Se Sini Aogā mo le Tausaga Fou Faaleauaunaga

1. O le ā se sini e ao ona tatou faatulaga mo le tausaga fou faaleauaunaga?

¹ Ina ia tatou agaʻigaʻi i luma faaleagaga, e manaʻomia ona faatulaga ni o tatou sini faaleagaga. O ā ni ou sini ua faatulaga mo le tausaga fou faaleauaunaga? O se tasi o sini aogā, o le paeonia lagolago mo le tasi le masina pe sili atu foʻi. Talu ai o lenei auaunaga fiafia e masani ona manaʻomia ona muaʻi fuafua lelei, o le taimi la lenei e sauniuni ai. Aiseā ua avea ai le paeonia lagolago o se sini aogā?

2. Aiseā ua avea ai le paeonia lagolago o se sini aogā?

² Māfuaaga e Paeonia Lagolago Ai: O le avea ma paeonia lagolago, o le a mafai ai ona tatou “faasilisili pea” i le faafiafiaina o lo tatou Tamā i le lagi, e ala i le faateleina o lo tatou taimi i le faiva. (1 Tesa. 4:1) Pe a tatou manatunatu i le tele o mea ua faia e Ieova mo i tatou, o le a uunaʻia ai i tatou e taʻu atu i isi e uiga iā te ia. (Sala. 34:1, 2) E mātauina ma faatāua e Ieova a tatou taumafaiga maelega i le faia o se sao tele i le galuega talaʻi. (Epe. 6:10) O le iloaina e tatou te faafiafia Ieova ona o lo tatou maelega i le galuega talaʻi, o le a tatou lagona ai le fiafia.—1 No. 29:9.

3, 4. E faapefea ona tatou maua aogā mai le paeonia lagolago?

³ E masani ona faigofie ma e fiafia e fai se mea, pe a fai ma au masani lou faia o lenā mea. O le faaalu o se taimi tele i le talaʻiga, o le a e lagona ai le loto tele ma le mautinoa e talaʻi mai lea fale i lea fale. O le a e maua ai le tomai e amata ni talanoaga ma le faaaogāina o le Tusi Paia. O le tele o lou talanoa i isi e uiga i ou talitonuga, o le malosi foʻi lenā o lou faatuatua. O le toʻatele sa lē mafai ona faia ni suʻesuʻega faale-Tusi Paia, sa mafai ona latou amataina ni suʻesuʻega a o paeonia lagolago.

⁴ E mafai e le paeonia lagolago ona faalaeiauina i tatou e aua neʻi vaivai faaleagaga. Ona o le mafaufau i le tele o lona taimi sa faaalu i lana galuega totogi, na filifili ai se uso sa avea muamua ma paeonia sauatoa e ave sana paeonia lagolago mo le tasi le masina. Na ia faapea mai: “Sa ou maofa i le auala na faamalosia ai loʻu itu faaleagaga i lenā masina! Na ou filifili e faaauau pea ona ou paeonia lagolago, ma ua mafai ai ona ou toe ausiaina le paeonia sauatoa.”

5. E faapefea ona tatou foʻiaina le manatu tatou te lē agavaa?

⁵ Foʻiaina o Faafitauli: E faatalatū nisi e talosaga atu mo le paeonia lagolago ona latou te manatu e leʻi lava so latou tomai i le avea ma tagata talaʻi. Afai o le tulaga lenā o taofia ai oe, e mafai ona fesoasoani Ieova iā te oe e pei ona sa ia faia iā Ieremia. (Iere. 1:6-10) E ui lava sa faapea mai Mose, “ua lē matala loʻu gutu, ua lē matala foʻi loʻu laulaufaiva,” ae sa faaaogā o ia e Ieova e faataunuu Lona finagalo. (Eso. 4:10-12) Pe afai ua e manatu e te lē agavaa, talosaga iā Ieova ia e maua le loto tele.

6. E ono faapefea ona paeonia lagolago se tasi e ui lava ina iai faafitauli i lona soifua mālōlōina po o le tele o mea e fai?

⁶ Po o e faatalatū e talosaga atu ona o faafitauli i lou soifua mālōlōina, pe ona o le tele o au mea e fai? Afai ua lē o atoatoa lelei lou malosi, e ono mafai lava ona e paeonia lagolago pe a e galue fuafua e tusa ma lou malosi. Afai e tele au mea e fai, e te ono tuu nisi mea e lē tāua tele e fai i le isi masina. O nisi e faigaluega totogi, ua mafai ona latou maua se taimi e paeonia lagolago ai e ala i le ave o se aso mālōlō se tasi pe lua foʻi.—Kolo. 4:5.

