“Luluina Fatu o le Malo” i Alā Mekasini
1 O le matua o le Pese 133 i le tusi pese faa-Peretania, Sing Praises to Jehovah e faapea: “Luluina Fatu o le Malo.” O loo faavae mai i le faataoto a Iesu lea e faatusaina ai le galuega o le faia o soo i le luluina o fatu. (Mata. 13:4-8, 19-23) Ua faitauina faapenei upu o le pese: “O le tele o au fatu e paʻūū i le eleele lelei/E masani lava ona faalagolago tele ia te oe.” E mafai faapefea ona tatou faateleina le uigā o la tatou faiva? O le tasi o auala, o le faia lea o se alā mekasini ma tausisia pea.
2 E mafai ona ausia nisi o sini i le faia o ni alā mekasini. (1) O le asiasi atu e lē aunoa pe a mavae le lua vaiaso, o le a mafai ai ona e ati ae se faiā faaleuo ma le tagata fiafia. (2) Ia e avatua e lē aunoa i lena tagata faamatalaga faasaoola o loo maua i Le Olomatamata ma le Ala Mai! (3) E ala i a oulua talanoaga, o le a mafai ai ona e fesoasoani i le tagata e faatupu se naunau mo le upu moni o le Tusi Paia, lea e mafai ona iu ai i le faia o se suesuega faale-Tusi Paia.—1 Pete. 2:2.
3 Le Auala e Amata ai se Alā Mekasini: Pe a faaalia e se tasi le fiafia i mekasini, faamatala i ai faapea, e iai mataupu iloga i lomiga uma, ma o le a e fiafia e faaooina atu mekasini ia i latou pe a mavae le tailua vaiaso uma lava. Pe a e tuua le fale, ia faamau i lalo le igoa o le tagata ma le tuatusi, le aso o le asiasiga, aso o lomiga ia na tuu, le mataupu na faatomua, ma mataupu na fiafia faapitoa i ai le tagata.
4 E mafai ona e amataina se alā mekasini i na o ni nai tagata. Ia ona e galue lea ina ia faateleina e ala i le faaopoopo i ai o isi o ē na e tuua ai mekasini. A o faateleina lau alā mekasini, e mafai ona e faavasega le mea e tutū ai ina ia faigofie ona galueaiina maeaea. Ia tausia lelei se faamaumauga o lomiga na tuuina atu i asiasiga taitasi ma le aso. Faaopoopo i ai ni faamatalaga e uiga i a oulua talanoaga ma le auala e faaauau ai ona faatupuina le fiafia o le tagata i le upu moni i le isi asiasiga.
5 Ia Faaaofia ai Tagata Faipisinisi ma Tagata e Galulue i ni Matata Faapitoa: Ua faaalia i mea tutupu e faapea, o faatauoloa ma isi tagata e faigaluega i matata faapitoa, e foliga mai e fiafia e maua pea e lē aunoa a tatou mekasini. O se tasi o toeaina, sa oo lava ina faia sana alā mekasini i le pulenuu o lona nuu. Na amataina e se tagata talaʻi se suesuega ma se tamaloa e 80 tausaga le matua, o lē e ona se kamupanī e sapalaia meafaufale, ina ua atoa lelei le sefulu tausaga sosoo o avatu pea i ai e le tagata talaʻi mekasini!
6 Na ulufale atu se tuafafine paeonia i se faleoloa ma feiloai ai ma se ulugalii o ē na lē talileleia o ia. Ae peitai, talu ai sa la talia mekasini, sa ia filifili ai e faaopoopo le ulugalii i lana alā mekasini. I se taimi, na manao ai le tuafafine e faamuta le toe alu atu ia i laʻua ma mekasini ona e lē faaleuo i laʻua ma e lē tāitai lava ona fia talanoa tele, e oo lava i lona fesili atu o se fesili faatupu manatu. Ae sa tatalo atu le tuafafine e tusa ai ma le mataupu ma na iu ai ina tuuina atu le tusi Ola e Faavavau i le ulugalii. Ina ua maeʻa ona faitau i ai, na faapea mai ma le maofa le fafine: “O lenei la, ua faatoʻā ou maua le upu moni!” Na amataina se suesuega faale-Tusi Paia, ma mulimuli ane, na papatisoina ai le ulugalii. O le maumauai o le paeonia na iu moni ai ina maua se fua lelei.
7 Faia o Toe Asiga: Pe a e mauaina se mekasini fou, ia faitau mataupu uma. Vaavaai mo ni manatu o le a fetaui lelei ma tagata taitoatasi i lau alā mekasini. Ia, pe a e toe foi atu, e mafai ona e faapea atu: “A o oʻu faitauina lenei mataupu, sa ou mafaufau lava ia te oe ma atonu o le a e fiafia i ai.” E mafai e tagata talaʻi i so o se matua lava ona olioli i le faia o se alā mekasini. E oo lava i se tamaitiiti laitiiti e mafai ona ia faapea atu: “Ua ou fiafia lava e toe feiloai ma oe. O lea ua taunuu mai au kopi fou o Le Olomatamata ma le Ala Mai! Ou te iloa o le a e fiafia i le mataupu lenei e faapea . . . ”
8 Ia faagaee le talisapaia mo mekasini fou i lou faaali i ai o le pusa lea e faapea mai “I le Lomiga o Sosoo Mai.” Pe a aumaia mataupu o ni mataupu faasolo, ia faasino i ai ma ia faalaeiau le tagata faitau ina ia aua neʻi misia se vaega o lea mataupu. Aua neʻi galo, o taimi taitasi e te avatua ai mekasini i se tagata o loo i lau alā mekasini, e mafai ona faitau o se toe asiga. Ma i mea uma lava, ia manatua o lo tatou sini, o le taumafai lea ina ia faia nei toe asiga e avea o ni suesuega faale-Tusi Paia i aiga.
9 Asiasi e Lē Aunoa i Tagata i Lau Alā Mekasini: E mafai ona e galueaiina lau alā mekasini i so o se taimi e talafeagai—i le taeao o se aso o le vaiaso, i le afiafi, afiafi po, po o le faaiuga o le vaiaso pe a uma le galuega talaʻi mai lea fale i lea fale. Afai ua lē mafai ona e galueaiina lau alā mekasini ona ua e maʻi pe alu foi i se faiga malologa, ia talosaga atu i se tasi tagata talaʻi o lou aiga po o le faapotopotoga e na te aveina mekasini mo oe. I lena auala, o le a mafai ai e i latou i lau alā mekasini ona maua pea a latou mekasini i le taimi tatau.
10 O le tasi o auala e lūlū ai fatu o le Malo, o le avatu lea e lē aunoa o Le Olomatamata ma le Ala Mai! ia i latou uma o i lau alā mekasini. A o e aʻoaʻoina i latou i upu moni o le Tusi Paia, atonu o le a mafai ai ona latou lagona le uiga o le upu o le Malo ma mulimuli ane fua mai ai ni fua o le Malo faatasi ma oe.—Mata. 13:8, 23.