Po o le a E Faaaʻoaʻo i le Maelega o Ieova ma Iesu, i le Vaitaimi o le Faamanatuga?
1. O le ā le taumafaiga faapitoa e faia e Molimau a Ieova i le vaitaimi o le Faamanatuga?
1 O loo faataunuu ma le maelega e Ieova lona finagalo. I le faasino atu i nisi o faamanuiaga o le Malo o le Atua, ua taʻua i le Isaia 9:7: “E faia lenei mea i le maelega o Ieova o ʻau.” Sa matuā maelega foʻi le Alo o le Atua i le tapuaʻiga moni a o talaʻi i le lalolagi. (Ioa. 2:13-17; 4:34) I vaitaimi o le Faamanatuga i tausaga taʻitasi, e faia ai e le faitau miliona o tagata talaʻi i le lalolagi aoao, se taumafaiga faapitoa ia faaaʻoaʻo i le maelega o Ieova ma Iesu, e ala i le faatele o lo latou sao i le talaʻiga. Po o le a aofia ai oe iā i latou na?
2. O le ā o le a uunaʻia i tatou e fai e amata mai iā Mati 7, ona o le maelega?
2 Tauiviga o le Faamanatuga: I lenei tausaga, o le a amata le tauiviga e faalauiloa ai le Faamanatuga, i le Aso Toonaʻi, Mati 7. Ia fuafua nei loa e auai ma le maelega i le talaʻiga. O le a matuā fiafia faapotopotoga a o maelega e galueaʻiina a latou oganuu i le tele e mafai ai. Ia fai se taumafaiga maumauaʻi e valaaulia au tagata aʻoga o le Tusi Paia, toe asiga, tagata e faigaluega ma aʻoʻoga faatasi, faapea tauaiga e ala i le tuu atu i ai o se valaaulia, pe faaaogā la tatou Upega tafaʻilagi o le jw.org/sm.
3. E faapefea ona faalautele atu la tatou faiva iā Mati ma Aperila?
3 Paeonia Lagolago: O le maelega o le a uunaʻia ai foʻi i tatou e faalautele atu la tatou faiva. E mautinoa o le a mafai ona paeonia lagolago le toʻatele iā Mati ma Aperila, auā o le a mafai ona tatou filifili i le faatulagaga e 30 itula. I la outou tapuaʻiga a le aiga po o taimi o au oe lava suʻesuʻega, ia iloilo faatasi ma le tatalo pe faapefea ona e faia faapea. (Faata. 15:22) O lou maelega i lenei tauiviga e uunaʻia ai foʻi isi ia galulue ma le maelega. O le a e faaaʻoaʻo i le maelega o Iesu pe afai e te faia ni fetuunaʻiga ina ia faatele sou sao i le talaʻiga.—Mare. 6:31-34.
4. O ā taui e maua pe a tatou faaaʻoaʻo i le maelega o Ieova ma Iesu?
4 O le a matuā tauia i tatou pe a faaaʻoaʻo i le maelega o Ieova ma Iesu a o faagasolo le vaitaimi o le Faamanatuga. O le a avatu ai se molimau i le toʻatele o tagata o le oganuu. O le a tatou maua le olioli ma le faamalieina mai i le auauna iā Ieova ma foaʻi atu i isi. (Galu. 20:35) A o le sili ona tāua, o le a tatou faafiafia lo tatou Atua maelega ma lona Alo.