Maua Aogā Mai le Aʻoga o le Faiva Faatiokarate mo le 1996—Vaega 3

¹ Sa manao le aposetolo o Paulo i ona uso e tatalo mo ia ina ia mafai ai ona ia maua le tomai e tautala atu ai i le tala lelei ma le lototele. (Efe. 6:18-20) Tatou te naunau foi ina ia atiina aʻe lena lava tomai. Ina ia maua lena tomai, e ao ona tatou talisapaia le fesoasoani ua saunia e ala mai i le Aʻoga o le Faiva Faatiokarate, lea ua faalaeiauina ai ē ua agavaa o loo auai i sauniga ina ia tusia o latou igoa i le aʻoga.

² I le avea ma tagata aʻoga, tatou te maua ai ni fautuaga totino e fesoasoani ia i tatou e faaleleia ai o tatou tomai e tautala ma aʻoaʻo atu ai. (Faata. 9:9) E mafai foi ona tatou maua aogā pe a faalogologo atu i fautuaga o loo tuuina mai i isi tagata aʻoga, i le faatatauina lea ia i tatou lava o mea ua tatou aʻoaʻoina. Pe a sauniuni mo se tofiga, e ao ona tatou suesue ma le faaeteete i le lomiga o loo aumaia ai ina ia faamautinoa ua saʻo la tatou faamalamalamaga o lea mataupu. O manatu autū ma mau o tatou faaaogaina, e tatau ona fetaui lelei ma manatu o loo talanoaina i le matua atoa. Afai o loo aofia ai ma se isi tagata i le lauga, e tatau lava ona muai faataʻitaʻi a o lei taulimaina i le aʻoga. A o tatou agaigai i luma, e tatau lava ona faia se taumafaiga ina ia lauga atu mai se auivi nai lo le faia o se lauga manusikulipi.

³ O i latou uma e iai tofiga i le aʻoga, e tatau ona taunuu vave atu i le Maota o le Malo, tuuina atu i le ovasia o le aʻoga a latou pepa o le Faatonutonuina o le Tautala, ma ia nonofo e latalata i le pito i luma o le maota. E ao i tuafāfine ona vave faailoa atu i le ovasia o le aʻoga po o ā a latou faatulagaga, pe o le a tutū pe nonofo i lalo e tusa ai ma le la lauga. O le felagolagomai i nei auala, e saosaolaumea lea i se polokalame e sologa lelei ma fesoasoani ai ia i latou o loo vaaia le pulelaa ia muai sauniunia mea uma.

⁴ Sauniunia o le Lauga Nu. 2: O se tasi o fuafuaga mo le faitauina o le Tusi Paia, ina ia fesoasoani ai i le tagata aʻoga e faaleleia lona tomai e faitau. E mafai faapefea ona faatinoina lenei mea i se auala e sili ona lelei? O le faitau, ma le toe faitau leotele o le mataupu, o se auala sili lea ona lelei e faia ai. Ina ia iloa le uiga ma le faaleoga saʻo o so o se upu e lē masani ai, e tatau i le tagata aʻoga ona suʻe ia upu i se lomifefiloi.

⁵ E mafai e mātua ona fesoasoani i a latou fanau laiti i le sauniunia o le lauga faitautusi. E mafai ona aofia ai ma lona faalogologo a o faataʻitaʻia e le tamaitiiti lana faitautusi, ma i lea itu, ia avatu ai se fautuaga aogā e fesoasoani ia te ia e faaleleia ai lana faitau. O le taimi atofaina, e faatagaina ai na o sina upu tomua puupuu, faapea ma ni upu faaiu talafeagai ua faatatauina ai manatu autū o le lauga. I lea ua atiina aʻe ai e le tagata aʻoga lona tomai e tautala atu ai ma le mautinoa mai se auivi.

⁶ Na talosaga atu i le tatalo le faisalamo e faapea: “Le Alii e, ia e faamatala mai oʻu laugutu; ona taʻutaʻu atu lea e loʻu gutu lou viiga.” (Sala. 51:15) Tau ia ina ia avea le faia o sa tatou vaega i le Aʻoga o le Faiva Faatiokarate ma fesoasoani ia i tatou e faamalieina ai lenei lava faanaunauga.