Pe E te Manatua?
Pe na e faitau māeʻaeʻa i lomiga taʻitasi o Le Olomatamata o lenei tausaga? O lea, pe mafai ona e taliina fesili o loo mulimuli mai:
O le ā e uunaʻia ai i tatou e avatu iā Ieova le mamalu?
E tatou te faamamaluina Ieova ona e tatou te matuā faaaloalo ma alolofa faapelepele iā te ia. E lē gata i lea, e tatou te mananaʻo ia iloa o ia e isi.—w25.01, itu. 3.
E faapefea ona tatou faaalia le lotofaamagalo, pe a faatigā mai se tasi?
E lē tatau ona faatuatuanaʻi i o tatou faalogona tigā. Peitaʻi, o le faamagalo atu ma le lē teuloto o le ita, e puipuia ai i tatou mai i le fia tauimasui.—w25.02, itu. 15-16.
Aiseā e avea ai Mareko o se faaaʻoaʻoga lelei mo uso talavou?
Na lotomalie Mareko e talia se tofiga e auauna atu ai i isi. E ui lava na iai se mea na tupu na ia lagona ai le faanoanoa ma le lē fiafia, ae e leʻi taofia ai o ia mai i le auauna atu. Na ia atiaʻe foʻi se faauōga māfana ma Paulo ma isi Kerisiano taʻumatuaina.—w25.04, itu. 27.
O le ā na uiga i ai Iesu ina ua ia tatalo: “Ua ou faailoa atu lou suafa iā i latou”? (Ioane 17:26)
Na iloa lelei e soo o Iesu le suafa o le Atua. Peitaʻi, na faailoa atu e Iesu iā i latou le ituaiga o Atua e iai Lē e ou le suafa o Ieova, o lona finagalo, o ana gaoioiga ma galuega, faapea ona uiga.—w25.05, itu. 20-21.
O le ā le aogā o lo tatou talia e iai le mea e gata mai ai lo tatou iloa?
E tatou te amanaʻia ai le mea moni, e tatou te lē iloa mea uma. O se faataʻitaʻiga, e tatou te lē iloa le taimi e oo mai ai le iʻuga, o le auala e ono gaoioi ai Ieova i lenā taimi, o le mea e ono tupu taeao, faapea le silafia lelei e Ieova o i tatou.—w25.06, itu. 15-18.
O le ā e fesoasoani iā i tatou ia maua aogā mai i se lauga lautele po o se mataupu i se lomiga?
Ia fesili ifo: ʻO le ā se faamaoniga mai i lenei mataupu e fesoasoani e faatalitonu ai se tasi i se aʻoaʻoga faavae o le Tusi Paia? O le ā se talafaatusa e mafai ona ou faaaogā e aʻoaʻo atu ai lenei aʻoaʻoga faavae i se tasi? Atonu o ai e fiafia i lenei mataupu?’—w25.07, itu. 19.
O le ā e te aʻoaʻoina e faatatau i le lotofaamagalo o Ieova, mai i ana feutagaʻiga ma Tavita?
E ui na faia e Tavita ni agasala matuiā, ae na faamagalo o ia e Ieova ina ua ia salamō moni. (1 Tu. 9:4, 5) Pe a faamagalo i tatou e Ieova, e na te lē toe lāgā pe toe taʻua a tatou mea sesē na fai.—w25.08, itu. 17.
O le ā e mafai ona e faia, pe a iai se manatu e faigatā ona malamalama ai sau tagata aʻoga?
Pe afai ua uma ona e faamalamalama atu se manatu mai i le Tusi Paia, ae o loo faigatā lava ona ia malamalama i ai, e lelei la ona faaauau le suʻesuʻega seʻi lua toe talanoa i lenā manatu i se isi taimi.—w25.09, itu. 24.
O loo taʻua i le Tusi Paia le “malosi taufaasesē o le agasala.” (Epe. 3:13) O le ā le uiga?
O le agasala e faaosoosoina ai i tatou e faia ni gaoioiga sesē. Ae e mafai foʻi e le agasala ona faasesēina i tatou, e ala i le faapogaia o i tatou e fesiligia le alofa o Ieova.—w25.10, itu. 16.
O ā mea e tolu e mafai ona tatou faia ina ia faaleleia atili ai a tatou tatalo?
(1) Ia manatunatu i uiga o Ieova. (2) Ia mafaufau i mataupu e faaaofia i a tatou tatalo. (3) Aua le faatopelauina a tatou tatalo, ae ia faaalu le taimi e talatalanoa atu ai iā Ieova.—w25.10, itu. 19-20.
E faapefea ona tatou fesoasoani atu i uso ma tuafāfine matutua?
Ia fai ma masani le vili atu pe asiasi iā i latou. E mafai foʻi ona tatou ō faatasi e vaai le fomaʻi, pe galulue ma i latou i vala eseese o le faiva.—w25.11, itu. 6-7.
O ā ni vala e saosaolaumea i le faamamaluina o Ieova i le aso o se faaipoipoga?
Ia usitaʻia tulafono a le malo i mataupu tau faaipoipoga. Ia faamautinoa e atagia atu i le sauniga ma le ʻaiga, le fua o le agaga o le Atua. Ia onomea o oulua laʻei, ma ia ʻalofia so o se tū ma aga e lē faale-Tusi Paia. Ia faailoa manino atu manatu i se auala faaaloalo, a o talanoaina tapenaga o le faaipoipoga.—w25.12, itu. 21-24.