Ia Mulimuli i le Faaaʻoaʻoga a Iesu
1. O le ā le faaaʻoaʻoga na faataatia e Iesu?
1 A o tatou auai i le galuega o le faia o soo, e tatau ona manatua o a tatou faaaʻoaʻoga e iai sona aafiaga tele i ē o loo mātauina i tatou. Na aʻoaʻo atu Iesu e ala i upu ma gaoioiga. Na iloa e tagata na mātauina Iesu lona maelega, lona alofa mo tagata, lona faanaunauga e faapaiaina le suafa o lona Tamā, ma lona naunautaʻiga e faataunuu le finagalo o lona Tamā.—1 Pete. 2:21.
2. E faapefea i a tatou faaaʻoaʻoga ona aafia ai i latou e tatou te galulue faatasi i le talaʻiga?
2 A o Talaʻi Mai Lea Fale i Lea Fale: I le pei o Iesu, o a tatou faaaʻoaʻoga e taaʻina ai ē tatou te galulue faatasi. O tagata talaʻi fou ma ē e lē lava le poto masani, pe a latou vaaia lo tatou auai ma le maelega i le faiva, o le a uunaʻia ai i latou e iloilo lo latou sao o loo fai i le talaʻiga. Pe a latou mātauina lo tatou olioli ma le naunau moni i isi, o le a faamanatu ai iā i latou le tāua o le faaalia o ia uiga i le talaʻiga. Pe a latou mātauina lo tatou filigā i le faaaogāina o le Tusi Paia, i le faia o toe asiga, ma i le faia o suʻesuʻega faale-Tusi Paia, o le a uunaʻia ai i latou e faia faapea.
3. E faapefea ona aʻoaʻoina tagata aʻoga o le Tusi Paia iā tatou faaaʻoaʻoga, ma atonu o le ā e latou te ono fai?
3 A o Faia Suʻesuʻega Faale-Tusi Paia: E faapitoa lava ona mātauina e tatou tagata aʻoga o le Tusi Paia o tatou uiga. Mo se faaaʻoaʻoga, e tusa lava pe tatou te faamalamalama iā i latou le tāua o le sauniuni mo le suʻesuʻega, le suʻeina o mau, ma le vaseina o manatu autu, ae o le a latou mātauina po o e sauni pe leai. (Roma 2:21) Afai tatou tausisi i taimi o le suʻesuʻega, o le a latou lē faatagaina nisi fuafuaga e faalavelave i le latou suʻesuʻega faale-Tusi Paia. E lē taumatea foʻi o le a latou mātauina lou naunau faataulagaina mo le auaunaga ma lou faatuatua malosi. E lē o se mea la e ofo ai pe a tulaʻi mai tagata aʻoga a i latou e mulimuli tuʻi i le faaaʻoaʻoga a Iesu, ma avea ma faievagelia maelega ma fua tele mai.
4. Pe a tatou auai i sauniga a le faapotopotoga, o le ā o loo aʻoaʻo atu e ala i a tatou faaaʻoaʻoga?
4 A o Auai i Sauniga a le Faapotopotoga: O i latou uma i le faapotopotoga Kerisiano, e iai le latou vaega i le aʻoaʻo atu e ala i a latou faaaʻoaʻoga i sauniga a le faapotopotoga. E maua e ē fiafia aogā mai le auai i sauniga, ona o faaaʻoaʻoga lelei o loo latou mātauina i le faapotopotoga. O le a latou mātauina le faiā māfana a uso, le autasi o ni Kerisiano, ma laʻei ma teuga onomea. (Sala. 133:1) O a tatou faaaʻoaʻoga o le auai ma le faamaoni i sauniga a le faapotopotoga, ma le taʻu atu o lo tatou faatuatua i luma o isi o le a latou mātauina foʻi. Na mātauina e tagata na asiasi ane i se tasi o a tatou sauniga, le vave o le suʻeina o se mau e se teineitiiti i lana Tusi Paia, ma mulimuli ai a o faitauina. Na avea le faaaʻoaʻoga a lenei teineitiiti ma māfuaaga na talosaga ai lenei tagata e fai sana suʻesuʻega faale-Tusi Paia.
5. Aiseā e lē tatau ai ona manatu faatauvaa i le aogā o a tatou faaaʻoaʻoga?
5 O loo faalaeiauina i tatou e le Tusi Paia e faataʻitaʻi isi i faaaʻoaʻoga lelei a isi. (Fili. 3:17; Epe. 13:7) O lea la, ia tatou manatua pe a mulimuli i faaaʻoaʻoga a Iesu, o le a mātauina e isi ma o le a iai se taaʻiga lelei mo i latou. O le iloaina o lenei mea, o le a tatou teuloto ai upu o loo i le 1 Timoteo 4:16: “Ia oe lava iā te oe, atoa ma lau e aʻoaʻo atu.”