Po o le a Tali Mai Ieova i Aʻu Tatalo?

1-2. Aiseā e tatou te ono manatu ai e lē o tali mai Ieova i a tatou tatalo?

“IA E matuā fiafia foʻi iā Ieova, ona foaʻi mai lea e ia o mea e manaʻo i ai lou loto.” (Sala. 37:4) E mataʻina lenā folafolaga! Peitaʻi, pe e tatau ona tatou faatalitalia e vave ona tali mai Ieova i so o se mea e tatou te tatalo atu ai? Aiseā e tāua ai lenā fesili? Seʻi mātau faataʻitaʻiga nei. O loo tatalo se tuafafine nofofua, e fia auai i le Aʻoga mo Tagata Talaʻi o le Malo. Peitaʻi, ua tele tausaga e na te leʻi maua lava se valaaulia mo le aʻoga. O loo tatalo se uso talavou iā Ieova ina ia toe faafoʻisia lona malosi mai i se maʻi tugā, ina ia tele mea e mafai ona ia faia e auauna ai i le faapotopotoga. Peitaʻi, na faasolosolo ina leaga le tulaga o lona maʻi. O loo tatalo ni mātua Kerisiano ina ia tumau le la tama i le upu moni. Peitaʻi, na filifili le la tama e lē toe auauna iā Ieova.

² Atonu na iai foʻi se mea na e talosaga ai iā Ieova ae e leʻi tali mai o ia. E te ono mafaufau ai, o loo tali e Ieova tatalo a isi ae lē o au tatalo. Pe e te mafaufau foʻi, atonu na iai se mea sesē na e faia. Na oo na faalogona i se tuafafine e igoa iā Janice.b Na la tatalo ma lana tane iā Ieova e la te fia auauna i le Peteli. Na ia faapea mai: “Na ou mautinoa o le a vave ona talia i maʻua i le Peteli.” Ae na umi se taimi e leʻi valaaulia lava i laʻua. Na faapea mai Janice: “Na ou lagona le faanoanoa ma le lē mautonu, ma na ou mafaufau pe na iai se mea sesē na ou faia ua lē fiafia ai Ieova iā te aʻu. Na patino laʻu tatalo mo lana taʻitaʻiga. Aiseā na lē tali mai ai Ieova i laʻu tatalo?”

3. O le ā o le a talanoaina i lenei mataupu?

³ E iai taimi e tatou te ono tomānatu ai, po o faafofoga mai Ieova i a tatou tatalo. E faapena foʻi lagona na oo i nisi o tane faamaoni i taimi o le Tusi Paia. (Iopu 30:20; Sala. 22:2; Sapa. 1:2) E faapefea ona e mautinoa o le a tali mai Ieova i au tatalo? (Sala. 65:2) Ina ia tali lenā fesili, o le a tatou talanoaina manatu nei: (1) O le ā e tatou te faatalitalia mai iā Ieova? (2) O le ā e faatalitalia mai e Ieova iā i tatou? (3) Aiseā e ono manaʻomia ai ona toe fetuunaʻi nisi o mea e tatou te talosaga atu ai iā Ieova?

O LE Ā E TATOU TE FAATALITALIA MAI IĀ IEOVA?

4. E tusa ai ma le Ieremia 29:​12, o le ā ua folafola mai e Ieova?

⁴ Ua folafola mai e Ieova o le a faafofoga mai i a tatou tatalo. (Faitau le Ieremia 29:12.) E alofa le Atua i ona tagata tapuaʻi faamaoni. O lea, e lē faataligatuli o ia i a latou tatalo. (Sala. 10:17; 37:28) E lē faapea ai la, o le a tali mai le Atua i mea uma e tatou te talosaga atu ai. Atonu e tatou te faatali seʻia oo i le lalolagi fou, ona faatoʻā maua lea o nisi o mea e tatou te talosaga atu ai.

