Po o Māeʻaeʻa Ona E Faataunuuina Lau Faiva?
1 I le tusi o Galuega, o loo faailoa mai ai iā i tatou e faapea, na faataunuuina e soo o Iesu la latou faiva e ala i le “molimau māeʻaeʻa” atu i tagata. (Galu. 2:40, NW; 8:25; 28:23) E mautinoa lava o le sini lenā o le aposetolo o Paulo. (Galu. 20:24) Pe e lē o lou sini ea lenā i le avea ai o se faifeʻau o le tala lelei? E mafai faapefea ona e faia lenei mea?
2 Sauniuni Lau Taulimaga: Ina ia faamautinoa ua e avatu se molimau uigā i le faiva, e tāua tele le sauniuni. E tāua tele lenei mea aemaise lava pe a ofoina atu mekasini, auā e fesuisuiaʻi pea mataupu o talanoaga. Ina ia fesoasoani e faaauupegaina lelei i tatou, ua faailoa atu e lenei lomiga o La Tatou Faiva o le Malo se vala fou—o le vaega i le itu agavale, lea e avatu ai le lisi o taulimaga faataʻitaʻi mo mekasini fou o Le Olomatamata ma le Ala Mai! O se mataupu o le a fiafia i ai le toʻatele o tagata, o le a faamatilatila atu mo lomiga taʻitasi. E ono mafai faapefea ona e faalautele nei taulimaga pupuu?
3 Fili le mataupu e te manatu o le a sili ona aogā i lau oganuu. Ia faitau lelei le mataupu lea e faatomua, ma mātau ni manatu patino e foliga mai o le a faagaee ai le naunau. Saʻili se mau o loo sii mai i le mekasini e fesootaʻi ma le talanoaga ma e mafai ona e faitauina atu i lē e ona le fale. Faaopoopo i ai ma ni upu faaiʻu pupuu e faalaeiau ai lē e ona le fale e faitau le mekasini, ma se faamatalaga puupuu faapea, pe afai e talafeagai, e mafai ona fai sana foaʻi tauofo i le galuega a Molimau a Ieova i le lalolagi aoao. O lea, ia faataʻitaʻi lau taulimaga.
4 Fuafua e Faaaogā le Tusi Paia: O le fuafua lelei, e mafai ona faaaofia ai ma se mau i lau taulimaga. Mo se faaaʻoaʻoga, i le tele o nofoaga, o loo taulau ai tagata talaʻi e iai le poto masani i le ō atu lea i le talaʻiga ma le Tusi Paia e uu atu, ma faafeiloaʻi i lē e ona le fale i le faapea atu:
◼ “O loo matou tuufesili atu i tagata pe latou te talitonu i lenei manatu . . . ” Faitau le Kenese 1:1, ona e fesili atu lea: “E te ioe i lenā faamatalaga?” Afai e ioeina e le tagata ona e faapea atu lea: “Ou te ioe foʻi i ai. Ae peitaʻi, afai o lou manatu o le Atua na foafoaina mea uma lava, po o ia foʻi la na faapogaia amioga leaga?” Pe a uma ona faailoa mai le tali a le tagata, ona faitau lea o le Failauga 7:29. Suʻe le tusi o Le Poto i le itulau e 71, ma faitau le palakalafa e 2. Faalaeiau le tagata e faitau le tusi.
5 Toe Foʻi e Asi Tagata Uma na Faaalia le Fiafia: E lē mafai ona e matuā faataunuuina lau faiva pe afai e te lē toe foʻi e asi tagata fiafia uma na maua. Pe afai sa manaia se talanoaga na faia e tusa lava pe e te leʻi tuuina atu i ai ni mekasini po o se lomiga, ia faamau i lalo le igoa o le tagata ma lona tuatusi. Ia taumafai ma le filigā e faatupu le naunau o le tagata e ala i lou toe foʻi vave atu e asi. Ia mautinoa ua ofo i ai se suʻesuʻega faale-Tusi Paia.
6 Sa iloa e soo o le uluaʻi senituri na poloaʻiina i latou e Iesu “e avatu se molimau māeʻaeʻa.” (Galu. 10:42, NW) Ua faatatauina foʻi iā i tatou lenā lava poloaʻiga, auā e na o le pau lenā o le auala o le a mafai ai ona tatou faia soo. (Mata. 28:19, 20) Seʻi o tatou faia le mea aupito sili e tatou te mafaia ina ia faataunuuina ai ma le māeʻaeʻa la tatou faiva.—2 Timo. 4:5.