Faaalia le Talisapaia mo Lomiga
1 “E leai se iuga i tusi o tusi e tele.” (Fai. 12:12) O le tele o tusi ua faamāumau ai pepa o loo lolomiina ai. Peitai, ua lē o le tulaga lena i lomiga ia ua faasalalauina e le Sosaiete o le Olomatamata. E tāua tele auā o loo iai taumafa faaleagaga e faasaoola. Ua fesoasoani i ē naunau fiafia ina ia latou iloa Ieova, ma e faamalosia ai le faatuatua o i latou o ē ua uma ona avea ma auauna tuuina atu a Ieova.
2 Tatou te mananao e tufa atu a tatou lomiga i isi auā ua tatou iloa e aogā ia i latou. E ui lava ina avatu e aunoa ma se totogi, ae e iai ni tupe na faaalu i le gaosiga ma le tufatufaina. Tatou te lē mananao ai la e soona tufa faataugā atu lomiga. Afai tatou te lē o mautinoa lelei se naunau fiafia o lē ona le fale, e masani lava ona tatou ofoina atu i ai kopi taitasi o Le Olomatamata ma le Awake! pe atonu foi e na o se sāvali. E ao ona tatou toe foi atu i tagata uma o ē taliaina lomiga, ma afai e faaalia se naunau fiafia i lea taimi, e mafai ona tatou toe ofoina i ai se isi lomiga.
2 O nisi ua faatautū e taʻu atu i ē ona fale o le galuega e lagolagoina e meaalofa tauofo, ae i le tele o tulaga e lelei ona faia faapea. O le a faamanino atu ai i ē ona fale o la tatou galuega e lē faapisinisi. Ua faamatilatila ai le sini o la tatou galuega ina ia talaʻi le tala lelei o le Malo ma faia soʻo. Ua fesoasoani lea ia i tatou e mātauina le naunau moni. E masani ona maua e tagata tupe mo mea e pei o tapaa ma lomiga faalelalolagi. Afai e moni lo latou naunau i mea na e taʻu atu ia i latou, o le a latou iloa ai le tāua o le faimeaalofa e lagolagoina ai le Faa-Kerisiano moni. O le faamalamalama atu i ai o le auala o loo lagolagoina ai le galuega, tatou te taʻu atu ai lo tatou talisapaia o lomiga. Tatou te faaalia ai e iai se tau o mea o loo gaosia ai.
4 Pe afai e lelei ona faamatala atu le tulaga o le faia o meaalofa, e toatele foi tagata e fiafia e fesoasoani i la tatou galuega tāua. E iai taimi atonu e te manatu ai ua lē talafeagai ona taʻu atu i ai le faatulagaga o foai, peitai e lelei lava le taʻu atu i ai i le uluai asiasiga, a o naunau fiafia lē ona le fale i le faitauina o lomiga o loo tatou ofoina atu.