7. Aiseā e aogā ai le tatalo i lou faanaunauga e fia paeonia lagolago?

⁷ Le Auala e Fai Ai: Ia tatalo e faatatau i lou faanaunauga e fia paeonia lagolago. Ia talosaga atu iā Ieova e faamanuia au taumafaiga ina ia faatele sou sao i le faiva. (Roma 12:11, 12) E mafai ona ia fesoasoani iā te oe i le faia o ni filifiliga atamai i le auala e fetuunaʻi ai lau faasologa. (Iako. 1:5) Afai ua tau mou atu lou maelega, ia ōle atu iā Ieova e fesoasoani iā te oe ia e maua le fiafia i le galuega talaʻi.—Luka 10:1, 17.

8. E faapefea ona fesoasoani iā te oe le faatatauina o le Faataoto 15:22 ina ia e paeonia lagolago ai?

⁸ E tatau i le aiga ona talatalanoa faatasi e faatatau i lenā sini. (Faata. 15:22) Atonu e mafai ona paeonia lagolago se toʻatasi ae lagolagosua i ai isi sui uma o le aiga. Ia talanoa ma isi i le faapotopotoga e faatatau i lou faanaunauga e fia paeonia, aemaise lava i latou e tutusa outou tulaga. O le faia faapea o le a mafai ai ona faatupu aʻe lou naunau i le auaunaga faapaeonia.

9. O lē fea masina o le a e filifili e te paeonia lagolago ai?

⁹ A o e iloiloina lau faasologa mo le faiva i le tausaga fou faaleauaunaga, o āfea o e fuafua e te paeonia lagolago ai? Afai e te galue totogi po o e aʻoga, e te ono fuafua e paeonia i masina e iai aso mālōlō, pe e tuua ai aʻoga, po o masina e taʻi lima faaiʻuga o vaiaso. Mo se faaaʻoaʻoga, o Setema, Tesema, Mati ma Aokuso e taʻi lima faaiʻuga o vaiaso. E lima Aso Toonai o le masina o Me, ae lima Aso Sa o le masina o Iuni. Pe a iai ni ou faafitauli tau le soifua mālōlōina, ia vaai masina e masani ona lelei ai le tau e paeonia ai. E te ono fuafua foʻi e paeonia i le masina o le asiasiga a le ovasia matagaluega i le tou faapotopotoga. A o faia lana asiasiga, o le a e maua se avanoa e auai i le amataga o le fono mo paeonia sauatoa. Talu ai o le Faamanatuga e paʻū tonu iā Mati 22 o le tausaga fou, e talafeagai ai la le paeonia lagolago iā Mati, Aperila, ma Me. O le taimi lava e te filifilia ai se masina po o ni masina e te paeonia lagolago ai, ia amata loa ona fai sau faasologa e fesoasoani iā te oe ia ausia itula manaʻomia.

10. O le ā e ao ona e faia pe a lē mafai ona e paeonia lagolago?

¹⁰ E tusa lava pe e te manatu e lē mafai ona e paeonia lagolago a o faagasolo le tausaga fou faaleauaunaga, e mafai lava ona e maelega i le faiva. Ia faaauau pea ona fai mea uma lava e te mafaia i le galuega talaʻi, ma ia e mautinoa e faafiafiaina Ieova ona o au taumafaiga maelega e faia le mea sili e te mafaia i lau auaunaga. (Kala. 6:4) Ia lagolagosua ma faamalosiau i ē ua mafai ona paeonia lagolago. Atonu e fetuunaʻi lau faasologa masani ina ia iai se aso o le vaiaso tou te galulue ai ma paeonia.

11. Aiseā e tatau ai ona tatou lagona le faanatinati?

¹¹ Ua iloa e tagata o Ieova le faanatinati o o tatou taimi. O loo iai le galuega e ao ona latou faataunuuina—le talaʻiina o le tala lelei. Ua i se tulaga lamatia ola o tagata, ae ua utiuti le taimi o totoe. (1 Kori. 7:29-31) O lo tatou alofa mo le Atua atoa ma tagata o le a uunaʻia ai i tatou e faia le mea sili tatou te mafai i le faiva. E ala i taumafaiga ma le fuafua lelei, tatou te ono mafai ai ona paeonia lagolago e tusa lava pe tasi se masina a o faagasolo le tausaga fou faaleauaunaga—ioe, o se sini aogā tele!