O Molimau Kerisiano ma le Nuu Moni i le Lagi
“A o lo tatou nuu moni ua i le lagi lea.”—FILIPI 3:20.
1. O le ā le fuafuaga ofoofogia ua i ai ia Ieova e tusa ai ma nisi o tagata?
O NI tagata ua fananau mai i le lalolagi o le a pule o ni tupu ma ositaulaga i le lagi, e pule foi i agelu. (1 Korinito 6:2, 3; Faaaliga 20:6) Maeu le ofoofogia o lena upu moni! E ui i lea, na fuafuaina e Ieova lena mea, ma ua ia faataunuuina e ala i lona Alo pele e toatasi o Iesu Keriso. Aisea ua faia ai faapea e Lē na Foafoaina i tatou? Ma e faapefea i le iloaina o lea mea ona aafia ai se Kerisiano i aso nei? Seʻi o tatou tagai i ai pe o taliina faapefea e le Tusi Paia nei fesili.
2. O le ā le mea fou na folafola atu e Ioane le Papatiso o le a faapea ona faia e Iesu, ma o le ā na fesootai atu i ai lenei mea fou?
2 A o saunia e Ioane le Papatiso le ala mo Iesu, na ia folafola ai le faia e Iesu o se mea fou. Ua faapea mai le tala: “Ua talaʻi atu ia [o Ioane lea], ua faapea atu, ‘O loo mulimuli mai le tasi, e silisili o ia ia te au, ou te le aoga aʻu e punou ifo ma tatala le nonoa o ona seevae. O aʻu nei, ua ou papatiso atu ia te outou i le vai; a o ia, na te papatisoina outou i le Agaga Paia.’” (Mareko 1:7, 8) A o lei oo ane i lena taimi, sa lei i ai lava se tasi ua papatisoina i le agaga paia. O se fuafuaga fou lenei mea e aafia ai le agaga paia, ma e fesootai atu i le fuafuaga a Ieova sa toeitiiti faaalia, o le saunia lea o tagata mo le pulega faalelagi.
“Toe Fanau”
3. O ā mea fou e faatatau i le Malo o le lagi na faamatala atu e Iesu ia Nikotemo?
3 I se faatasiga faalilolilo ma se Faresaio lauiloa, na faailoa atili atu ai e Iesu nisi mea e faatatau i lenei fuafuaga tauatua. Na alu atu le Faresaio o Nikotemo ia Iesu i le po, ma na fetalai atu Iesu ia te ia e faapea: “A le toe fanau le tagata, e le mafai ona iloa e ia o le malo o le Atua.” (Ioane 3:3) O Nikotemo o se Faresaio na suesueina Tusitusiga Paia Eperu, o lea sa malamalama ai i ni mea e faatatau i le upu moni ofoofogia o le Malo o le Atua. Na valoia mai e le tusi o Tanielu e faapea o le Malo o le a foaiina atu i “Lē e pei o le Atalii o le tagata,” ma i “le nuu o le au paia a lē Silisili ese.” (Tanielu 7:13, 14, 27) O lea Malo na te “tuʻimomomoina ma faaumatia” isi malo uma lava, ma e tumau e faavavau. (Tanielu 2:44) E foliga mai, na manatu Nikotemo o nei valoaga o le a faataunuuina i le malo o Iutaia; a e na fetalai Iesu e faapea ina ia vaai i le Malo, e tatau ona toe fanau se tasi. Sa lei malamalama Nikotemo, o lea na toe fetalai atu ai Iesu: “Afai e le fanau se tasi i le vai ma le Agaga, e le mafai ona sao o ia i le malo o le Atua.”—Ioane 3:5.
4. Mo i latou e fanau mai i le agaga paia, o le a faapefea ona suia la latou faiā ma Ieova?
4 Na taʻua e Ioane le Papatiso le papatisoga i le agaga paia. A e i lea taimi, ua faaopoopo atu ai Iesu e faapea e tatau i se tasi ona fanau mai i le agaga paia ina ia ulu atu ai i le Malo o le Atua. E ala i lenei fanauga tulagaese, e ulu atu ai tane ma fafine le lelei atoatoa i se faiā faapitoa ma Ieova le Atua. Ua avea ai i latou ma ana fanau fai. Ua tatou faitau i ai e faapea: “A o i latou uma e na talia o ia [Iesu], ma faatuatua i lona suafa, na ia avatu i ai o lea manuia, ia avea i latou ma fanau a le Atua. O i latou, e le o le toto na fanau ai, e le o le manao foi o le tino, e le o le loto foi o le tagata, a o le Atua lava.”—Ioane 1:12, 13; Roma 8:15.
