Mauaina Aogā Silisili Mai le Tauaofiaga Itumalo o le 1993 “Aʻoaʻoga Mai le Atua”

¹ “Ieova e, ia e faasino mai ia te au.” (Sala. 86:11) E tatau ona faapena olega faatauanau a auauna tuuina atu uma a le Atua. Ua tatou maumauai ina ia aua lava neʻi taofia le aʻoaʻoina ma le faatatauina o mea ua tatou aʻoaʻoina. E iai taimi tatou te manaomia ai le faia o ni fetuutuunaiga, ma e pei ona sa faia e le faisalamo, tatou te manaomia ona ole atu i le Atua ina ia autasia o tatou loto ia lē fevaevaeaiina ai. O le polokalama o le Tauaofiga Itumalo o “Aʻoaʻoga Mai le Atua” o le a saunia ai faatonuga aogā ma fetuunaiga tatou te manaomia e auauna faamaoni ai ia Ieova ma alofia ai omiga o lenei faiga o mea.

² Se Tauaofiaga e Fa Aso: O le a faia le polokalama i nofoaga talafeagai e 156 i le Iunaite Setete. O Le Olomatamata o Fepuari 15, 1993, ua lisi atu ai nei nofoaga uma. E lē gata e faia i le faa-Peretania, ae e faia foi le polokalama atoa i le gagana Saina, Falani, Eleni, Italia, Iapani, Korea, Potukale, Sepania, le gagana Tagalog, ma le gagana a Vietiname. E 16 nofoaga o le a faaliliu ai le polokalama i gagana e fai ai taga. O le a amata le polokalama i le Aso Tofi i le 1:20 i le afiafi, ae faaiu i le afiafi o le Aso Sa i le tusa o le 4:15. O le a tatala nofoaga taitasi o tauaofiaga i le 7:30 i taeao taitasi. Ia mātau faamolemole, e lē faatagaina se isi e ulufale atu a o leʻi taina le 7:30 i le taeao, seʻi vaganā ua tofia o ia e fai se galuega a o leʻi oo i lena taimi.

³ O le ā ua teuina mo i tatou? O le anoanoai o taumafa aano faaleagaga e tauaaoina mai i le matalasi o auala: o lauga, o faataitaiga, o faatalanoaga, ma tala e lua. Aua neʻi misia se vaega o nei aʻoaʻoga tāua! E lē gata i lea, tatou te tulimataia foi le toe feiloai ma a tatou uo ua leva ma faia foi nisi uo fou. Atonu o le a auai i la outou tauaofiaga misionare o loo auauna i o latou tofiga i isi atunuu. Ia faaaogā lena avanoa e faamasani ai i nei uso ma tuafāfine faamaoni. Afai o oe o se matua, ia faaaofia ai lau fanau i talanoaga. O le agaga olioli ma le faataulagaina totino o nei misionare o le a ono avea o se faavae mo lau fanau talavou e manatunatu ai i le galuega o le auaunaga faataimi atoa.

⁴ Po o le a E Aumaia Atoa ea le Sefuluai i le Fale e Teu ai Oloa? I le Malaki 3:10, na folafola ai e Ieova ia Isaraelu, afai latou te fia tofotofoina o ia ma aumaia atoa le sefuluai i le fale e teu ai oloa, o le a ia sasaa atu faamanuiaga seia oo ina latou lē toe manaomia.

⁵ Mo nisi tagata, o le tofotofoina o Ieova, o lona uiga o lo latou ō atu lea i o latou pule o galuega i se taimi vave lava e talosaga atu i ai mo se faiga malologa po o se taimi e tuua ai le galuega ina ia auai i le tauaofiaga. O nisi taimi e faatautu ai uso i le faia o lenei mea, i le talitonuga faapea o le a lē taitai faatagaina i latou e o latou pule ina ia auai i se tauaofiaga. Peitai, a oo i mataupu e lē aafia ai mea faaleagaga, atonu e itiiti pe matuā leai lava se faigata o lo latou taʻuina atu i lo latou pule o le mea o loo latou mananao e fai.

