Totō ma Faasūsū—O ni Laasaga i le Faia o Soʻo
1 “Na ou totōina, na faasūsūina e Apolo; a e peitai o le Atua ua faatupuina.” (1 Kori. 3:6) Ua faailoa mai e le aposetolo o Paulo laasaga faavae e tolu i le faagasologa o le faia o soʻo o Keriso. E aofia ai i uluai laasaga e lua, o le totōina ma le faasūsūina, se faaeaga ma se avega tauave ua lafo mai i auauna tuuina atu, ma papatisoina a le Atua.
2 Ua manaomia ai i lenei mea ona talaʻi atu i le lautele, ma i lea fale ma lea fale, lē fuafuaina, ma i isi auala. E aofia ai foi le aʻoaʻoina faasolosolo o tagata ia tausi i mea uma na poloaia e Iesu. (Mata. 28:19,20) O lea laasaga mulimuli na pau le auala e mafai ai ona faatino o le faia lea o toe asiga ia i latou e faaalia le naunau, faaauai i latou i talanoaga faale-Tusi Paia, ma faafoeina ni suesuega faale-Tusi Paia ma i latou. O e faamaonia ea oe o se aumea faigaluega faamaoni, e felagolagomai ma Ieova i le totōina o fatu o le upu moni ma mulimuli ane ai faasūsūina ma galueaiina e pei ona tatau ai?—1 Kori. 3:9.
ILOATINO IʻUGA MA MANAOGA
3 I le tausaga faaleauaunaga 1990 i Amerika Samoa ma Samoa i Sisifo, na matou tufatufaina ai le silia i le 19,000 tusi ma tamaʻi tusi ma e latalata i le 80,000 mekasini! E silia foi i le 1,300 tagata na auai i le Faamanatuga, ua sili mamao ai i le tuu faatatau o tagata talaʻi e 385 mo le tausaga. O le tufatufaina o lomiga o se vaega atoa lea o le itu tau totōina o la tatou galuega. O lea o fatu o le upu moni ua lūlūina e faalagolago i ai se iʻuga ofoofogia mo le aumaia o ni soʻo fou, ae pe o tatou lagona ea le uunaia i le avea ma aumea faigaluega a le Atua, e toe asia na tagata ma galueaiina lo latou naunau i mataupu o le Tusi Paia? O le tuu faatatau o suesuega faale-Tusi Paia a tagata talaʻi o faapotopotoga i Samoa uma e lua e 0.7. Matou te mautinoa o le a faaleleia lenei tuu faatatau pe afai e fuafua atili e tagata talaʻi taitoatasi lana avega tauave ia faia e sili atu i le uluai laasaga o le na ona totōina o fatu o le upu moni ma aapa atu e faafoeina ni suesuega faale-Tusi Paia agaʻigaʻi i luma. E ui ina, atonu e lē mafai e nisi ona faafoe ni suesuega faale-Tusi Paia i aiga se tasi pe sili atu foi ona o tapulaa eseese, ae o se mea lelei mo tagata taitoatasi ona toe autaluina ona lava aiaiga totino.
4 O se mea e fiafia ai le matauina o mea o loo tutupu i nisi o nofoaga. E iai faapotopotoga o loo fuatele mai a latou oganuu ma ua lipotia ai se tuu faatatau e mai le tasi i le lua suesuega faale-Tusi Paia a le tagata talaʻi e toatasi. O le faatelega i soʻo fou, e fua faatatau i le aofai o suesuega faale-Tusi Paia sa faafoeina. E mafai ona matauina lea i le faatusatusaina o le tuu faatatau o le aofai o tagata talaʻi ma le aofaiga o suesuega faale-Tusi Paia i atunuu eseese e pei ona lipotia mai i le 1991 Yearbook.
5 O la tatou mafuaaga mo le faafoeina o suesuega faale-Tusi Paia e ao ona o lo tatou alofa mo tagata o ē talilelei mai i le feau o le Malo o loo tatou talaʻia. E tatau ona tatou fetufaaia ma le faamaoni le alofa ma le manatu mamafa o Ieova mo tagata ma talisapaia faapea e fesootai lo latou faaolataga ma le tuputupu aʻe faaleagaga. (1 Pete. 2:2) E pei lava ona manaomia e laau moʻi le vai e tausia ai lo latou tuputupu aʻe, e faapena foi i tagata o ē faaalia se uluai naunau i le feau o le Malo e lē teʻi a ua amata ona auai i sauniga seʻi vaganā ua ala mai i suesuega faale-Tusi Paia i aiga e tataʻia ai pea i latou i le faalapotopotoga a le Atua.