Fanau a le Atua
5. O anafea na papatisoina ai soo faamaoni i le agaga paia, ma o ā gaoioiga e fesootai atu i le agaga paia na tupu i lea lava taimi?
5 E fetalai Iesu ia Nikotemo a e ua uma ona afio ifo le agaga paia ia Iesu ma faauuina ai o ia mo lona tofiga tau tupu i le lumanai i le Malo o le Atua, ma ua faailoa atu e le Atua i tagata lautele o Iesu o Lona Alo. (Mataio 3:16, 17) Na fanauagagaina e Ieova nisi fanau faaleagaga i le Penetekoso 33 T.A. O soo faamaoni na potopoto i le potu aupitoaluga i Ierusalema na papatisoina i le agaga paia. I le taimi lava lea e tasi, na toe fanauina ai i latou mai le agaga paia ina ia avea ma atalii faaleagaga o le Atua. (Galuega 2:2-4, 38; Roma 8:15) E le gata i lea, na faauuina i latou i le agaga paia ma se fuafuaga o le mauaina o se tofi faalelagi i le lumanai, ma na muai faamaufaailogaina ai i latou i le agaga paia o se vaega o le faamautinoaina o lena faamoemoega faalelagi.—2 Korinito 1:21, 22.
6. O le ā le fuafuaga a Ieova e tusa ai ma le Malo faalelagi, ma aisea ua talafeagai ai mo tagata ona faia ai se vaega i lenei mea?
6 O tagata muamua le lelei atoatoa nei ua filifilia e le Atua ina ia ulu atu i le Malo. O lona uiga pe a mavae lo latou maliliu ma toe faatutuina aʻe, ona avea ai lea o se vaega o le faalapotopotoga o le Malo faalelagi o le a faapea ona pule i tagata ma agelu. Ua fuafuaina e Ieova e faapea e ala mai i lenei Malo, o le a faapaiaina ai lona suafa silisili ma faaeaina ai lana pule silisili ese i luma o ana foafoaga uma lava. (Mataio 6:9, 10; Ioane 12:28) Maeu le fetaui o le faia ai o se vaega a tagata i lena Malo! Na faaaogā e Satani tagata ina ua ia lāgā lana uluai luʻi faasaga i le pule silisili ese a Ieova i tuā i le faatoaga i Etena, ma o lea ua fuafuaina ai e Ieova o le a faapea ona aofia ai tagata i le taliina o lena luʻi. (Kenese 3:1-6; Ioane 8:44) Na tusi le aposetolo o Peteru i sui taitoatasi ua filifilia e pule i lena Malo e faapea: “Ia faafetaia le Atua, le Tamā o lo tatou Alii o Iesu Keriso, o le na fanaufouina i tatou ona o lona alofa tele, ina ia iu i le faamoemoe ua ola, i le toe tu mai o Iesu Keriso nai e ua oti, ia iu i le tofi e le pala, e leai se leaga o i ai, e le mamae lava, o loo teu i le lagi mo outou.”—1 Peteru 1:3, 4.
7. O le ā le faiā tutasi ma Iesu ua olioli ai i latou ua papatisoina i le agaga paia?
7 I le avea ma atalii fai faaleagaga o le Atua, ua avea ai nei Kerisiano ua filifilia ma uso o Iesu Keriso. (Roma 8:16, 17; 9:4, 26; Eperu 2:11) Ona ua faamaonia le avea o Iesu ma Fanau na folafolaina atu ia Aperaamo, o nei la Kerisiano faauuina i le agaga ua avea o se aumea po o se vaega lagolago, o lena Fanau, o le a faapea ona faamautinoa mai ai faamanuiaga i tagata talitonu. (Kenese 22:17, 18; Kalatia 3:16, 26, 29) O le ā le faamanuiaga? O le avanoa e tuusaoloto ai mai le agasala i se leleiga ma le Atua ma i le auauna atu ia te ia i le taimi nei ma oo i le faavavau. (Mataio 4:23; 20:28; Ioane 3:16, 36; 1 Ioane 2:1, 2) O Kerisiano faauuina o i le lalolagi latou te tataʻi atu ē loto faamaoni i lenei faamanuiaga, e ala i le molimau atu i lo latou uso faaleagaga o Iesu Keriso ma lo latou Tamā fai o Ieova le Atua.—Galuega 1:8; Eperu 13:15.