⁶ E ao ona tatou fesiligia i tatou lava: Afai e faaipoipo sa tatou uo pele i se isi nofoaga, pe tatou te lē ō atu ea i lo tatou pule ma talosagaina se taimi malōlō ina ia auai atu ai i le faaipoipoga? Ma afai e foliga mai e faatautu o ia, pe o le a tatou lē faamalamalama atu ea ma le faaaloalo ia te ia le tāua tele e ao ai ona tatou ō? E mautinoa la, e sili atu ona tāua le aʻoaʻoina e Ieova na i lo o le auai i se faaipoipoga! Afai tatou te talitonu moni lava e matuā tāua le polokalama o le tauaofiaga mo lo tatou tuputupu aʻe faaleagaga, o le a faigofie ai la ona tatou faamautinoa atu i lo tatou pule, ina ia faataga mai so tatou taimi malōlō ina ia auai ai i le tauaofiaga.—Iako. 1:7, 8. 

⁷ I Isaraelu, o le sefuluai sa aofia ai mea na lagolagoina faaletino ai le nofoaga o le tapuaiga ia Ieova. I o tatou taimi, o le sefuluai ua fai lea ma sui o lo tatou taimi, lo tatou malosi, ma a tatou tupe na ua faaaogā saʻo i le auaunaga a Ieova ma i le lagolagoina o le galuega o le Malo. E aofia ai i le sefuluai le taimi tatou te faaaluina i sauniga, i fonotaga, ma i tauaofiaga, atoa foi ma le tausia lelei ma ia faamamā nofoaga o a tatou sauniga. O le Tauaofiaga Itumalo o “Aʻoaʻoga Mai le Atua” o le a aumaia ai ia i tatou le tele o avanoa e avatu atoa ai le sefuluai i le fale e teu ai oloa faaleagaga a Ieova. O ā nisi o nei mea?

⁸ E mafai ona tatou aumaia le sefuluai e ala i le matuā uai atu o le faalogologo i le polokalama o le tauaofiaga, i le auai ma le mataalia i le usuina o pese taitasi o le Malo, ma i le faalogologo lelei i tatalo taitasi, ina ia tatou amene atu i ai mai le loto.

⁹ O lo tatou agaigai i luma i le upu moni, e faalagolago tele i le auala o loo tatou faalogologo ai. I se maota tele po o se malae matamata, e faigofie lava ona tosina ese ai i mea o faia e isi i o tatou autafa, ma o le pogai lena e ao ai ona uai atoa atu o tatou manatunatu i le mataupu. Ia mautinoa ua e sau i le tauaofiaga ma au sauniuniga ua atoatoa, ia iai lau Tusi Paia, lau tusi pese, lau peni ma le api, ma le lomiga o Le Olomatamata o le a suesueina i lena vaiaso. E fesoasoani foi le faia o ni faamaumauga i manatu tāua ma mau o le a faaaogā e failauga taitasi. Ia faapupuu faamaumauga; o le uumi o faamaumauga e ono taofia ai le uai lelei atu. E ao foi ona toleniina le fanau ina ia faalogologo lelei. E mafai e fanau ona avatu faatasi ma o latou mātua le sefuluai, e ala i le mulimulitui i le polokalama.

¹⁰ E fuafuaina e nisi mātua se taimi paganoa i le aiga i aso taitasi e faitau pe faamatamata ai a latou fanau i ata o se lomiga a le Sosaiete. O le lelei o lenei toleniga e faigofie ai ona nonofo fifilemu le fanau i taimi o sauniga ma tauaofiaga. Ua faapea mai ni mātua ua latou tausia aʻe ni fanau o loo fai ma faaaoaoga lelei, e lē taitai ona latou faatagaina a latou fanau e aumai ni meataalo po o ni tusi ata i sauniga. E oo lava i tamaiti o loo matuā laiti, e mafai lava ona latou iloa le mafuaaga e auai ai i sauniga, ina ia tapuai ia Ieova. Ua tatau la ona faamālō atu i mātua o ē o loo aʻoaʻoina a latou fanau, i le uiga o lo latou aumaia atoa o le sefuluai i le fale e teu ai oloa!