6 Ua aofia ai foi le usiusitai i la tatou vaega. Na fetalai Iesu faapea o i latou e i le itu a le upu moni e faalogo atu i lona leo. (Ioane 18:37) Sa ia poloaia ona soʻo e talaʻi ma aʻoaʻo atu, ma na ia faaauupegaina i latou e tauaveina lena galuega. I lana faaaʻoaʻoga matilatila o se faiaʻoga ma i lona manatu mamafa i tagata, na faataatia ai e Iesu se faaaʻoaʻoga tatou te mulimuli ai i le fesoasoani atu i isi. (Luka 6:40; Ioane 13:13; 14:12) E mafai ona saosaolaumea a tatou taumafaiga i lo tatou lava faaolataga atoa ma isi tatou te aʻoaʻoina.—1 Timo. 4:16.
FESOASOANI MO LE AMATAINA O SUESUEGA FAALE-TUSI PAIA
7 Ina ia lelei atoatoa lana galuega, e filifilia e se tagata tusiata tomai ana meafaigaluega mai le matalasi o lana faaputuga o loo iai. I le avea ma faiaʻoga, o loo iai i la tatou faaputuga le anoanoai o lomiga, e aofia ai polosiua ma sāvali, ua fuafuaina e pei o ni meafaigaluega e fesoasoani ai ia i tatou e pāʻia loto o tagata e eseese o latou talaaga ma manatunatuga.
8 Ua tofo nisi tagata talaʻi i iʻuga lelei i le faaaogāina o sāvali ma polosiua e faatomua ai talanoaga faale-Tusi Paia. Mo se faaaʻoaʻoga, ua sii mai pe ua oto mai e le sāvali Olaga i se Lalolagi Fou Filemu le silia i le 20 mau eseese i le faailoaina mai o lenei faamoemoe ofoofogia. E mafai ona faaaogā ia mau e atiina aʻe ai nisi o talanoaga faagaeetia faale-Tusi Paia. E mafai foi i a tatou polosiua, i se auala faatosina ma le faigofie, ona faamasani ai tagata ma upu moni faavae o le Tusi Paia ma faagaee ai i latou e suesue atili.
9 E te iloa ea se tasi e faalelava lana aʻoaʻoga pe faaletonu lana vaai? Ua e taumafai ea e faaaogā le polosiua Olioli i Le Ola i Le Lalolagi e Faavavau! e faavae ai se talanoaga faale-Tusi Paia agaʻigaʻi i luma ma se tagata faapena? O le polosiua “Faauta!” o se isi lea o meafaigaluega lelei o loo iai palakalafa amata e faaaofia ai ma le tomai lē ona le fale e aʻoaʻo e uiga i folafolaga a le Atua mo le lumanai. Ma e mautinoa lava ua fesoasoani ma le uigā le tusi E Mafai ona E Ola e Faavavau i Parataiso i Le Lalolagi, na tatalaina i le 1982, i se vaega tele e silia i le 1,700,000 ua papatisoina talu mai lena taimi.
GAOIOI TAUNAPA AGAʻI I Ē FIAFIA
10 Atonu o le a e iloa le aogā o le vaai i lau pepa Faamaumau a le Tagata Talaʻi o le Faapotopotoga [Congregation’s Publisher Record] ma matau le aofai o tusi, tamaʻi tusi (e aofia ai polosiua), ma mekasini na e ofoina i le 12 masina ua mavae. Na faamuta ai ea i inā na lomiga sa tuua? Pe na e laa atu i le laasaga o le totōina? Ia i latou o ē sa faaalia le naunau e ave nisi o a tatou lomiga, e toafia na e toe vave faafesootaia? Pe na e toe foi e vaai po ua totogo aʻe le fatu na e totōina? Pe na e tuliloaina e faasūsū e pei ona manaomia ma tatalo ia Ieova ina ia faatupuina?—Faatusatusa Galuega 16:14 ma le 2 Tesalonia 3:1.
