Toe Foi e Atiina aʻe le Talisapaia

¹ O toe asiga uigā e faagaee ai pea ma faatumauina ai le tuputupu aʻe o le tagata e ona le fale e avea ma sē e talitonu. O ā nisi o fautuaga aogā e ao ona manatua pe a toe asiasi atu ia i latou ua faaalia le naunau?

² Muamua lava, ia sauniuni lelei. E amata lenei sauniuniga i le uluai asiasiga. E faapefea ona faia? E ala i le teuina o faamaumauga saʻo o i latou sa faaalia le naunau. Faamau i lalo le igoa o le tagata e ona le fale, le mataupu sa talanoaina, le tali a le tagata, ma so o se lomiga sa tuu ai. Ia toe autalu au faamaumauga i le fale i le fale ae e te leʻi toe foi atu, ma ia tatalo po o le ā se manatu o le a e fai atu ai.

³ Faapea la o lea ua e sauni. O le ā e mafai ona e fai atu ai? Afai sa e tuua i le tagata e ona le fale se fesili i lau uluai asiasiga, e mafai ona toe atiina aʻe se talanoaga i lena mataupu pe a e toe foi atu. Mo se faataitaiga, afai sa faaautu le talanoaga i le uluai asiasiga i faamanuiaga a le Malo o le Atua, e mafai ona e faatu atu le fesili “Aisea ua faataga ai e le Atua le amio leaga?”

Pe a e toe foi atu, a uma ona faailoa atu oe, atonu e te faapea atu:

◼ “I la ta talanoaga talu ai, sa ta talanoaina ai le mafuaaga ua faataga ai e le Atua alofa le tele o le amio leaga i aso nei. Pe ua e mafaufau atili ea i lena manatu?” [Faatali mo se tali.] Pe e te manatu o silasila alofa mai ea le Atua i tagata? [Faatali mo se tali.] Seʻi ta iloiloina le mea ua fai mai ai le Tusi Paia i le Ioane 3:16.” Pe a uma ona faitau le fuaiupu, e mafai ona e tatai le talanoaga i ni vaega patino o se tasi o tusi tuai, o loo faaalia ai mafuaaga mo le faapalepale o le Atua i le amio leaga i aso nei.

⁴ O le isi fesili faatupu manatu atonu e te ono faataatia i lau uluai asiasiga, e faapenei: “Afai sa fuafua e le Atua le tagata ina ia ola e faavavau, aisea la ua ola matutua ai tagata ma maliliu?” Pe a e toe foi atu, e mafai ona e faaalia ia i latou le tali a le Tusi Paia i lena fesili e pei ona maua i le Roma 5:12. Pe a uma ona faitau le mau, ona faasino lea i le palakalafa muamua i le itulau e 35 o le tusi faa-​Peretania Is This Life All There Is?, lea o loo talanoaina ai le mafuaaga autū ua ola matutua ai tagata ma maliliu.

⁵ Afai sa lua talanoaina auala e faaleleia ai le olaga faaleaiga i lau uluai asiasiga, ma tuu ai le tusi o le Faia o Lou Olaga Faaleaiga ia Fiafia, o se fesili lelei la e mafai ona faavae ai lau toe asiga atonu e faapea: “E mafai faapefea ona tatou faataatia se faavae lelei mo a tatou faaipoipoga?” Pe a e toe foi atu, e mafai ona lua talanoa i manatu patino i le mataupu e 2 o lena tusi.

⁶ O se fautuaga. Ia e faaeteete i fesili e te fesili atu ai pe a e toe foi atu. O fesili e pei o le, “Sa e faitauina le tusi lena na ou tuua ia te oe?” po o le “O e manatuaina aʻu?” ma “Po o e manatua le mea sa ta talanoa i ai i le taimi ua tea?” e ono tuu ai i se tulaga lē mautonu le tagata e ona le fale. E masani lava ona lē fua mai ai ni iuga lelei i na ituaiga o fesili. Ae i se isi itu, ia faaleuo, ia fetuutuunai, ma ia faapuupuu. O ia ituaiga o uiga o le a talileleia ai le feau.

⁷ O nei faatomuaga ma isi foi, e mafai ona faaaogā e atiina aʻe ai le talisapaia i loto o ē fiafia. Aisea e lē fai ai ma sini totino le faia o toe asiga a itiiti mai o le tasi i vaiaso taitasi? Taumafai e faaaogā fautuaga aogā e pei ona faataatitia atu i luga, ma ia saili atu i tagata talaʻi ua lava le tomai e ono fesoasoani ia te oe. O le a faateleina ai lou olioli a o e atiina aʻe le uluai naunau o tagata e ala i le faia o ni toe asiga e uigā.