¹¹ E mafai foi ona tatou avatu le sefuluai e ala i le ofoina atu o lo tatou taimi ma le malosi e fesoasoani ai i le faamaopoopoina o le tauaofiaga. I le tele o nofoaga, e faatulaga ai se aso e tasi pe lua a o leʻi oo i le tauaofiaga, e faia ai se faamamāaga. Afai e te latalata ane i ai, aisea e te lē fuafua ai tou te auai ane ma lou aiga atoa? E aumaia e nisi uso a latou tagata aʻoga faale-Tusi Paia ua agaigai i luma, ina ia tusa lava pe leʻi papatisoina, ae e mafai lava ona latou aʻoaʻoina mea o loo aofia ai i le lagolagoina o le tapuaiga ia Ieova. E tele mea e faia ina ia faamautinoa ai le sologa lelei o le faagaoioiga o le tauaofiaga. Aisea e lē tauofo uma ai le aiga?

¹² O le isi auala tatou te avatuina ai le sefuluai, o lo tatou lagolago atu lea i le itu tau tupe i le tauaofiaga. I le otootoina mai o le auala sa tatau ona faia ai meaalofa faaletino i le lagolagoina o le tapuaiga mamā, na poloai ai Ieova i le nuu o Isaraelu e faapea: “Aua foi neʻi iloa se isi i luma o Ieova ua leai sana mea. E taitasi le tagata e tusa ma mea ua ia te ia, e tusa ma le manuia ua foaiina mai e Ieova lou Atua ia te oe.” (Teu. 16:16, 17) E tusa lava pe tele pe laiti ni mea na foaiina e tagata, ae talu ai sa latou muai sauniunia a latou taulaga, o lea sa finagalo malie ai Ieova. I se tulaga tutusa, e toatele uso latou te manatunatu faatasi ma le tatalo e tusa ai ma le meaalofa o le a latou faia, pe faia i tupe po o se siaki (e faia mo “Molimau a Ieova”). Pe e te faasino ea lau fanau ina ia tuu se meaalofa i le pusa?

¹³ Ia Faatāuaina Aʻoaʻoga a lo Tatou Faaola, le Atua: O o tatou uiga ma amioga lelei, e mafai ai ona tatou ‘faatāuaina le aʻoaʻoga a lo tatou Faaola, o le Atua, i mea uma lava.’ (Tito 2:10) I se isi faaupuga, o i inā lava i le tauaofiaga, e mafai ona tatou faaalia ai le faatatauina o lena aʻoaʻoga mai le Atua i o tatou olaga.

¹⁴ Ae faapefea a tatou amio? Ua seāseā toe iai i le lalolagi i aso nei le manatunatu mo isi. Ae o tagata o Ieova, o ē o loo taitaia e mataupu faale-Tusi Paia, latou te manatunatu e lē i o latou lava lelei, ae mo le lelei o o latou uso. (Fili. 2:4) Tatou te manatunatu mamafa i isi o loo tatou faifai mea faatasi. Tatou te lē tautulei a o tutū i se laina mo le mauaina o meaai po o lomiga. Tatou te manatunatu mamafa i ē matutua ma tamaiti laiti atonu o loo faatalitali i le laina ma o latou mātua, ma e faigofie lava ona tuleia i latou ma le lē iloaina e nisi tagata matutua. I faleʻaiga, tatou te faaaloalo ai ma faaeteete i le au faigaluega, e aunoa ma se lē mafaufau po o le soona tagisa atu pe a lē fetaui le auaunaga o loo faia mai ma mea na tatou faatalitalia. Ma tatou te fiafia e mulimuli atu i le masani, o le tuuina atu lea o sina meaalofa e 15 pasene mo auaunaga sa faia.