5. O le ā e silafia e Ieova pe a faafofoga mai i a tatou tatalo? Ia faamatala.

⁵ E silafia e Ieova le fesootaʻiga o mea e tatou te talosaga atu ai ma lona finagalo. (Isa. 55:​8, 9) O se tasi o vala o lona finagalo, o le faatumuina lea o le lalolagi i tane ma fafine e autasi e lagolagoina lana pulega. Ae na finau mai Satani e sili atu ona lelei pe a pulea e tagata i latou lava. (Kene. 3:​1-5) Ina ia faamaonia le pepelo o le finauga a Satani, na faataga ai e Ieova malo e pulea i latou lava. Peitaʻi, ua māfua le tele o faafitauli o loo tatou fesagaʻia i aso nei ona o pulega a tagata. (Fai. 8:9) Ua tatou iloa, e lē o le taimi lenei e aveesea ai e Ieova na faafitauli uma. Pe a ia faia faapea, e manatu ai nisi e aogā pulega a tagata ma e mafai ona latou foʻia faafitauli i le lalolagi.

6. Aiseā e tatou te mautinoa ai e tali e Ieova a tatou tatalo i se auala alofa ma tonu?

⁶ E eseese auala e ono tali mai ai e Ieova a tatou tatalo. O se faataʻitaʻiga, ina ua maʻi tigāina le tupu o Esekia, na ia ʻaiʻoi atu iā Ieova ina ia toe faafoʻisia lona malosi. Na tali mai Ieova e ala i le faamālōlōina o ia. (2 Tu. 20:​1-6) Peitaʻi, ina ua ʻaiʻoi atu le aposetolo o Paulo iā Ieova ina ia aveese le “mea matuitui i [lona] tino,” atonu o se maʻi tugā, e leʻi aveesea e Ieova lenā faafitauli. (2 Kori. 12:​7-9) Seʻi manatu foʻi i le mea na tupu i aposetolo o Iakopo ma Peteru. Na faamataʻuina i laʻua i le oti e le tupu o Herota. Na tatalo le faapotopotoga mo i laʻua. Peitaʻi, na fasiotia Iakopo ae laveaʻiina faavavega Peteru. (Galu. 12:​1-11) Atonu e tatou te tomānatu, ʻAiseā na laveaʻia ai e Ieova Peteru ae e lē laveaʻia Iakopo?’ E lē o taʻua i le Tusi Paia le māfuaaga.c Ae e tatou te mautinoa “e lē o iā [Ieova] se faiga lē tonu.” (Teu. 32:4) E tatou te iloa foʻi na maua e Peteru ma Iakopo le finagalo malie o Ieova. (Faaa. 21:14) E iai taimi e ono tutupu ai iā i tatou ni mea e tatou te leʻi faatalitalia. Talu ai e tatou te mautinoa e tali e Ieova a tatou tatalo i se auala alofa ma tonu, e tatou te lē fesiligia la le auala e filifili Ieova e tali ai a tatou tatalo.—Iopu 33:13.

7. O le ā e tatou te taumafai e ʻalofia, ma aiseā?

⁷ Ia tatou taumafai e ʻalofia le faatusatusa o o tatou tulaga i isi. O se faataʻitaʻiga, atonu e tatou te talosagaina le fesoasoani a Ieova i se auala patino ae e lē tali mai o ia. Ae tatou iloa mulimuli ane na talosaga se tasi i le mataupu lava lea, ma na foliga mai na tali e Ieova lenā tatalo. O le mea lenā na tupu i se tuafafine e igoa iā Anna. Na ia tatalo ina ia toe malosi lana tane o Matthew mai i le kanesa. I le taimi lava lenā, o loo tauivi foʻi ni tuafāfine matutua se toʻalua ma le kanesa. Na tatalo faatauanau Anna mo Matthew ma na tuafāfine. Na toe malolosi tuafāfine ae na maliu Matthew. I le taimi muamua, na tomānatu Anna pe na māfua ona malolosi nei tuafāfine ona o le fesoasoani a Ieova. Pe afai o lea, aiseā na lē tali ai e Ieova ana tatalo ina ia toe malosi lana tane? E lē mafai ona tatou iloa le māfuaaga na toe malolosi ai na tuafāfine. Ae e tatou te iloa e iai le vaifofō tumau a Ieova mo o tatou mafatiaga uma, ma e naunau o ia e faatutūina ana uō ua maliliu.—Iopu 14:15.