11 Atonu ua e lē faia ni toe asiga po o se suesuega faale-Tusi Paia ona ua e faapea e itiiti lou tomai. Peitai, ua mafua lea ona o lou lava manatu na i lo le itiiti o lou tomai. E lē aauina atu lava e Ieova ona tagata e faia se galuega e aunoa ma le lava faaauupegaina ma le faaagavaaina o i latou. I lana Afioga paia ma lana faalapotopotoga, ua ia sauniunia ai i tatou mo “galuega lelei uma lava.” (2 Timo. 3:16, 17; 2 Kori. 3:5, 6) E ala i le agaga paia, lomiga, ma faatonuga tuugutu ma faataʻitaʻiga mai le pulelaa, ae lē tāea ai faaaʻoaʻoga ola a auauna tomai ma tuutoina atu ua sauni e fesoasoani ia i tatou, ua Ia aumaia ai ia i tatou le mea tatou te manaomia. Tatou te lē manaomia ni aʻoaʻoga maualuluga a le lalolagi ina ia faafoe ai se suesuega faale-Tusi Paia. Ae tatou te manaomia ona tali atu i le aʻoaʻoga faaleagaga aupito sili ua aumaia e ala i le faalapotopotoga a Ieova.—Faatusatusa Galuega 4:13.
12 E manaomia ona faatatauina totino mea ua saunia i La Tatou Faiva o le Malo, le Aʻoga o le Faiva Faatiokarate, Sauniga o le Auaunaga, ma isi vala o aʻoaʻoga. Na tuu saʻo atu le faamatalaga a le aposetolo o Paulo i Kerisiano i Eperu: “Auā foi ana fai outou ma aʻoaʻo po ua tatau ai ina ua leva, a e ao ina toe aʻoaʻoina outou e se tasi i mataupu muamua o le afioga a le Atua.” (Epe. 5:12) Ua faatalitalia se tagata e galue i se matātā mo ni tausaga na te maua sina tomai i le faaaogāina o ana meafaigaluega. O le agaʻigaʻi i luma i le aʻoaʻoina o le auala e faia ai ni talanoaga faale-Tusi Paia, e faamaonia lea pe a tatou faaalia le naunau faamaoni ma tuu faamuamua se taumafaiga tinoū.—Faata. 12:24; 22:29.
13 O le toe asiasi atu ma talanoaina atili ni mataupu faale-Tusi Paia ma i latou o ē e faaalia le naunau i le feau o le Malo e alu ai le taimi ma se taumafaiga. Ae e ao ona tatou talisapaia faapea o lo tatou iai i le upu moni o se faaaliga lea o le alofa ma le agalelei faifua o Ieova. Na faaalia lea e ala i se tasi na faaaluina le tele o itula e aʻoaʻoina ai ma le onosai i tatou i le upu moni. E faapena foi, e ao i le alofa ona uunaia ai i tatou e faatau mai le taimi e manaomia ma tuutoina atu i lenei galuega e sili ona tāua o le faia o soʻo.—2 Kori. 5:14, 15; Efe. 5:15, 16.
14 E tele faapotopotoga ua mulimuli i le fautuaga a le Sosaiete i le faia o faatatauga mo le molimau atu i le afiafi. E masani lava ona avea uluai itula o le afiafi o se taimi lelei i le faia o toe asiga ia i latou o ē e faaalia le naunau. E manaomia se faamaumauga o fale ua saunia ai faamatalaga maʻoti e uiga i se tasi na molimau i ai, mo le faia o ni toe asiga uigā ma faamaite ai ni talanoaga faale-Tusi Paia. Aua le fafao soloa na faamaumauga i se tusi po o i le Tusi Paia ma galo ai. O le faagaloina o le faia o se toe asiga seia oo i ni vaiaso mulimuli ane e te oo atu ai i lena vaipanoa, ua tuu saunoa ai se tagata e asia e sui o Satani, o ē e fiafia i le puʻevaeina o mea atonu ua lūlūina i le loto o se tagata. (Luka 8:12) Pe o le a e taofia ea togafiti a Satani e ala i le vave toe asia? Afai e te manatu i lau avega tauave ma talisapaia lou faaeaga, o le a e toe vave asia la, i taimi uma lava e mafai ai.—1 Kori. 9:16, 23.
E FAAPEA ONA AMATA SE SUESUEGA FAALE-TUSI PAIA
15 O le amataina o se suesuega faale-Tusi Paia e lē aofia ai nisi o feuiuiaiga faigata, ma lavelave. Atonu ua nofo sauni nisi tagata e talia lau ofo tuusaʻo e faafoeina se suesuega faale-Tusi Paia i le aiga ma i latou. Peitai, o le toatele o tagata talaʻi e sili ia i latou le lē taʻua o le suesuega ae tau o le tataʻi i ai o le talanoaga faale-Tusi Paia i lea iʻuga.