¹⁵ O a tatou amio faaleatua e iai sona uigā moni ia i latou o loo matauina mai i tatou. I se tasi o tauaofiaga i le tausaga ua teʻa, sa fai mai ai se leoleo o lē na iai i le matagaluega mo le 21 tausaga e faapea: “Na ou ofo i le lelei ona pulea o o outou tagata. E ese le mataina [o i latou]; latou te taeina le otaota e aunoa ma se isi e tau faatonuina atu, ma e maopoopo i latou. E matuā lelei ona faamaopoopoina la outou tauaofiaga.” Na ia faaopoopo mai: “Pe a vāai mai o outou tagata ia i matou, latou te mata ʻataʻata mai. O se faailoga lelei lena. O loo matou sueina lena tulaga. O le faailoga lena o le faaleuo ma le leai o se mea o nanaina. Ma ua matou matauina foi le auala e mafuta ai fanau ma o latou mātua ma le lelei ona puleaina o i latou. Ia talitonu mai i laʻu tala lenei, ua ou matuā ofo lava. O soʻu fiafiaga loʻu mauaina o lenei tofiga i inei.”

¹⁶ Sa faimalaga faapitoa atu lava i le Peteli nisi tagata mautofi o se aai, ina ia tuuina atu sa latou valaaulia e faia ai se tauaofiaga i lo latou aai. Na taliaina e le Sosaiete le valaaulia, ma sa leʻi iai foi se toatamai i alii o le aai. Na taʻua mai e le pule lagolago o lea aai e faapea: “Ua matou fiafia tele ona o le tauaofia i lo matou aai, o se vaega e sili ona faaaloalogia e pei o la outou vaega. Sa matou matuā taumafai e aumaia outou i inei . . . ma sa matuā atoatoa i ai lo matou fiafia.” Ona o a latou amioga lelei, na faia uma ai se sao o uso ma tuafāfine i le avatuina o se molimau e sili ona lelei i lena aai.

¹⁷ Pe o le a e faatauaina ea e oe lava ia le aʻoaʻoga a lo tatou Faaola, o le Atua, e ala i le avea o lau amio ma faaaoaoga lelei? O nisi nei o auala e mafai ona faia ai lenei mea:

Laei ma teuga: I le taimi o loo tatou auai ai i le tauaofiaga, aua neʻi o tatou manatu o loo faia ni a tatou faigā malologa. Ae ua tatou ofoina atu i tatou lava ia Ieova ina ia aʻoaʻoina e ia. Ona o lena tulaga, pe ua lē tatau ea la ona tatou laei e pei ona laei ai pe a auai i sauniga i le Maota o le Malo? (1 Timo. 2:9, 10) E lē gata i lea, e ao ona tatou manatunatu loloto i o tatou lavalava o le a faia pe a uma polokalama o aso taitasi. Pe a tatou foi atu i o tatou api, ma po o le ā lava lo tatou matua, pe o le a tatou tausisi ea e faafesuiai o tatou laei onomea ma le faamamaluina sa fai i le tauaofiaga, i lavalava matagā ma teuga faalelalolagi? Pe o le a lē faaatagia atu ai ea i lenei tulaga le manatu faapea, o o tatou laei i sauniga ua na o se toniga na i lo o se faaatagiaina o le ituaiga o olaga o loo tatou ola ai? Ia manatua, o loo tatou tauaveina le suafa o Ieova, ma e ao ia i tatou uma ona faaeteete, ina ia lē upuleagaina le ala o le upu moni.

E ao foi ona faamanatu atu i sui papatiso, e lē talafeagai mo lea sauniga paia ona ofuina ai ni mitiafu o loo iai ni tusitusiga o agana, ni faaupuga faalelalolagi, po o ni faalauiloaga faapisinisi. E ao i toeaina ona faamautinoa ua lelei ona muai autaluina fesili o le papatisoga, ma ua uma ona taʻu atu i tagata taitoatasi pe ua faamaonia o ia pe leai foi mo le papatisoga. (Pe a faia fesili, atonu o le taimi lelei foi lea e avatu ai ni faufautuaga e faatatau i lavalava talafeagai ma onomea mo le papatisoga.) O le a lē talafeagai i sui papatiso o ē ua faamaonia e le au toeaina ona toe lesitalaina o latou igoa i le tauaofiaga.