8. O le ā le “faaalia mai” o atalii fanauagagaina o le Atua?
8 Ua taʻua e le Tusi Paia le “faaalia mai” o nei atalii fanauagagaina o le Atua. (Roma 8:19) O lo latou ulu atu i le Malo i le avea o ni tupu lagolago ma Iesu, ua faapea ai ona faia sa latou vaega i le faatafunaina o le faiga o mea o le lalolagi a Satani. Ona mulimuli ane lea, e afe tausaga o le a latou fesoasoani ai i le faaooina mai o aogā o le taulaga togiola i tagata ma siitia ai tagata i le lelei atoatoa lea na leiloa ia Atamu. (2 Tesalonia 1:8-10; Faaaliga 2:26, 27; 20:6; 22:1, 2) O lo latou faaalia mai e aofia ai mea uma ia na taʻua i luga. O se mea ua faapea ona faatalitalia ma le naunautai e le foafoaga faaletagata faatuatua.
9. Ua faapefea ona faasino atu le Tusi Paia i le vaega o Kerisiano faauuina i le lalolagi aoao?
9 O le vaega atoa o Kerisiano faauuina i le lalolagi aoao o “le faapotopotoga o le au ulumatua [o] e ua tusia i le lagi.” (Eperu 12:23) O i latou ia e mauaina muamua aogā o le taulaga togiola a Iesu. O i latou foi o le “tino o Keriso,” ua faapea ona faaalia ai lo latou faiā vavalalata o le tasi i le isi ma faapea foi ma Iesu. (1 Korinito 12:27) Na tusi Paulo e faapea: “Auā pei o le tino ua tasi ia, ma ona itu tino e tele, a o itu tino uma, e ui ina tele, o le tino e tasi lava ia e faapea lava Keriso. Auā foi o le Agaga e toatasi na papatisoina ai i tatou uma i le tino e tasi, po o Iutaia, po o Eleni, po o pologa, po o saʻoloto; ma ua faainumia i tatou uma i le Agaga e toatasi.”—1 Korinito 12:12, 13; Roma 12:5; Efeso 1:22, 23; 3:6.
“Le Isaraelu o le Atua”
10, 11. I le uluai senituri, aisea na manaomia ai se Isaraelu fou, ma o ai i latou sa faia aʻe ai lenei nuu fou?
10 I le silia ma le 1,500 tausaga a o lei afio mai Iesu o le Mesia folafolaina, na avea ai le nuu faaletino o Isaraelu ma tagata faapitoa a Ieova. E ui ina lapataia soo, na faamaonia lava le lē faamaoni o le nuu atoa. Ina ua maliu mai Iesu, na teena o ia e le nuu. (Ioane 1:11) O lea, na fetalai atu ai Iesu i taʻitaʻi lotu Iutaia: “E aveesea le malo o le Atua ia te outou, a e tuuina atu i se nuu e au mai ai ona fua.” (Mataio 21:43) O le iloa o lena “nuu e au mai ai . . . fua [o le Malo]” e tāua lea mo le faaolataga.
11 O le nuu fou o le faapotopotoga Kerisiano faauuina lea, na fanau mai i le Penetekoso 33 T.A. O ona uluai sui o soo Iutaia o Iesu o ē na talia o ia o lo latou Tupu faalelagi. (Galuega 2:5, 32-36) E ui i lea, na avea i latou ma sui o le nuu fou o le Atua, e le māfua mai ona o lo latou tupuaga faa-Iutaia, a e e faavae i le faatuatua ia Iesu. O lea, ua faapea ai ona avea lenei Isaraelu fou o le Atua ma mea e tulagaese—o se nuu faaleagaga. Ina ua teena e le toatele o tagata Iutaia ia Iesu, ona tatalaina atu ai lea o le valaaulia ia Samaria ina ia avea ma vaega o le nuu fou ma mulimuli ane i Nuuese. Na taʻua le nuu fou o “le Isaraelu o le Atua.”—Kalatia 6:16.
