Pe Mafai ona Toe Faafou le Naunau?
1 ‘Amuia i latou e naunau i o latou manaoga faaleagaga.’ (Mata. 5:3) E ese le uigā o na upu a Iesu i lana Lauga i luga o le Mauga. E lē o iloa e le toatele o le fanau a tagata, latou te manaomia mea faaleagaga ina ia faafiafiaina ai ma maua ai se fuafuaga mo o latou olaga. O loo iai nisi o ē sa iai lena manatu mamafa mo manaoga faaleagaga, ae ua toe mou ese. E iai se mea ua mafua ai ona latou faatalalē e uiga i mataupu faaleagaga. Ua latou fulitua i le mea e aogā moni lava mo i latou. O le fesili, pe mafai ea ona toe faafou le naunau o i latou na? O le itu e fiafia ai, ona o nisi e mafai.
2 Atonu o e iloa se tasi o lē sa suesueina le Tusi Paia ma Molimau a Ieova i tausaga ua mavae, po o se tamaitiiti foi, ae ua lē toe mafuta ma tagata o le Atua. Peitai, atonu ua faamauina i le mafaufau o lena tagata po o loo ia manatua pea nisi o aʻoaʻoga ma mataupu silisili amiotonu a le Tusi Paia. A o faasolo ina matuā leaga tele tulaga o le lalolagi ma suia foi aiaiga o le olaga, o le a ia toe manatua ai mea sa aʻoaʻoina muamua ma atonu o le a toe liliu atu ai lena tagata i le Atua ma sauni e talia atili le poto mai le Tusi Paia. O le asiasi atu i tagata faapena mo le fuafuaga ina ia toe faafou le suesuega faale-Tusi Paia, e faamaonia le sili atu ona tauia.
3 E mautinoa, e ao ona faia se taumafaiga mai lea taimi i lea taimi ina ia asiasi atu ai ia i latou o ē na auai i le faamanatuina o le Faamanatuga. Ia faailoa atu ia te i latou lou manatu mamafa moni mo lo latou lelei faaleagaga, ma ofo atu e suesue le Tusi Paia ma i latou. E ao ona faia se taumafaiga faapitoa e fesoasoani ai ia te i latou na auai i le Tauaofiaga Itumalo “O Ē Faasusulu Atu le Malamalama” na faia talu ai nei. I nisi tulaga, atonu e aogā ona asiasi atu se isi tagata talaʻi i se tagata sa lē faaauauina lana suesuega ona o le leai o se agaʻigaʻi i luma.
4 O le mea moni, ua faatalitalia tagata o loo tatou suesue ina ia manatu mamafa i le tapuaiga ia Ieova ma ia faaalia le tinoū i la latou suesuega faale-Tusi Paia. Ae mo la tatou vaega, tatou te mananao e faamautinoa ua lava ma totoe taumafaiga ua tatou faia e fesoasoani atu ai, ma ina ia mafai ai ona tatou manatu i isi e pei ona sa iai i le aposetolo o Paulo ina ua ia faapea mai, “ou te mamā aʻu i le toto o tagata uma.”—Galu. 20:26.