Le Tusi Paia—Le Puna o Faamafanafanaga ma le Faamoemoe i se Lalolagi o Faalavelave
1 Ua taofiofia e lenei lalolagi tagata i lalo o le anoanoai o omiga, ma ua manaomia ai se faamafanafanaga ma se faamoemoe. O le Tusi Paia ua na o lea lava le puna o faamafanafanaga moni. O loo aumai ai le faamoemoe mo se lalolagi fou amiotonu. (Roma 15:4; 2 Pete. 3:13) Ua matauina e le tusi o le Insight, Tusi 1, itulau 311, e faapea: “Ana lē seanoa le Tusi Paia, semanū tatou te lē iloa Ieova, tatou te lē iloa aogā ofoofogia ua maua mai i le taulaga togiola a Keriso, ma semanu tatou te lē malamalama foi i manaoga e tatau ona tatou ausia ina ia maua ai le ola e faavavau i le taimi o le pulega amiotonu a le Malo o le Atua.”
2 I a Novema, o le a tatou uaʻi faapitoa atu ai i le vaega ua faia e le Afioga a le Atua, le Tusi Paia, e fesoasoani atu ai i tagata i le feagai ai ma le maliu o sē pele. O le a tatou ofoina le polosiua Pe a Maliu se Tasi e Pele i a te Oe po o le polosiua Agaga o Ē ua Maliliu. O le ā se tala e mafai ona tatou fai atu e fesoasoani ai i a i latou e saʻo ō latou loto ina ia talisapaia le aogā o le Tusi Paia?
3 Pe a uma ona faailoa atu oe, e mafai ona e faapea atu:
◼ “Ou te iloa e te ioe i le matuā faigata tele pe afai e maliu se tasi e matuā pele i a i tatou. O fea e mafai ona tatou maua ai ni fautuaga aogā e faailoa mai ai i a i tatou le auala e faafetaiaia ai nei faafitauli? [Faatali mo se tali.] Ua ou iloa e na o le Tusi Paia lava e mafai ona faamautinoaina i tatou, auā o loo aʻoaʻo mai ai e uiga i le faamoemoe mo ē ua maliliu. [Faitau le Ioane 5:28, 29.] O le fuafuaga o la matou galuega, o le faalaeiauina lea o tagata e faitau le Tusi Paia ma ia maua mai ai ni aogā i ana faatonuga. O le fesoasoani lenei mo le faia o suesuega faale-Tusi Paia, Pe a Maliu se Tasi e Pele i a te Oe, e mafai ona fesoasoani i a te oe e faia lena mea. Mātau le mea o fai mai ai e uiga i le faamoemoe mautinoa mo ē ua maliliu. [Faitau le palakalafa e tolu ma le fa i le itulau e 26.] A e fia faitau i lenei polosiua, ou te fiafia e tuu lenei kopi mo oe.”
4 E mafai foi ona e filifilia se taulimaga faigofie e pei o lenei:
◼ “O loo matou naunau e faalaeiauina se faaaloalo e sili atu mo le Afioga a le Atua, le Tusi Paia. Ou te fia tuuina atu i a te oe se kopi o lenei sāvali, Le Pogai e Mafai ai ona E Faatuatua i le Tusi Paia. O loo faamatala mai ai le mafuaaga tatou te vaavaai atu ai i le Tusi Paia e maua mai ai se faamoemoe mautinoa mo se lalolagi sili ona lelei. [Suʻe i le itulau e 6, ma faitau le Salamo 37:29 faatasi ma le palakalafa faaiu.] Ia e faitau i lenei sāvali, ma pe a ou toe asiasi mai i se isi taimi, ona e faailoa mai lea i a te aʻu sou manatu e uiga i le faamoemoe ua ofoina mai e le Tusi Paia.”
5 O nisi tagata talaʻi, atonu o le a mananao e faaaogā lenei taulimaga tuusao e amata ai se suesuega faale-Tusi Paia i le aiga:
◼ “Ua ou asiasi mai e ofoina atu i a te oe se fesoasoani, o le faia lea o se suesuega faale-Tusi Paia i le aiga, e aunoa ma se totogi. Ua faagaeeina e le Atua le Tusi Paia, ma o ana faatonuga ua mafai ona fesoasoani i a i tatou e faasaʻo ai mea. [Suʻe i le 2 Timoteo 3:16, 17 ma faitau. Afai e faaalia le fiafia, ona suʻe lea o le Faaaliga 21:4 ma faamatala po o le ā ua fuafua e le Atua e faataunuuina e ala i lona Malo.] Ou te fiafia e toe foi mai ma talanoa atili e uiga i lenei faamoemoe o le Malo.”
6 O le Tusi Paia, o le puna o faamafanafanaga ma le faamoemoe atoa ma le upu moni e mafai ona taitaiina ai i tatou i le ola e faavavau. (Ioa. 17:3, 17) O le tufaina atu o le poto mai le Tusi Paia i isi, e fiafia i ai Ieova, “o lē finagalo ina ia faaolaina o tagata uma lava.”—1 Timo. 2:4.