8. (a) E tusa ai ma le Isaia 43:​2, e faapefea ona fesoasoani mai Ieova iā i tatou? (e) E faapefea ona fesoasoani le tatalo iā i tatou e fesagaʻia ai faafitauli ogaoga? (Tagaʻi i le vitiō E Fesoasoani le Tatalo e Fesagaʻia ai Faigatā.)

⁸ E fesoasoani mai pea Ieova iā i tatou. Talu ai o Ieova o se Tamā alofa, e lē fia silasila mai la o ia o loo tatou mafatia. (Isa. 63:9) Ae e na te lē taofia le oo mai o faafitauli iā i tatou, lea e pei o ni vaitafe po o le afi. (Faitau le Isaia 43:2.) Peitaʻi, ua ia folafola mai o le a ia fesoasoani mai ina ia mafai ona tatou “sopoʻia” na faafitauli. E na te lē faatagaina na faafitauli ina ia tatou mafatia ai e faavavau. E foaʻi mai foʻi e Ieova lona agaga paia iā i tatou ina ia tatou tumau ai. (Luka 11:13; Fili. 4:13) O lea, e tatou te mautinoa ai e foaʻi mai pea e Ieova mea tonu e tatou te manaʻomia, ina ia tatou tumau ma faamaoni ai pea iā te ia.d

O LE Ā E FAATALITALIA E IEOVA MAI IĀ I TATOU?

9. E tusa ai ma le Iakopo 1:​6, 7, aiseā e ao ai ona tatou mautinoa o le a fesoasoani mai Ieova?

⁹ E faatalitalia e Ieova i tatou ina ia maufaatuatuaina o ia. (Epe. 11:6) E iai taimi e lofitūina ai i tatou i faafitauli ogaoga. E tatou te ono masalosalo ai po o le a fesoasoani mai Ieova iā i tatou. Ae ua faamautinoa mai e le Tusi Paia, e mafai ona tatou “aʻea le pā” ona o le mana o le Atua. (Sala. 18:29) O lea, nai lo o le lolo atu i o tatou masalosaloga, e tatau ona tatou tatalo ma le faatuatua atoatoa o le a tali mai Ieova i a tatou tatalo.—Faitau le Iakopo 1:​6, 7.

10. Aumai se faataʻitaʻiga o le auala e tatou te gaoioi ai e ōgatusa ma a tatou tatalo.

¹⁰ E faatalitalia e Ieova i tatou ina ia gaoioi e ōgatusa ma a tatou tatalo. O se faataʻitaʻiga, atonu e talosaga atu se uso iā Ieova mo le fesoasoani, ina ia faataga o ia e le pule o le galuega e auai i se tauaofiaga. O le ā le auala e ono tali ai Ieova i lenā tatalo? Atonu e foaʻi e Ieova le lototele i le uso e talanoa atu ai i lana pule. Ae e tatau ona gaoioi le uso e ōgatusa ma lana tatalo. Atonu e tele taimi e manaʻomia ona ia talosaga atu ai i le pule o le galuega. E ono talosaga atu foʻi o ia i le pule ina ia fesuiaʻi la aso faigaluega ma se isi tagata. Ae pe a manaʻomia, atonu e talosaga atu le uso i lana pule e fai sona aso mālōlō ae e lē totogia.

