Amata iā Aperila 2 Ona Tufa le Tusi Valaaulia o le Faamanatuga

1. O afea e tufatufa ai tusi valaaulia o le Faamanatuga i lenei tausaga, ma o le ā le tāua o lenei tauiviga faaletausaga?

¹ E amata iā Aperila 2 e oo iā Aperila 17, o le a tatou tufatufaina ai tusi valaaulia o le sauniga e sili ona tāua o le tausaga—o le Faamanatuga o le maliu o Keriso. I tausaga ua mavae, e toʻatele tagata lotofiafia na tali mai i lenei tauiviga faaletausaga. O se faaaʻoaʻoga, i le aso o le Faamanatuga, na vili atu ai se fafine i le ofisa o le lālā ma faapea atu: “O lea faatoʻā ou sau i le fale, ae e iai se tusi valaaulia na tuu i lalo o loʻu faitotoʻa. Ou te fia alu, ae ou te lē mautinoa le taimi e fai ai.” Na taʻu atu i ai e le uso le pito o le tusi valaaulia e maua ai lenei faamatalaga. Ina ua uma le talanoaga, na taʻutino atu e le fafine, “Ou te alu atu i la outou sauniga nanei!”

2. O le ā se tala e tatou te ono fai atu pe a tufatufa le tusi valaaulia?

² Le Auala e Fai Ai: Talu ai e puupuu le taimi e galueaʻiina ai le oganuu, e sili la ona faapuupuu. E tatou te ono faapea atu: “Talofa. E matou te fia tuu atu i lou aiga lenei tusi valaaulia i se sauniga tāua faaletausaga, e faia i le lalolagi aoao, i le Aso Sa, Aperila 17. [Tuu atu le tusi valaaulia i le tagata o le fale.] O le aso lenā e faamanatu ai le maliu o Iesu. O le a faia ai se lauga faale-Tusi Paia e lē totogiina, e faamatala ai le auala e aogā ai iā i tatou le togiola a Keriso. O loo faaalia i lenei tusi valaaulia, le nofoaga ma le taimi e faia ai lenei sauniga i lo tatou vaipanoa.”

3. E faapefea ona tatou valaaulia le toʻatele o tagata e mafai ai?

³ Pe afai e telē le oganuu a le faapotopotoga, e ono faatonuina e toeaina e tuu tusi valaaulia i fale e lē o maua atu i ai nisi, ma ia tuu i se mea e lē iloa atu ai e se isi. Ia faamautinoa ua valaaulia au asiga, tauaiga, tagata e tou te faigaluega faatasi, aʻoʻoga faatasi, ma isi tou te masani. Pe a auai i le tufatufaina o tusi valaaulia i faaiʻuga o vaiaso, ia ofo mekasini pe a talafeagai. Pe mafai ona e paeonia lagolago iā Aperila, ma faateleina lou sao i lenei tauiviga fiafia?

4. Aiseā e tatou te mananaʻo ai ia auai tagata lotofiafia i le Faamanatuga?

⁴ Maʻeu se molimau lelei o le a maua e tagata lotofiafia e auai! O le a latou faalogo i le alofa tele o Ieova i le saunia o le togiola. (Ioa. 3:16) O le a latou aʻoaʻoina le auala e maua ai e tagata aogā mai i le Malo o le Atua. (Isa. 65:21-23) E valaaulia foʻi i latou e talanoa atu i le ʻautautua, ma talosaga atu mo se suʻesuʻega ina ia aʻoaʻo atili ai le Tusi Paia. E tatou te tatalo ia toʻatele tagata lotofaamaoni e tali mai i lenei tauiviga, ma auai faatasi ma i tatou i le Faamanatuga!