Amata iā Mati 17 le Tauiviga ia Faalauiloa Atu le Faamanatuga
1. O le ā le tauiviga o le a amata iā Mati 17?
1 E aogā le faamanatuina o le Faamanatuga ina ia faailoa atu ai le maliu o Iesu. (1 Kori. 11:26) O lea la, e tatou te mananaʻo i isi ia auai faatasi ma i tatou e faalogologo e faatatau i le meaalofa a Ieova, o le togiola. (Ioa. 3:16) I lenei tausaga, o le a amata i le Aso Toonaʻi, Mati 17, la tatou tauiviga e valaaulia tagata ia auai mai i le Faamanatuga. Po o e tulimataʻia e faia atoatoa ai sou sao?
2. O le ā la tatou tala e fai atu ina ia faailoa atu ai le tusi valaaulia?
2 Le Tala e Tatou te Fai Atu: E sili ona lelei pe a faapuupuu le taulimaga. Atonu e tatou te faapea atu: “Talofa. Ua matou oo mai e tuu atu i lou aiga lenei tusi valaaulia i se sauniga tāua faaletausaga, e faia i le lalolagi aoao iā Aperila 5. O le a faia ai se lauga faale-Tusi Paia e lē totogiina, e faamatala ai mea ua faataunuuina ona o le maliu o Iesu, ma mea o loo ia faia i le taimi nei. O loo faaalia i lenei tusi valaaulia, le nofoaga ma le taimi e faia ai lenei sauniga i lo tatou vaipanoa.” Pe a auai i le tufatufaina o tusi valaaulia i faaiʻuga o vaiaso, e tatau foʻi ona tatou ofo mekasini pe a talafeagai.
3. E ono mafai faapefea ona tatou valaaulia le toʻatele o tagata i le tele e mafai ai?
3 Valaaulia le Toʻatele e Mafai Ai: O lo tatou sini ia valaaulia le toʻatele o tagata i le tele e mafai ai. O lea, ia faamautinoa ua valaaulia au suʻesuʻega faale-Tusi Paia, toe asiga, tauaiga, tagata e tou te faigaluega faatasi, aʻoʻoga faatasi, tuaoi, ma isi e tou te masani. O le a saunia e toeaina o le faapotopotoga taʻiala i le auala e galueaʻiina ai la outou oganuu. E iai iʻuga lelei o la tatou tauiviga faaletausaga i le valaaulia o tagata i le Faamanatuga. Ina ua savali atu se fafine i totonu o le fale na fai ai le faamanatuga i le tausaga ua mavae, na ofo atu se tautua e fesoasoani iā te ia e suʻe le tagata talaʻi na valaauliaina o ia. Peitaʻi, na faapea atu le fafine e leai se tasi i inā e na te iloaina, ma na maua lana tusi valaaulia mai i se tasi na talaʻi mai lea fale i lea fale i le amataga o lenā aso.
4. O ā māfuaaga e tatau ai ona e faia se sao maelega i le tauiviga?
4 Atonu o se tasi o le a iai i le aofia i la outou Faamanatuga, ua māfua ona auai atu ona na e tuuina i ai se tusi valaaulia. E tusa pe tali mai se tasi pe leai, ae o au taumafaiga filigā o le a avatu ai se molimau. O tusi valaaulia e te tufaina atu o le a faailoa atu ai ua avea nei Iesu ma Tupu malosi. O lou auai ma le maelega i le tauiviga o le a faailoa atu ai i ē uma o mātau mai—o ē i le oganuu, le ʻautalaʻi, ae sili ai ona tāua, o Ieova—e te matuā talisapaia le meaalofa o le togiola.—Kolo. 3:15.