12, 13. Na faapefea ona manino lelei mai o le Isaraelu fou sa le na o se vaega faalotu Iutaia?
12 I Isaraelu anamua, pe a avea tagata e le o ni Iutaia ma tagata talitonu, sa tatau ia i latou ona gauai atu i le Tulafono Faa-Mose, ma sa tatau i tane ona faailogaina lenei mea e ala i le peritomeina. (Esoto 12:48, 49) Na lagona e nisi Kerisiano Iutaia e faapea e tatau foi ona faatatau atu lea lava mea i tagata e le o ni Iutaia o i le Isaraelu o le Atua. Peitai ane, sa ese le mea na i le finagalo o Ieova. Na taʻitaʻiina e le agaga paia le aposetolo o Peteru i le fale o Konelio mai Nuuese. Ina ua gauai atu Konelio ma lona aiga i le talaʻiga a Peteru, ona latou mauaina ai lea o le agaga paia—a o lei papatisoina i latou i le vai. Na faaalia manino ai i lenei mea e faapea ua talia e Ieova nei tagata mai Nuuese o ni sui o le Isaraelu o le Atua e aunoa ma le faatonuina o i latou e tausi le Tulafono Faa-Mose.—Galuega 10:21-48.
13 Na faigata ona talia e nisi na talitonu lenei mea, ma e lei umi a e talanoaina loa lea o le mataupu atoa e aposetolo ma toeaina i Ierusalema. Na faalogo atu lena vaega pule i molimau e faatatau i le auala na galue ai le agaga paia i ē talitonu e le o ni Iutaia. O sailiiliga i le Tusi Paia na faaalia ai e faapea, o lenei mea o le faataunuuga lea o le valoaga faagaeeina. (Isaia 55:5; Amosa 9:11, 12) Ona latou taunuu ai lea i se faaiuga saʻo: O Kerisiano e le o ni Iutaia sa le manaomia fua ona tausia le Tulafono Faa-Mose. (Galuega 15:1, 6-29) O lea, na avea ai Isaraelu faaleagaga o se nuu fou moni lava, a e lē na o se vaega faalotu Iutaia.
14. O le ā ua faauiga i ai le taʻua e Iakopo o le faapotopotoga Kerisiano o “ituaiga e sefulu ma le lua ua faasalalauina”?
14 I le talafeagai ai ma lenei mea, ina ua tusi atu i Kerisiano faauuina o le uluai senituri, na faaautu atu ai le tusi a le soo o Iakopo “i itu aiga e sefulu ma le lua ua faasalalauina.” (Iakopo 1:1; Faaaliga 7:3-8) O le mea moni, o tagatanuu o le Isaraelu fou sa lei tofitofia i ni ituaiga faapitoa. Sa lei faavasegaina ia Isaraelu faaleagaga i ni vaega eseese faapitoa e 12 e pei ona sa i ai Isaraelu faaletino. E ui i lea, o faamatalaga faagaeeina a Iakopo ua faaalia ai e faapea, i le silasila a Ieova, o le Isaraelu o le Atua, ua na suia atoatoa ituaiga e 12 o Isaraelu i la le tino. Pe a avea se Isaraelu moni ma vaega o le nuu fou, o lona tupuaga—e tusa lava pe o ia e mai i le ituaiga o Iuta po o sa Levī—sa leai sona tāua.—Kalatia 3:28; Filipi 3:5, 6.
Se Feagaiga Fou
15, 16. (a) E faapefea ona silasila Ieova i sui e le o ni Iutaia o le Isaraelu o le Atua? (e) O le ā le faavae faaletulafono na faavaeina aʻe ai le Isaraelu fou?
