Molimau Atu e Aunoa ma ni Upu
1 E aunoa ma se upu e fai atu, ae o loo manino ona faailoa atu e mea na faia e Ieova ona uiga lē vaaia. (Sala. 19:1-3; Roma 1:20) I se tulaga tutusa, o a tatou amio lelei, o uiga faa-Kerisiano, ma le lelei o o tatou foliga vaaia, e avatu ai se molimau e aunoa ma ni upu. (1 Pete. 2:12; 3:1-4) E ao ona avea ma o tatou faanaunauga le “viia ai i mea uma lava . . . le aʻoaʻoga a le Atua lo tatou Faaola” i le auala tatou te amioaʻi ai.—Tito 2:10.
2 E mafai faapefea e tagata lē lelei atoatoa ona faatosina tagata i aʻoaʻoga a le Tusi Paia? E mafai ona fai e ala i le taʻitaʻiga a le Afioga a le Atua ma le agaga paia. (Sala. 119:105; 143:10) O “loo ola le afioga a le Atua, o loo matuā galue foʻi, o loo sili foʻi lona maai i pelu uma e faatau maai itu.” (Epe. 4:12) E ati atu i totonu o i tatou ma mafai ai ona tatou oofu i le tagata fou. (Kolo. 3:9, 10) E faapogaia e le agaga paia iā i tatou uiga lelei, e pei o le mataalofa, o le agalelei, agamalu, ma le lē gaoiā. (Kala. 5:22, 23) Po o tatou faatagaina ea le afioga a le Atua ma lona agaga e taaʻina o tatou olaga?—Efe. 4:30; 1 Tesa. 2:13.
3 E Mātau Mai e Isi: Pe a tatou ola e tusa ai ma tapulaa a Ieova, ma taumafai e faaatagia atu ona uiga, e mautinoa la e mātau mai e isi. Seʻi manatu mai mo se faataʻitaʻiga, o se tamāloa na ula i ai tagata latou te faigaluega ona o le fitipuu. Ae o le tuafafine e faigaluega i le ofisa lava lenā, sa ia faaalia e lē aunoa le āva ma le faaaloalo i le tamāloa lenei. Na uunaʻia ai le tamāloa lea e fesili atu i le tuafafine pe aiseā ua ese ai o ia. Na ia tali atu faapea o lana amio faaaloalo e māfua ona o le faatatauina o mataupu silisili o le Tusi Paia i lona olaga. Sa ia taʻu atu foʻi i le tamāloa le faamoemoe ofoofogia o le Malo. Na amata le suʻesuʻega faale-Tusi Paia a le tamāloa ma oo ai ina agaʻigaʻi i luma seʻia oo ina papatiso. Ina ua ia toe foʻi atu i lona atunuu, na faagaeetia ona tauaiga ona o lana amio lelei ma e iai nisi o i latou na taliaina le upu moni.
4 Pe i le galuega, i le aʻoga, po o le feagai foʻi ma tagata o le aiga ma tuaoi, e mafai ona avea a tatou amio lelei, ma la tatou molimau atu e faapogaia ai isi, e avatu le viiga i le Atua.—Mata. 5:16.