O le a Faapefea Ona Faaaogā Lou Olaga?
1 E fesiligia tamaiti i nisi taimi, “O le ā se mea e te manaʻo e fai pe a e matua?” A o avea oe ma tamaitiiti, pe sa e faapea mai e fia avea oe ma se tama lakapī, se faifaiva, po o se ovasia o le matagaluega? A o avea o se teineitiiti, pe sa e faapea mai e fia avea oe ma faiaʻoga, se teine tausimaʻi, po o se misionare? O lea la ua e matua, e ao ona e fesili ifo i se isi fesili, ‘O le a faapefea ona faaaogā loʻu olaga?’ Po ua e sauni e fai sau filifiliga?
2 Ua saunia e le faalapotopotoga a Ieova le ata DVD Young People Ask—What Will I Do With My Life?, ina ia fesoasoani iā te oe e faia se filifiliga e sili ona lelei. Faamolemole ia matamata i ai ma mafaufau lelei i mea o loo iai, e aofia ai le tala, o faatalanoaga, ma isi mea faaopoopo. O loo otooto mai mea o loo iai i le ata i le pusa e taʻua o le “Lisi Autū” po o le Main Menu e pei ona tusia ai i le DVD.
3 Le Tala: Ia manatunatu i fesili nei a o e matamata i le tala: (1) O ā mea e tutusa ai Timoteo lea o loo taʻua i le Tusi Paia, ma Andre? (Galu. 16:1; 1 Timo. 4:8; 2 Timo. 1:5) (2) Na faapefea ona uunaʻia Andre ina ia lauiloa i taaloga, ma o ai na uunaʻia o ia? (3) O ai na avea ma aafiaga lelei i le faia o filifiliga a Timoteo ma Andre, ma o ā auala? (2 Timo. 1:1-4; 3:14, 15) (4) Na faapefea ona aogā iā Andre le timaʻiga o loo i le Mataio 6:24 ma le Filipi 3:8, ma e faapefea ona aogā iā te oe?
4 Vaaiga Filifilia: Pe a māeʻa ona matamata i le tala atoa, ia toe matamata i vaaiga nei ma tali fesili ia. “Paulo ma Timoteo”: O le ā le timaʻiga mulimuli a Paulo iā Timoteo? (2 Timo. 4:5) “Ia Avatu iā Ieova Mea e Sili Ona Lelei”: O ā ni ou sini faaleagaga o loo iai? “Ia Tū mo Ieova”: O fea e maua ai le fiafia moni? “Fautuaga a le Tinā o le Tinā”: O le ā le itu e sesē ai le manaʻo ia avea ma sē e taʻutaʻua i le lalolagi a Satani? (Mata. 4:9) “Leai se Mea e Toe Salamō Ai”: O ā ni mea na e matamata ai e te iloa e fesoasoani iā te oe e maua ai lagona faamalieina o le olaga?—Faata. 10:22.
5 Faatalanoaga: A o e matamata i vaega taʻitasi nei, o le ā se mea ua e iloa e te faia e avatu ai le mea e sili ona lelei iā Ieova? (1) “Tuutoina Atu i le Saʻilia o Mea e Lē Aogā pe Tuutoina Atu i le Atua?” (1 Ioa. 2:17); (2) “Ia Iloa le Auala e Olioli ai i Lau Faiva” (Sala. 27:14); ma le (3) “Se Avanoa i le Auaunaga.”—Mata. 6:33.
6 Toe Tepa i Tua: Pe mafai ona e tali? (1) O ā galuega na saʻilia e le uso ma le tuafafine, ma aiseā? (2) Na faapefea ona la taulau manuia? (3) O ā ni suiga mataʻina i o la olaga? (2 Kori. 5:15) (4) O ā galuega e fesootaʻi atu i le Malo na suia ai a la galuega na iai muamua, ma aiseā na la manatu ai e lē mafai ona saʻilia uma ia galuega? (5) Pe na la toe salamō ona o le suia o mea na taulaʻi i ai o la olaga? (6) O ā la faamatalaga na uunaʻia faapitoa ai oe e mafaufau i mea e ao ona e faia i lou olaga?
7 Faatalanoaga Faaopoopo: I nei faatalanoaga, o ā ni mea na e aʻoaʻoina e mafai ona e faatatauina i se tulaga e sili atu i le auaunaga iā Ieova? (1) “Le Tāua o Suʻesuʻega a le Tagata Lava Ia,” (2) “Isi Galuega Molimau Atu,” (3) “Auaunaga i Peteli,” (4) “Aʻoga mo Toleniga Faamisionare i Kiliata,” ma le (5) “Aʻoga mo Toleniga i le Faiva.” Ia autalu le “Faasino Upu i Mataupu e Fesootaʻi i Ai” (Index to Published Information on Related Subjects), ma faitau atili i mea e te fiafia i ai.
8 Po ua e mafaufau la, po o le a faapefea ona faaaogā lou olaga? Na timaʻi Paulo iā Timoteo: “Ia e mafaufau i ia mea, ia e faamasani ai; ina ia iloa ai e tagata uma lou alualu i luma.” (1 Timo. 4:15) E matou te faalaeiauina oe ina ia faia le mea lava lea e tasi na e matamata ma faalogo i ai i lenei ata DVD. Ia talosaga iā Ieova e fesoasoani iā te oe e fai se filifiliga poto, lea o le a avatu moni ai le olioli ma le faamalieina i le olaga i le taimi nei, faapea foʻi ma le mauaina o se lumanaʻi fiafia.
[Pusa i le itulau 6]
LISI AUTŪ
Faaali le Tala
Vaaiga (11 vaaiga filifilia)
Faatalanoaga
Matamata le Ata Atoa
Vaega (3 vaega filifilia)
Toe Tepa i Tua
Isi Mea Faaopoopo
Faatalanoaga Faaopoopo
Faasino Upu i
Mataupu e Fesootaʻi i Ai
Tamaʻi Ulutala
Mo Ē Logonoa
Leai se Mea
Ina ia saʻili le vaega o loo iai le lisi o mea o loo i le ata, ia faaaogā ki o loo iai upu nei, Next ▶, ◀ Back, ma le Main Menu.