Faletalimalo ma falemautotogi: Ia faaalia fua o le agaga pe a tou ō atu i faletalimalo po o falemautotogi. Atonu e lē mafai e se tagata o loo faafoeina mālō a le faletalimalo ona faatautaia se vaega toatele i le na o sina taimi puupuu. O lea, ia onosai, ma magafagafa, ma ia faia foi ni meaalofa pe a talafeagai.

E mafai foi ona faia le vaega a fanau e ala i le faaaloalo i meatotino a le faletalimalo ma usiusitai i tulafono o loo pulea ai le faaaogāina o le vai taele ma isi meatotino a le faletalimalo. O le a fesoasoani i mātua le muai faaalu o se taimi a o leʻi oo i le aso o le tauaofiaga, ina ia autalu ai ma a latou fanau, amioga e tatau ona latou faaalia, ma ia faamanatu ia i latou la latou lava avega tauave ia pipii atu i amioga faa-Kerisiano.

Masini pueleo: E ui ina faatagaina meapueata o vitio, ae matou te faamoemoe o le a e magafagafa i isi. E lē o se alofa lou pupuniina o le vaaiga a isi uso o loo iai i le tauaofiaga, ona o lou pueina o le polokalama. Afai e mafai ona e pueina mai i lou nofoaga e aunoa ma se faalavelave, o le a lē taofia lou faia faapea. Ia manatua faamolemole, e leai se meapueata po o ni masini pueleo e faatagaina ona faaaogā ai mea eletise faaleoteleleo a le tauaofiaga, e lē tatau foi ona faatutuina na masini i auala e feoai ai tagata po o auala o loo feoai ai taavale.

Nofoa: Faamolemole, ia manatua, E MAFAI ONA TAOFIA NOFOA MO NA O TAGATA LAVA O LOU AIGA MA SO O SE TASI O LOO OUTOU FAIMALAGA FAATASI ATU I LA OUTOU TAAVALE. O le a iai ni vaega faapitoa e nonofo ai ē matutua ma ē e lē atoatoa le malosi i tauaofiaga uma. Faamolemole, ia magafagafa mo ē matutua. I taimi ua mavae, sa tau suʻe ai e nisi uso matutua ni o latou nofoa i ni vaipanoa e lē taugalemu talu ai ua faatumu e le au talavou nofoa i le itu sa tatau ona iai tagata matutua. Matou te faamalulu atu ona ua lē mafai ona faamalieina talosaga na aauina mai mo ni nofoaga po o ni potu e faaesea mo i latou e iai faafitauli e pei o allergies (mea e ilitata ma afaina ai le soifua maloloina).

Mea totino: E fautuaina lou tausisi e faaitiitia au mea totino e aumai i le tauaofiaga. Afai o se mea e lē ofi i lalo o lou nofoa, e sili ona lelei pe a tuu i le fale po o le keli o le taavale. E lē faatagaina le tuu o pusa faamalulu (cooler) lapopoa i le auala e savavali atu ai tagata ona o mafuaaga tau i le saogalemu, ma afai e tuu i le nofoa lena e sosoo atu ia te oe, atonu o le a lē mafai ai ona maua e le isi tagata se nofoa.

Mauaina o lomiga ma mea taumafa: E ui ina e leai ni mea taumafa o le a saunia i le tauaofiaga, ae o le a maua ai vaivevela ma vaiinu malulu. Faamolemole ia faamautinoa e te lē o faaloloto i mea o loo ē manaomia. Ia manatua e faasa ona aveesea vaiinu mai le tauaofiaga, e faaaogā i se taimi mulimuli i se isi mea. E ao i mātua ona talanoa ia latou fanau e aua le faamāumauina vaiinu. Ia faaalia foi faamolemole le manatu mamafa mo isi pe a tufatufaina lomiga..

