Tusi Valaaulia o le Faamanatuga o le a Tufatufaina i le Lalolagi Atoa!
1. O le ā le tauiviga faapitoa lea ua fuafuaina mo le lalolagi atoa a o lumanaʻi le Faamanatuga?
1 “Ia faia pea lenei mea e fai ma faamanatuga iā te aʻu.” (Luka 22:19) Ona o le usiusitaʻi i le faatonuga lenei a Iesu, o le a tauaofia faatasi tagata tapuaʻi o Ieova ma tagata fiafia iā Mati 30, 2010, e faamanatu le maliu o Iesu. O le a tufatufaina i le lalolagi atoa se tusi valaaulia faapitoa mo le Faamanatuga e amata iā Mati 13 e oo iā Mati 30.
2. O le ā le auala e ono ofo ai le tusi valaaulia?
2 Le Auala e Ofo ai le Tusi Valaaulia: E mafai ona e tuu le tusi valaaulia i le tagata o le aiga ina ia tilotilo i le ata o loo iai i le pito i luma, ona faapea atu lea: “O le a tauaofia le faitau miliona o tagata i le lalolagi atoa e faamanatu le maliu o Iesu i le afiafipō o Mati 30. Ua ou sau e faaoo atu le tusi valaaulia lenei, e valaaulia ai lau susuga ma lo outou aiga ina ia faatasi atu. E talia foʻi ma le fiafia au uō. Ia mātau mai le taimi ma le nofoaga e fai ai le Faamanatuga.” E faalagolago lava i le tulaga o mea, ae e mafai ona e faitau i ai le Luka 22:19 lea o loo iai le faatonuga mai le Tusi Paia. Ia manatua, ia faapuupuu ona e utiuti le taimi e faasopolia ai le oganuu atoa.
3. O ai tatou te ono valaauliaina?
3 Afai e telē le oganuu a la outou faapotopotoga, e ono faatonuina outou e toeaina e tuu ai tusi valaau i aiga e lē maua atu i ai ni tagata i le uluaʻi asiasiga. Pe afai e talafeagai, ia ofo mekasini faatasi ai ma le tusi valaau. Faamautinoa ua valaaulia au asiga, o au suʻesuʻega faale-Tusi Paia, o tagata tou te faigaluega faatasi, aʻoʻoga faatasi, o tauaiga, o tuaoi, ma isi tou te masani.
4. O le ā e uunaʻia i tatou e fai ona o le talisapaia o le alofa o Ieova i le saunia mai o le togiola?
4 Ia Sauniuni ia Auai Atoatoa: O le vaitaimi o le Faamanatuga, o se vaitaimi lelei tele e faateleina ai a tatou gaoioiga. Pe e mafai ona fetuunaʻi lau faasologa ina ia mafai ona e paeonia lagolago? Pe e iai sau fanau po o ni tagata aʻoga o le Tusi Paia ua lelei le agaʻigaʻi i luma faaleagaga? Afai o iai, ia faafesootaʻi toeaina e vaai po ua agavaa tagata fou nei e auai i le tauiviga faapitoa lenei o ni tagata talaʻi e leʻi papatiso. Ona o le talisapaia o le alofa o Ieova i le saunia mai o le togiola, o le a uunaʻia ai i tatou e lē gata ia auai i le Faamanatuga ae ia valaaulia foʻi le toʻatele e mafai ai ina ia auai mai.—Ioa. 3:16.