ina ua toe foʻi i Ierusalema le tafeaga a tagata Iutaia, na lē taulau ona latou toe fausia pa o le aai, ae peitaʻi na ofo atu se tautū uaina a le tupu Peresia e tuu lona tofiga taualoa i le maota o le tupu, ae malaga i Ierusalema e faamaopoopo le galuega. (Nee. 2:5) Sa faamanuia e Ieova tane nei o Tavita ma Neemia ona o le agaga sa la faaalia.—1 Samu. 17:45, 50; Nee. 6:15, 16.
2. Aiseā e ao ai i Kerisiano ona iai le agaga fia fesoasoani?
2 I aso nei, ua mauagatā i le lalolagi le agaga fia fesoasoani. I nei “aso e gata ai,” ua matuā pisi olaga o tagata, ma o le toʻatele ua “alolofa i latou iā i latou.” (2 Timo. 3:1, 2) E faigofie tele i se tasi ona uaʻi i ona fiafiaga, ma lē amanaʻia ai avanoa e ofo atu ai lana fesoasoani pe a iai se manaʻoga e faia ai faapea. Ae i le avea ai ma Kerisiano, tatou te naunau e faaaʻoaʻo iā Iesu o lē na taulamua e fesoasoani i isi. (Ioa. 5:5-9; 13:12-15; 1 Pete. 2:21) E faapefea ona tatou faataʻitaʻia se agaga fia fesoasoani, ma o ā faamanuiaga o le a maua ai?
3. E faapefea ona saosaolaumea le agaga tauofo i sauniga a le faapotopotoga?
3 Mo le Lelei o o Tatou Uso: E mafai ona tatou avatu se “mea alofa i la le Agaga” i isi, i le faia o so tatou sao i vaega o sauniga ia e manaʻomia ai ni manatu o le aofia. (Roma 1:11) O le faia o se sao e faamamaluina ai Ieova, e tā mau ai le upu moni i o tatou mafaufau ma loto, ma atili fiafia ai i sauniga. (Sala. 26:12) E mafai foʻi ona tatou tauofo e fai se lauga i le Aʻoga o le Faiva Faatiokarate pe a lē mafai ona faia e se tasi lona tofiga. E fesoasoani lea e faaleleia atili ai o tatou tomai e aʻoaʻo atu.
4. O ā nisi auala e mafai ona tatou faatino ai le agaga tauofo?
4 E mafai e uso ona faatino le agaga tauofo i le aapa atu e fai tiute tauave i le faapotopotoga. (Isa. 32:2; 1 Timo. 3:1) E mafai ona fesoasoani tagata uma i le sologa lelei o fonotaga ma tauaofiaga, i le tauofo e galulue i matagaluega eseese. Pe a tatou tauofo e galulue ma le ovasia femalagaaʻi i le faiva pe saunia se taumafataga mo ia, e mafai ona iʻu ai i ‘le fefaamāfanafanaaʻi.’ (Roma 1:12) Pe a tatou ofo e avatu se fesoasoani aogā i tamaiti mātua oti, o fafine ua oti a latou tane, o ē mamaʻi ma ē ua lē atoatoa le malosi, o tinā e iai fanau iti, ma isi i le faapotopotoga, o le a tatou maua le fiafia ma le finagalo malie o Ieova.—Faata. 19:17; Galu. 20:35.
5. O ā ni mea e fesootaʻi i le Maota mo Sauniga e manaʻomia ai ni tagata tauofo?
5 O le isi auala e ofo atu ai lo tatou taimi ma le malosi, o le fesoasoani e faamamā ma tausia le Maota mo Sauniga. E lē gata i lea, ona e toʻatele tagata o loo gasolo mai i le upu moni, o loo faatupulaʻia ai pea le manaʻoga mo ni Maota fou mo Sauniga, ma nisi e tauofo e fauina nei maota. Na faaavanoa atu se ulugalii e fesoasoani i le Komiti o Faugāfale e ui e leai ni o la tomai i galuega faufale. Mulimuli ane na aʻoaʻoina le ulugalii, ma ua fesoasoani i le vaega e gafa ma le leiina o piliki. Na taʻua e le avā: “O le galulue faatasi ma isi ua maua ai ni faauōga māfana. E vaivai le tino pe a uma le aso, ae e lagona lo ma faafouina faaleagaga.”
6. Aiseā ua avea ai le talaʻiga o se galuega tauofo sili ona tāua e tatou te faia?
6 E Ala i le Talaʻiga: O le galuega sili ona tāua tatou te tauofo e fai i aso nei, o le talaʻia o le Malo. A o fesoasoani i tagata e malamalama ma faatatau fautuaga o le Tusi Paia, ua latou maua ai se fuafuaga i le olaga ma le malosi e foʻia ai masaniga leaga. Ua latou iloa le faamoemoe e faagaeetia ai mo le lumanaʻi. O le saunia o aʻoaʻoga mai le Tusi Paia, ua tatou faia ai ma le fiafia se auaunaga tauofo lea e iai aogā tumau. (Ioa. 17:3; 1 Timo. 4:16) Atonu e fetaui i o tatou tulaga le faatele o se sao i lenei galuega i le paeonia lagolago pe sauatoa, alu atu i se mea o tele ai se manaʻoga, pe aʻoaʻo foʻi se isi gagana.
7. Aiseā ua faapitoa ai ona tāua le tauofo atu i aso nei?
7 Na valoia e le tupu o Tavita a oo i le taimi e amata ai le pulega a le Mesia, o le a “fai taulaga ma le loto” tagata o le Atua. (Sala. 110:3) A o faatelevave e Ieova le seleselega faaleagaga mulimuli, e anoanoaʻi galuega e ao ona tauofo ai. (Isa. 60:22) Po ua e fai atu ea: “O aʻu lenei, inā auina atu aʻu”? (Isa. 6:8) E mautinoa o le faaalia o le agaga tauofo, e tatou te faafiafia ai Ieova ma maua ai taui lelei.