¹⁸ Ona o le manatunatu alofa mo isi, ia fuafua ai e vave taunuu i aso taitasi, ae maise lava i le Aso Tofi lea e foliga mai o le a umi se taimi e tau saili ai ni paka o taavale faapea foi ma nofoa.

¹⁹ Maeu so tatou faaeaga i le aʻoaʻoina e Ieova! O le faaaogāina o o tatou taimi, lo tatou malosi, ma a tatou meafaitino e lagolagoina ai le Tauaofiaga Itumalo o “Aʻoaʻoga Mai le Atua” i lenei tausaga, o le a maua ai aogā faaleagaga e faavavau, e lē gata mo i tatou ae faapea foi o tatou aiga.

Faamanatu o le Tauaofiaga Itumalo

Amioga Talafeagai: E tāua tele i ē uma o loo auai i le tauaofiaga ona faaeteete ina ia talafeagai o latou uiga ma foliga, ia faaaloalo i le nofoaga o le fonotaga, ia vaai i ai o “le fale o le Atua.” (Sala. 55:14) I le taimi o lauga, o tala, o pese, ae maise lava tatalo, faamolemole, ia aua neʻi faia so o se mea e ono tosina ese ai le uai a isi o loo faalogologo i le polokalama. O le soona feofeoai lē tatau, o le talatalanoa, po o le faaaogā o meapueata e feemoemoai po o meapueata o vitio i se tulaga e faatosina ese ai mafaufau o ē o loo taumafai e uai atu i mea o loo talanoaina, o le a lē faaalia ai se faaaloalo. O lo tatou magafagafa ma amioga lelei o le a faataitaia ai lo tatou talisapaia moni o aʻoaʻoga mai le Atua ma auai atu i le tauaofiaga ina ia aʻoaʻoina e Ieova.

Api: E talisapaia tele la outou lagolagosua pe a outou nonofo i na o api lava ua saunia atu e le tauaofiaga. Afai o loo e fuafua e moe i le po i le aai lea o le a faia ai le tauaofiaga, ae e te leʻi faamautuina se mea e te nofo ai, faamolemole ia vave nei loa ona fai. Afai e talafeagai ona toe aveese lou api sa taofi, e ao ona e tusi vave atu pe telefoni atu i le falemautotogi, ia faia lenei tulaga i se vave e mafai ai ina ia toe faaavanoa ai lena potu mo se isi tagata.

E ao i failautusi o faapotopotoga ona mautinoa ua vave tauaao atu i le tuatusi talafeagai o le a faia ai le tauaofiaga, pepa faatumu o Talosaga mo Api e Manaomia Faapitoa. Afai e tatau ona toe faaui ese sau api e ala i le faatulagaga lea o manaoga faapitoa, e tatau ona e vave faailoa atu i lē ana le fale po o le falemautotogi, faapea foi le Matagaluega o Api a le tauaofiaga, ina ia mafai ai ona faaavanoa atu le potu i se isi.

Taavale Toso mo Pepe: I le tele o atunuu, atonu e lē faaaogāina ai i nofoaga o fonotaga i le lautele taavale toso mo pepe. E faasaina e tulafono tau tineimu le pakaina o na taavale i faapaologa o fale ma auala e feoai ai tagata i totonu i le va o nofoa. Talu ai e ono faapogaia e ni tumutumu tetele ni tulaga faafaigata mo feoaiga, e lamatia ai la le iai o taavale toso e lē gata i pepe lava latou, ae mo so o se isi foi o le a lāvea ai. O lea la faamolemole, aua le aumaia na taavale toso i le nofoaga o le tauaofiaga. Peitai, e faataga nofoa mo tamaiti laiti, auā e mafai lava ona faatutu nei nofoa i autafa o nofoa o mātua. E talisapaia tele la outou lagolagosua i lenei itu.