16 E manaomia le alofa mo tagata ma se faanaunauga faamaoni e fesoasoani ai ia i latou. E manaomia foi se sauniuniga lelei. E ao ona aofia ai i lenei le autaluina o faamaumauga atonu na e faia o mea ua uma ona lua talanoaina ma le tagata ma filifilia ai se faafeiloaiga o le a e faia i le faalauteleina o le talanoaga faale-Tusi Paia. Ia teu i lou mafaufau le taʻitaʻiga masani o au faaupuga. Pe o le a e filifilia ni nai mau e faaopoopo i le mataupu na talanoaina talu ai? Pe faamata e mafai ona e fofola se sāvali po o se tusi ua uma ona iai i le tagata ma iloiloina faatasi ma ia ni nai palakalafa amata? Atonu e te filifilia se mataupu na ia faaalia i ai le fiafia. Faaalu na o se 10 po o le 15 minute i le amataga. E mafai ona faateleina faasolosolo le taimi, e faalagolago i le loloto o le fiafia o faaalia. E ao ona fesoasoani lau faaiʻuga lelei ia te oe e iloa ai le auala e faaauau ai ma le umi e te nofo ai.
17 E fau ma soloi faufautuaga aogā na aumaia i le tele o tausaga e fesoasoani ia te oe i le uia o laasaga agaʻigaʻi i luma i le faia o soʻo. I le avea ma vaega faasolo, na avatu ai i lomiga o La Tatou Faiva o le Malo o Oketopa ma Novema 1990 ni mataupu aogā ua faaulutalaina “Pāʻia Loto e Ala i Suesuega Faale-Tusi Paia Uigā.” ma le “Faasino Tagata Aʻoga o le Tusi Paia i le Faalapotopotoga a Ieova.” Na iai i La Tatou Faiva o le Malo mo Mati 1987 le mataupu “Sauniuni ma Faia Suʻesuʻega Faale-Tusi Paia i Aiga.” O se toe tepa vave i le Index i lalo o “Suesuega Faale-Tusi Paia” o le a tataʻi ai oe i faamatalaga faaopoopo e aogā.
18 I le avea ma faaaʻoaʻoga o le auala e faafoe ai se suesuega, ia uaʻi totoʻa atu i le mea o loo faia i le Suesuega Tau Tusi a le Faapotopotoga. O le mea moni, i se suesuega faale-Tusi Paia i le aiga, e leai se aofaiga o le mataupu e muai tofia ina ia suesue. E ao la ona fua lau suesuega o le mataupu e tusa ma le tomai o le tagata aʻoga ma ona manaoga. E faaopoopo i lena, e sili atu ona fiafia le ovasia o le auaunaga ma isi tagata talaʻi agavaa ma paeonia e ō faatasi ma oe ma ofoina atu ni faufautuaga aogā i le faafoeina o ni suesuega faale-Tusi Paia uigā.
19 I le iloaina faapea o loo faatino e Ieova le matafaioi autū i a tatou taumafaiga e fesoasoani ai i tagata, e ao ai ona tatou tatalo e lē gata i le sailia o se tasi tatou te suesue ae e faatatau foi i le agaʻigaʻi i luma o ē fiafia ua tatou mauaina. E ao ona pei o tatou manatu ma faalogona o la a le aposetolo o Paulo ina ua molimau atu i le Tupu o Akeripa: “Ou te aioi atu lava i le Atua, ia le o se mea itiiti, po o se mea tele, a ia pei o aʻu nei, e le na o oe, a e atoa foi ma e o faafofoga mai uma lava ia te au i lenei aso.” (Galu. 26:29) Sa manao Paulo i lana au faalogologo e avea ma soʻo moni o Keriso, pe manaomia ai sina taimi puupuu po o se vaitaimi faaumiumi atili o fesoasoani totino.
20 O le faafoeina o suesuega faale-Tusi Paia e mafai ai ona tatou “molitino atu le tala lelei o le alofa tunoa o le Atua.” (Galu. 20:24) Atonu ua toeitiiti ona liliu mai lea o se aofaiga e lē mailoa mai le pouliuli i le malamalama ma nai le pule a Satani i le Atua. (Galu. 26:18) E tatau ia te oe, le auauna tuuina atu ma papatisoina a Ieova, ona faia lau vaega i le totōina o fatu o le upu moni ma mulimuli ane ai faasūsūina e pei ona manaomia e ala i talanoaga faale-Tusi Paia ma suesuega faale-Tusi Paia faifai pea i aiga. E mafai ai i lea ona e maua le olioli tele i le vaaia o tagata ua avea ma soʻo ma auai faatasi ma oe i le fesoasoani atili i isi e avea ma soʻo o Iesu Keriso.