11. Aiseā e tatau ai ona tatou tatalo e lē aunoa i mea e tatou te popole ai?

¹¹ E faatalitalia e Ieova i tatou e tatalo atu e lē aunoa i mea e tatou te popole ai. (1 Tesa. 5:17) Na faailoa mai e Iesu e lē vave tali mai Ieova i nisi o a tatou tatalo. (Luka 11:9) O lea, aua le faavaivai! Ia tatalo faatauanau ma ia faia e lē aunoa. (Luka 18:​1-7) Pe a tatou tatalo pea iā Ieova e faatatau i se mataupu, e faailoa atu ai iā te ia e matuā tāua iā i tatou lenā mataupu. E faailoa atu ai foʻi e tatou te mautinoa e mafai ona ia fesoasoani iā i tatou.

AISEĀ E MANAʻOMIA AI ONA TOE FETUUNAʻI NISI O MEA E TALOSAGA ATU AI?

12. (a) O le ā se fesili e faatatau i a tatou tatalo e ao ona fesili ifo ai, ma aiseā? (e) E faapefea ona faamautinoa e faaalia i a tatou tatalo le faaaloalo iā Ieova? (Tagaʻi i le pusa “Po o Faaalia i Aʻu Tatalo Loʻu Faaaloalo iā Ieova?”)

¹² Pe a lē tali mai Ieova i a tatou tatalo, ia fesili ifo. Muamua, ʻPo o saʻo le mataupu o loo oʻu tatalo atu ai?’ E masani ona tatou manatu, e tatou te iloa le mea e sili mo i tatou. Ae o mea e tatou te talosaga atu ai atonu e lē umi ona aogā iā i tatou. Pe a tatou tatalo e faatatau i se faafitauli, atonu e iai se vaifofō e sili atu nai lo o le mea o loo tatou talosaga atu ai. O nisi mea e tatou te talosaga atu ai, atonu e lē ōgatusa ma le finagalo o Ieova. (1 Ioa. 5:14) Mātau le faataʻitaʻiga i mātua lea na taʻua i le amataga. Na la talosaga atu mo le fesoasoani a Ieova ina ia tumau pea le la tama i le upu moni. E foliga mai e talafeagai lenā talosaga. Peitaʻi, e lē faamalosia e Ieova i tatou e auauna iā te ia. E finagalo o ia ina ia filifili tagata uma e aofia ai ma tamaiti e tapuaʻi iā te ia. (Teu. 10:​12, 13; 30:​19, 20) Nai lo o lea, e mafai ona talosaga atu mātua iā Ieova ina ia fesoasoani iā i laʻua e pāʻia le loto o le la tama, ina ia uunaʻia ai o ia e alofa iā Ieova ma avea ma ana uō.—Faata. 22:6; Efe. 6:4.

13. E tusa ai ma le Eperu 4:​16, o le ā le taimi e fesoasoani mai ai Ieova? Ia faamatala.

¹³ O le fesili lona lua, ʻPo ua oo i le taimi a Ieova e tali mai ai i aʻu tatalo?’ Atonu e tatou te manatu e manaʻomia ona vave tali mai a tatou tatalo. O le mea moni e silafia e Ieova le taimi sili ona lelei e tali mai ai. (Faitau le Eperu 4:16.) Pe a lē vave ona tali mai Ieova i a tatou tatalo, e tatou te ono manatu ai e na te lē taliina a tatou tatalo. Peitaʻi, atonu e lē o le taimi lenā ua filifili Ieova e tali mai ai. Seʻi toe mafaufau i le uso talavou na taʻua i le amataga, lea na tatalo ina ia toe malosi lona maʻi. Pe ana faavavega ona faamālōlō e Ieova lona maʻi, atonu la e finau mai Satani e na o le pau le māfuaaga e auauna ai pea lenā uso iā Ieova ona ua faamālōlōina lona maʻi. (Iopu 1:​9-11; 2:4) E lē gata i lea, ua faatulaga e Ieova le taimi e aveesea atoatoa ai maʻi. (Isa. 33:24; Faaa. 21:​3, 4) O lea la, e tatou te lē faatalitalia i le taimi lenei le faamālōlōina faavavega o o tatou maʻi. E mafai la ona talosaga atu le uso iā Ieova ina ia foaʻi atu iā te ia le malosi ma le filemu o le mafaufau, e onosaia ai lona maʻi ma auauna ai pea ma le faamaoni i le Atua.—Sala. 29:11.

