Pusa Fesili

◼ Pe talafeagai i le aofia ona patipati pe a māeʻa vaega taʻitasi o le Aʻoga Faatiokarate ma le Sauniga o le Auaunaga?

Ina ua foafoaina le lalolagi e Lē na foafoaina mea uma, o Ieova, na “pepese faatasi fetu o le taeao, ma alalaga fiafia atalii uma o le Atua.” (Iopu 38:7) Sa moomoo nei atalii agelu o le Atua e viiviia Ieova mo ana galuega ofoofogia o le foafoaga, auā o se faailoaga fou lea o lona poto, agalelei, ma le malosi.

O se gaoioiga lelei le faaalia o lo tatou loto talisapaia mo taumafaiga a o tatou uso ma a latou mataupu o loo fai. O se faataʻitaʻiga, e masani ona tatou patipati i le māeʻa o lauga ma faataʻitaʻiga i faatasitasiga faapitoa, e pei o fonotaga ma tauaofiaga. O vaega na tauaaoina i inā, sa manaʻomia ona faaalu ai le tele o le taimi ma taumafaiga e saunia ai. O lo tatou patipati e faaalia atu ai lo tatou talisapaia e lē gata o galuega fitā a le failauga, ae faapea foʻi taʻiala o loo tuuina mai e Ieova e ala mai i lana Afioga ma lana faalapotopotoga.—Isa. 48:17; Mata. 24:45-47.

Ae faapefea le patipati i vaega o le Aʻoga o le Faiva Faatiokarate ma le Sauniga o le Auaunaga? E leai se tulafono e faasā ai le patipati, e pei o le patipati pe a māeʻa le uluaʻi lauga a se tasi i le aʻoga. Peitaʻi, e faigofie ona avea le patipati ma se masaniga, ona lē uigā ai lea o lenei vala. O lea la, e lē masani ai ona tatou patipati i le māeʻa o vaega taʻitasi.

E ui tatou te lē patipati mo vaega uma o le Aʻoga o le Faiva Faatiokarate ma le Sauniga o le Auaunaga, ae e iai isi auala e mafai ai e i tatou uma ona faaalia atu lo tatou talisapaia o taʻiala ma sauniuniga a i latou e tauaaoina nei vaega. E mafai ona tatou faia lenei mea i le uaʻi atu i mea o loo fai mai ai le failauga. Pe a māeʻa foʻi le sauniga, e masani ona maua le avanoa e faaalia atu ai lo tatou loto faafetai mo a latou taumafaiga.—Efe. 1:15, 16.