15 I le silasila a Ieova, o sui o lenei nuu fou e le o ni Isaraelu, ua matuā atoatoa lo latou avea ma Iutaia faaleagaga! Na faamatala mai e le aposetolo o Paulo e faapea: “Auā e le o le Iutaia le ua vaaia, e le o le peritome foi le ua vaaia i le tino; a e peitai o le ua le vaaia, o le Iutaia lava lea; o le peritome foi, ua i le loto lea, o loo i la le agaga lea, e le o i la le tusi; o lona viiga e le mai tagata, a e mai le Atua.” (Roma 2:28, 29) E toatele tagata o Nuuese sa tali atu i le valaaulia ina ia avea ma vaega o le Isaraelu o le Atua, ma na faataunuuina ai e lenei mea le valoaga a le Tusi Paia. Mo se faataʻitaʻiga, na tusi faapea le perofeta o Hosea: “Ou te alofa foi i le sa le alofagia; ou te faapea atu foi i le ua le soʻu nuu, O loʻu nuu oe; ona latou faapea mai ai lea, O lo matou Atua.”—Hosea 2:23; Roma 11:25, 26.
16 Pe afai sa le i ai Isaraelu faaleagaga i lalo o le feagaiga o le Tulafono Faa-Mose, o le ā la le faavae na avea ai i latou ma vaega o le nuu fou? Na faia e Ieova se feagaiga fou ma lenei nuu faaleagaga e ala ia Iesu. (Eperu 9:15) Ina ua faavaeina e Iesu le Faamanatuga o lona maliu ia Nisani 14, 33 T.A, na ia tufaina atu ai areto ma uaina i aposetolo faamaoni e toʻa 11, ma fetalai atu e faapea o le uaina ua fai lea ma sui o le “toto o le feagaiga.” (Mataio 26:28; Ieremia 31:31-34) E pei ona faamatala mai i le tala a Luka, na fetalai Iesu e faapea o le ipu uaina ua fai ma sui “o le feagaiga fou.” (Luka 22:20) Na faataunuuina fetalaiga a Iesu ina ua liligiina ifo le agaga paia i le Penetekoso ma fanau mai ai le Isaraelu o le Atua, na aveesea ai loa le Malo mai ia Isaraelu faaletino ma tuuina atu i le nuu fou faaleagaga. Na avea ai loa lenei nuu fou ma auauna a Ieova, e faia aʻe i ana molimau, e sui ai Isaraelu i la le tino.—Isaia 43:10, 11.
“Ierusalema Fou”
17, 18. O ā faamatalaga ua aumaia i le tusi o Faaaliga e faamatalaina ai le mamalu o loo tatali mai mo Kerisiano faauuina?
17 Maeu le mamalu o loo tatali mai mo i latou ua faaeaina ina ia i ai i le valaau faalelagi! Ma, maeu le fiafia i le aʻoaʻoina o mea ofoofogia o loo tatali mai mo i latou! Ua aumaia e le tusi o Faaaliga ia i tatou ni ata e faagaeetia ai o lo latou tofi faalelagi. Mo se faataʻitaʻiga, i le Faaaliga 4:4, tatou te faitau ai e faapea: “Ua siosioina foi le nofoālii [o Ieova] e nofoālii e luafulu ma le fa; na ou iloa foi o toeaina e toaluafulu ma le toafa o tietie i ia nofoālii, ua oofu i ofu sisina; ua i o latou ulu foi o pale auro.” O toeaina nei e toʻa 24 o Kerisiano faauuina, ua toe faatutuina ma ua nofoia nei tulaga faalelagi na folafola atu e Ieova ia i latou. O o latou pale ma nofoālii ua faamanatu mai ai ia i tatou lo latou tulaga tau tupu. Manatu foi i lo latou faaeaga silisili ona maualuga, o le auauna atu o siosioina le nofoālii o Ieova!