14. O le ā e te aʻoaʻoina mai i le mea na tupu iā Janice?

¹⁴ Manatua le mea na tupu iā Janice lea na tatalo e fia auauna i le Peteli. I le lima tausaga mulimuli ane ai, faatoʻā ia malamalama i le auala na tali ai e Ieova lana tatalo. Na ia faapea mai: “Na aʻoaʻo aʻu e Ieova i lenā taimi ma fesoasoani mai e faaleleia oʻu uiga. Na manaʻomia ona faamalosia loʻu maufaatuatuaina o ia. Na manaʻomia foʻi ona faaleleia le auala e faia ai aʻu lava suʻesuʻega. Na tatau foʻi ona ou atiaʻe le fiafia moni lea e lē faalagolago i o tatou tulaga.” Mulimuli ane, na valaaulia Janice ma lana tane e auauna i le galuega femalagaaʻi. Na toe faapea mai Janice: “Na tali e Ieova aʻu tatalo i se auala ou te leʻi faatalitalia. Na umi se taimi faatoʻā ou malamalama i le mataʻina o le auala na tali mai ai Ieova, ma ou te matuā lotofaafetai i lona alofa ma lona agalelei.”

15. Aiseā e lē manaʻomia ai ona patino a tatou tatalo i taimi uma? (Tagaʻi foʻi i ata.)

¹⁵ O le fesili lona tolu, ʻPe e iai se isi mea e tatau ona ou tatalo atu ai?’ O se mea lelei le patino o mea e tatalo atu ai, ae o nisi taimi atonu e sili ona lelei pe a lē patino a tatou tatalo, ina ia mafai ai ona tatou iloa le finagalo o Ieova mo i tatou. Seʻi manatu i le tuafafine nofofua lea na tatalo e fia auai i le Aʻoga mo Tagata Talaʻi o le Malo. O le māfuaaga na ia manaʻo ai e auai i le aʻoga, ina ia auauna i le mea o loo telē ai le manaʻoga. O lea, a o tatalo pea o ia ina ia mafai ona auai i le aʻoga, sa mafai foʻi ona ia tatalo atu mo le fesoasoani a Ieova ina ia iloa isi auala e faalautele atu ai lana auaunaga. (Galu. 16:​9, 10) E ao foʻi ona ia gaoioi e ōgatusa ma lana tatalo, e ala i le talosaga atu i le ovasia o le matagaluega pe iai se faapotopotoga lata ane o loo manaʻomia ai nisi paeonia. E mafai foʻi ona ia tusi atu i le ofisa o le lālā, pe e iai se vaipanoa o loo manaʻomia ai nisi tagata talaʻi.e

16. O le ā ua tatou mautinoa i ai?

¹⁶ E pei ona tatou talanoaina, e tatou te mautinoa o le a tali e Ieova a tatou tatalo i se auala alofa ma tonu. (Sala. 4:3; Isa. 30:18) O nisi taimi e lē tali mai Ieova i le auala na tatou faatalitalia. Ae e lē mafai ona faataligatuli Ieova i a tatou tatalo. E matuā alofa o ia iā i tatou ma e na te lē tuulafoaʻia i tatou. (Sala. 9:10) O lea, ia faaauau ona “faatuatua atu iā te ia i taimi uma,” ma sasaa atu o tatou loto iā te ia i le tatalo.—Sala. 62:8.