Papatisoga: E ao i sui papatiso ona iai i o latou nofoa, i le vaega ua faailogaina a o leʻi amataina le polokalama i le taeao o le Aso Toonai. O ē uma ua fuafua e papatiso, e ao ona aumaia se ofu taele onomea ma se solo taele. A maeʻa le lauga o le papatisoga ma le tatalo a le failauga, o le a avatu e le taitaifono o lena vaega faatonuga pupuu i sui papatiso, ona taloina loa lea mo le pese. A uma le fuaiupu mulimuli, ona faasino atu lea e le au tautua sui papatiso i le vaega e faatofu ai po o taavale e ave ai i latou i inā. Ona o le papatisoga o se faailoga lea o le tuuina atu o se tasi, e patino ma o se mataupu totino i le va o se tagata ma Ieova, ua leai la se sauniuniga mo le mea ua taʻua o le papatisoga faipaga, lea e toalua ai pe sili atu foi sui papatiso e faauōuō pe uulima a o papatiso.

Galuega Tauofo: E manaomia fesoasoani tauofo mo le sologa lelei o taualumaga o le tauaofiaga itumalo. E tusa foi pe na o se vaega o le tauaofiaga e mafai ona e galue ai, e matuā talisapaia lava lau auaunaga. Afai e mafai ona e lagolagosua, faamolemole logo i le Matagaluega o Galuega Tauofo pe a e taunuu atu i le tauaofiaga. E mafai foi e fanau e i lalo ifo o le 16 tausaga le matutua ona saosaolaumea mo le manuia o le tauaofiaga, ae e manaomia ona latou galulue faatasi ma se matua po o se tagata matua na te vaavaaia.

Pine Fatafata: Faamolemole ia laei mai pine fatafata ua fuafuaina faapitoa mo le tauaofiaga pe a malaga atu pe tuua foi le nofoaga o le tauaofiaga. E masani lava ona mafai ai ona tatou avatu se molimau lelei a o femalagaai. I le mataulia o oe o se sui usufono e ala i se pine fatafata ua tusia manino, o le a faigofie ai ona faafoe le fuafuaga ua faafaigofieina mo le saunia o vaivevela ma vaiinu malulu. E ao ona maua mai i lau faapotopotoga pine fatafata, auā o le a lē maua i le tauaofiaga.

Faamaoniga Totino: E ese mai i le pine fatafata o le Tauaofiaga o “Aʻoaʻoga Mai le Atua,” ua faalaeiauina foi tagata uma ina ia aumai a latou pepa o Faasinoga Faafomai. E ao foi i tagata o le aiga Peteli ma paeonia ona iai a latou pepa faailo.

Upu Lapatai: Po o fea lava e tu ai lau taavale, e tatau ona loka i taimi uma ma ia aua lava neʻi tuua ai se mea e iloa atu i totonu. Loka au mea totino i tua o lau taavale, pe a tatau ai. Ia leoleo foi i tagata gaoi ma ē lima tagoese, o ē e tosina ane i faatasiga tetele. E aofia i lena le lē tuua o so o se mea tāua i luga o nofoa i tauaofiaga. O loo iai nisi o lipoti e uiga i tagata lē pulea e taumafai e maileia ese le fanau laiti mai le nofoaga o le tauaofiaga. O lea, faamolemole ia faaeteete.

Ua lipotia mai foi e faapea, i nisi o faletalimalo, ua faigofie ona maua le avanoa e matamata ai i ata televise e faaalia ai amioga leaga po o ata matagā. Ua faamatilatila ai i lenei tulaga le manaoga ina ia alofia le tuufau o tamaiti e matamata i le televise i nei fale e nonofo ai.

Ua telefoni atu nisi uso ma tagata fiafia i le matagaluega o loo puleaina le tauaofiaga ina ia saili le taimi e amata ai polokalama, ma isi foi mataupu. Faamolemole, aua neʻi faia lena tulaga. Afai e lē o maua atu i Le Olomatamata po o La Tatou Faiva o le Malo faamatalaga o loo e manaomia, e tatau ona e tusi atu i le tuatusi o le tauaofiaga lena o loo tusia atu i tua o pepa faatumu o Talosaga mo Api e Manaomia Faapitoa, na e tatau ona iai i faamaumauga a failautusi uma o faapotopotoga.