18 Ua tatou maua foi se tasi vaaiga o i latou ia i le Faaaliga 14:1: “Na aʻu iloa, faauta foi, ua tu mai le Tamai Mamoe i le mauga o Siona, ua faatasi foi ma ia tagata e selau afe ma afe e fa sefulu ma le fa o afe, ua tusia le suafa o lona Tamā i o latou muaulu.” Ua tatou vaaia ai i inei se numera faatapulaaina o i latou nei faauuina—e 144,000. Ua matauina lo latou tulaga tau tupu ona e faapea o loo tutū i latou ma le Tupu faapaleina a Ieova, “le Tamai Mamoe,” o Iesu. Ma o loo i ai i latou i le Mauga o Siona faalelagi. O le Mauga o Siona i le lalolagi sa avea ma mea na tu ai Ierusalema, le aai tau tupu o Isaraelu. O le Mauga o Siona faalelagi ua fai ma sui o le tulaga faaeaina o Iesu ma ē ua faatasi atu e avea ma ona suli, o ē e faia aʻe ai le Ierusalema faalelagi.—2 Nofoaiga a Tupu 5:2; Salamo 2:6.
19, 20. (a) O le ā le faalapotopotoga faalelagi o le a avea ai Kerisiano faauuina ma vaega? (e) O le ā le umi o le vaitaimi na filifilia ai e Ieova i latou o lo latou nuu moni o le lagi lea?
19 I le talafeagai ai ma lenei mea, o lenei au faauuina i lo latou mamalu faalelagi, ua taʻua foi faapea o le “Ierusalema Fou.” (Faaaliga 21:2) O Ierusalema faalelalolagi sa avea ma “aai . . . a le Tupu silisili,” ma o i inā foi sa i ai le malumalu. (Mataio 5:35) O Ierusalema Fou faalelagi o le faalapotopotoga o le Malo tau tupu lea o le Alii Silisili ese o Ieova, ma lana Tupu tofiaina o Iesu, o loo pule nei, ma ua faapea foi ona faia ai auaunaga faaositaulaga a o tafe mai faamanuiaga tautele mai i le nofoālii o Ieova mo le faamaloloina o tagata. (Faaaliga 21:10, 11; 22:1-5) I se tasi vaaiga, na faalogo ai Ioane ua faatatau atu i Kerisiano faauuina faamaoni ua toe faatutuina e faapea ‘o le faletua o le Tamai Mamoe.’ Maeu se faatusaga mafana ua aumaia e lenei mea i le vavalalata o le a latou olioli ai ma Iesu ma lo latou naunau atu e usiusitai ia te ia! Manatu i le olioli e i ai i le lagi pe a maua e le sui mulimuli o i latou lona taui faalelagi. I le taimi lea, ona faia ai loa lea o “le tausamaaga [faaipoipoga] o le Tamai Mamoe”! Ona faaatoatoaina ai loa lea o lena faalapotopotoga faalelagi faamaoni.—Faaaliga 19:6-8.
20 Ioe, o faamanuiaga ofoofogia o loo teuina mo i latou o ē na tusi faatatau i ai le aposetolo o Paulo e faapea: “A o lo tatou nuu moni ua i le lagi lea.” (Filipi 3:20) Ua toeitiiti lava luaafe tausaga o filifilia ai e Ieova lana fanau faaleagaga ma sauniunia i latou mo lo latou tofi faalelagi. E tusa ai ma faamaoniga uma lava, ua toeitiiti nei ona faamaʻeaina lea o lenei galuega o le filifilia ma le sauniunia o i latou ia. A e tele nisi mea e sosoo mai ai, e pei ona faailoa atu ia Ioane i lana vaaiga ua faamauina i le Faaaliga mataupu e 7. O le taimi nei la, e i ai se isi vaega o Kerisiano e manaomia ona tatou uai atu i ai, ma o le a tatou talanoaina lenei vaega i le mataupu o sosoo mai.
Pe E te Manatua?
◻ O ā gaoioiga eseese a le agaga paia ia i latou e i ai se tofi faalelagi?
◻ O le ā le faiā vavalalata o olioli ai ē faauuina ma Ieova? ma Iesu?
◻ O faapefea ona faamatala mai i le Tusi Paia le faapotopotoga o Kerisiano faauuina?
◻ O le ā le faavae faaletulafono na faavaeina aʻe ai le Isaraelu o le Atua?
◻ O ā faaeaga faalelagi o tatali mai mo Kerisiano faauuina?
[Ata i le itulau 10]
O se vaitaimi toeitiiti lava luaafe tausaga, na filifilia ai e Ieova i latou o ē o le a pule i le Malo faalelagi