Taliaina, Faatatauina, ma le Mauaina o Aogā Mai le Afioga a le Atua
1 E ui ina e faitau miliona tagata o loo iai a latou Tusi Paia, ae e toatele latou te lē taliaina faapea o le Afioga lea a le Atua, e anoanoai foi e lē o faatatauina ana fautuaga atamai, ma o lea ua toaitiiti ai i latou e aogā i ai. Peitai, e talitonu moni lava tagata o Ieova faapea o le Afioga lea a le Atua ma e aogā i mea uma lava. (2 Timo. 3:16, 17) O le mea lea, o le a avea ai ma matua o le polokalama o le fonotaga matagaluega mo le tausaga faaleauaunaga 1993 le “Taliaina, Faatatauina, ma le Mauaina o Aogā Mai le Afioga a le Atua.”
2 O le a faia ai lauga, faataʻitaʻiga, faamatalaga pupuu, o mea tutupu, atoa ma faatalanoaga e faalaeiauina ai i tatou, ina ia faalolotoina ai lo tatou talisapaia o le Afioga a le Atua, ma fesoasoani ai ia i tatou e matuā faatatauina atoatoa i vala uma o le olaga. O le a iloiloina i le polokalama o le afiafi o le Aso Toonai fautuaga ma aʻoaʻiga i totonu o le liʻo o le aiga e uiga i faafiafiaga, aumea, ma le pupū i mea faitino. O le a faaalia ai le auala e tatau ai ona ese i tatou mai le lalolagi ae aua le faataʻitaʻi i ona uiga leaga ma gagana lē faaaloalo ma upu masoā. E faaopoopo i na mea, o le a saunia ai faalaeiauga e aogā i mātua nofo toatasi ma fanau e leai ni tamā.
3 O le a maua foi i le Aso Toonai le avanoa mo tagata fou ua tuuina atu ina ia papatisoina ai pe a maeʻa ona faalogologo i se lauga faale-Tusi Paia e uiga i lena mataupu. E ao ia i latou o loo fuafua e papatiso i le fonotaga matagaluega ona faailoa atu o latou manao i le vave e mafai ai i le ovasia taʻitaʻi o le faapotopotoga, ina ia lava ai lona taimi e fuafuaina ai mo isi toeaina e autaluina fesili mo sui papatiso.
4 O le a iloiloina i le polokalama o le taeao o le Aso Sa, ni auala e mafai ai ona faaesea i tatou mai le lalolagi e ala lea i le gauai atu i le Afioga a le Atua. E aofia ai i mataupu o le a iloiloina, le tāua o lo tatou foliga atu ma le auala e alofia ai le faaleagaina o o tatou mafaufau. I le afiafi, o le a tauaaoina ai e le ovasia itumalo le lauga lautele ua faaulutalaina “O le ā e Matauliaina ai le Moni o le Tusi Paia?” Tatou te mananao e mautinoa ua valaauliaina uma tagata naunau i lenei polokalama matagofie.
5 O le a faailoa atu e la outou ovasia matagaluega, aso ma le nofoaga e usuia ai le polokalama o lenei fonotaga matagaluega, ma matou te faalaeiauina tagata uma ina ia auai e taliaina, faatatauina, ma ia mauaina aogā mai fautuaga a le Afioga a le Atua.—Iako. 1:22-25.