E Manaomia Ona Faalogo o Tatou Tuaoi i le Tala Lelei
1 O le finagalo o le Atua “ina ia faaolaina o tagata uma lava, ma ia oo ina iloa lelei le upu moni.” (1 Timo. 2:4) “O tagata uma lava” e mafai ona aofia ai o tatou tuaoi uma. O le faaooina atu ia i latou o le tala lelei, e manaomia ai le fesuisuiai o a tatou taulimaga ma ia manatu mamafa i mea atonu e fiafia i ai tagata taitoatasi tatou te feiloai. (1 Kori. 9:19-23) Ua saunia e le faalapotopotoga a Ieova meafaigaluega e mafai ona fesoasoani ia i tatou ina ia pāʻia ai loto o i latou o ē “ua saunia [mo] le ola faavavau.” (Galu. 13:48) Seʻi o tatou vaai pe mafai faapefea ona tatou faaaogā polosiua eseese ia Iulai ma Aokuso e faamalieina ai manaoga faaleagaga o o tatou tuaoi.
2 O Polosiua e Faamatilatila: I le lisi i lalo, o le a e maua ai ni fautuaga atonu e aogā pe a taulimaina nisi o polosiua. O fautuaga taitasi e aofia ai (1) se fesili faatupu manatu e amataina ai se talanoaga, (2) se faasinoga e mafai ona maua ai i le polosiua ni manatu mo talanoaga, ma lona (3) o se mau talafeagai e mafai ona faitauina a o faia le talanoaga. E mafai ona e faatumuina le taulimaga i au lava upu, e tusa ma le tali mai a le tagata. O le tele o polosiua, o loo taʻua ai se lomiga ua teʻa o La Tatou Faiva o le Malo, o iina o le a e maua ai se taulimaga e sili atu ona auiliili mai mo le polosiua.
Po o Silasila Alofa mai ea le Atua ia i Tatou?
O le ā se faamoemoe e te manatu o loo iai e fesoasoani atu ai i tagata o ē o loo mafatia i le faaleagaina?—Itulau 27-28, palakalafa 23-27; Isa. 65:17, 18; km 7/97 itu. 4.
Olioli i Le Ola i Le Lalolagi e Faavavau!
Pe na e tau mānatu ea po o ā mea o loo faia e Iesu Keriso i le taimi nei?—Ata 41-42; Faaa. 11:15; km 8/96 itu. 8.
O le Malo O le a na Aumaia Le Parataiso.
Pe e te fia iloa e uiga i le Malo lea na aʻoaʻo i tatou e Iesu ia tatalo i ai?—Itulau 3; Mata. 6:9, 10; km 8/96 itu. 8.
Pe a Maliu se Tasi e Pele i a te Oe.
Pe sa e tau mānatu ea i le auala e avatu ai se faamafanafanaga i sē ua maliu se tasi e pele ia te ia?—Itulau 26, palakalafa 2-5; Ioa. 5:28, 29; km 7/97 itu. 4.
Pe Ao ona E Talitonu i le Tolutasi?
Pe e tāua mo lo tatou lumanai lo tatou malamalama i le uiga moni o le Atua?—Itulau 3, palakalafa 3, 7-8; Ioa. 17:3.
3 Isi Polosiua: I le faaopoopoga o La Tatou Faiva o le Malo o Fepuari 1998, o loo lisiina mai ai isi lomiga, e aofia ai ma polosiua, ua fuafuaina faapitoa mo le faaaogaina e molimau atu ai i tagata lotu Puta, Hinitū, tagata Siū, ma Musalimi. Pe a talafeagai, e mafai ona ofo nei polosiua i tagata tatou te feiloai i ai. E mafai ona e autaluina fautuaga o loo i le itulau 4-6 o lena faaopoopoga faapea ma itulau e 13-16 o le tamai tusi Le Auala e Amata ma Faaauau ai Talanoaga Faale-Tusi Paia, ma fafau aʻe ai ni taulimaga pupuu e ono faagaee ai le fiafia o nei tagata.
4 Polosiua e Fai ai Suesuega Faale-Tusi Paia: E ao ona avea pea ma o tatou sini i le faiva le amataina o se suesuega faale-Tusi Paia, a lē i le uluai asiasiga po o se toe asiga mulimuli ane. I lena itu, ua ia i tatou ai polosiua nei e faigofie ona amataina ma faia ai suesuega faale-Tusi Paia i aiga:
O le ā e Manaomia e le Atua Mai ia i Tatou?
Pe na e iloa ea, i le na o le 30 minute pe itiiti ifo i vaiaso taitasi mo le 16 vaiaso, ae ua mafai ona e mauaina se malamalamaga faavae i le Tusi Paia?—Lesona 2, palakalafa 6; 2 Timo. 3:16, 17; km 3/97 itu. 4.
5 I le faataitaiga a Iesu i se tuaoi Samaria agalelei, sa ia faamanino atu ai e faapea, o se tuaoi moni, o le tagata lea o lē e faatinoina le alofa ma le agalelei e fesoasoani atu ai i se tasi ua mafatia. (Luka 10:27-37) O loo mafatia faaleagaga o tatou tuaoi. E manaomia ona latou faalogo i le tala lelei. Seʻi o tatou galulue soosoo tauʻau i le faia o le tiute tauave o le tufa atu lea ia i latou o le tala lelei, ma faamaonia ai o i tatou o soo moni o Iesu Keriso.—Mata. 24:14; Kala. 5:14.