E Telē se Eseesega e Faia e Upu Tomua
1 Pe sa e faaaogāina ea nisi o faatomuaga ua fautuaina i le tusi Reasoning po o ia na avatu i lomiga talu ai nei o La Tatou Faiva o le Malo? Ua lipotia mai e le toatele o tagata talaʻi le matuā taulau o la latou faiva i lea fale ma lea fale, e ala i le faaaogāina o ia upu tomua, upu i le upu e pei ona lomia ai. O isi ua latou iloaina faapea, i le faaaluina o sina taimi itiiti e sauniuni ai mo le faiva i le fanua, ua mafai ai ona latou faatulagaina ni upu tomua i a latou lava upu ae e faavae i faaupuga o faufautuaga ua lomia mai.
2 E tasi le mea ua mautinoa, afai e teu mau i lou mafaufau au upu tomua a o leʻi taitai ona e faalatalata atu i se tasi ma le feau o le Malo, o le a sili atu ai la ona e lagonaina le toʻa ma le mautinoa. O le a faaalia ai i au faamatalaga lou naunau faamaoni e tufaina atu le tala lelei. O lou sauniuni lelei, o le a matuā faafiafiaina ai lau faiva ona o le a e maua mai ai ni iʻuga e sili ona lelei. A o le mea e sili atu ona tāua, ua tatou avatu ai la tatou taulaga o le auaunaga i le mea e silisili ona lelei e mafai ona tatou ofoina atu.—Epe. 13:15; 1 Pete. 2:5.
3 O lea, ia faaalu le taimi e sauniuni ai. Ia manatunatu i ituaiga o tagata atonu tou te feiloai i la outou oganuu. O ā ni mea o latou popole ma manatu mamafa i ai? O ā ni mea o loo tutupu i le siomaga e aafia ai o latou ola? A uma ona manatunatu i tali i na fesili, ia tagai i upu tomua ua fautuaina i itulau e 9-15 o le tusi Reasoning pe filifilia se upu tomua e tasi pe sili atu foi o loo i La Tatou Faiva o le Malo. Ia saoloto e faafaigofie pe fetuutuunai faaupuga tonu ua lomia ina ia e lagona ai le toʻa e faaaogā. O le laasaga e sosoo ai, o le tuu atu lea i isi tagata talaʻi tou te faataʻitaʻia au upu tomua i se vaega faataʻitaʻi. Atonu o le a faalaeiauina ai foi isi ina ia faaleleia a latou upu tomua. I so o se tulaga, e mautinoa lou faalaeiauina ai o le tasi ma le isi ma tau fai atiina aʻe ai i galuega lelei.
4 O le a tauia le taimi ma taumafaiga ua e faaaluina e sauniuni ai au taulimaga i le fanua. Atonu o le a faamanuiaina oe i le faateleina o sou sao uigā i le galuega faagaee loto o le aoaoina o loo faia nei.