AUALA E OLA AI O SE KERISIANO

Vala Fou o le Sauniga Amata o le Vaiaso

E amata atu iā Ianuari 2018, o le a aofia i sauniga amata o le vaiaso faamatalaga mo suʻesuʻega, ma ata mai le Tusi Paia mo Suʻesuʻega o le Faaliliuga a le Lalolagi Fou (nwtsty) lea e maua i le Initaneti, e tusa pe e leʻi maua le Tusi Paia mo suʻesuʻega i la outou gagana. E mautinoa o le a aogā nei faamatalaga i au sauniuniga mo le sauniga. Ae sili ona tāua, tau ina ia atili ai ona e vavalalata i lo tatou Tamā alofa o Ieova.

FAAMATALAGA MO SUʻESUʻEGA (STUDY NOTES)

O le a tatou malamalama ai i faamatalaga e faatatau i aganuu, vaipanoa, ma gagana o loo taʻua ma faaaogā i mau o le Tusi Paia.

Mataio 12:20

Vavae ua mū itiiti: O lamepa sa tele ina faaaogā i fale o aiga, o se tamaʻi ipu omea e faatumu i le suāuu olive, ma e mimiti e le vavae o le molī le suāuu ina ia faaauau ai ona mūmū. O le faaupuga Eleni “vavae ua mū itiiti,” atonu e faasino atu i se vavae ua amata ona asu ona ua faasolo ina pē po ua tineia foʻi. Ua faailoa mai e le valoaga i le Isaia 42:3 le alofa mutimutivale o Iesu; e na te lē tineia sina faamoemoe o iai i tagata lotomaulalo ma lotomafatia.

Mataio 26:13

E moni: O le upu Eleni a·menʹ e maua mai i le upu Eperu ʼa·menʹ, o lona uiga “ia faia faapea” pe “e mautinoa.” Sa tele ina faaaogā e Iesu lenei faaupuga e faatomua ai se faamatalaga, folafolaga, po o se valoaga, ina ia faamamafa ai le moni ma le maufaatuatuaina o lenā faamatalaga. O le faaaogā e Iesu o le faaupuga “e moni” po o le amene i lenei auala, ua tutasi ai i tusitusiga paia. I le tusi o le Evagelia a Ioane, e iai taimi e sosoo ai ona taʻua e Iesu le faaupuga “e moni,” ma ua faamamafa atili ai le moni ma le maufaatuatuaina o ana fetalaiga.—Ioa 1:51.

ATA (MEDIA)

E aofia ai ata, vitiō e leai ni leo, ma ata tusi e faailoa mai ai faamatalaga o loo i le Tusi Paia.

Petefake, le Mauga o Olive, ma Ierusalema

O lenei vitiō puupuu o loo faailoa mai ai le auala e agaʻi i Ierusalema, pe a malaga mai i le itu i sasaʻe mai i le nuu o et-Tur i aso nei—e foliga mai o Petefake lea i taimi o le Tusi Paia—seʻia oo i le mauga o Olive. O Petania e i le itu i sasaʻe o Petefake i le itu i sasaʻe o le mauga o Olive. Pe a iai Iesu ma ona soo i Ierusalema, e masani ona latou nonofo i le pō i Petania, lea ua iloa i aso nei o le aai o el-ʽAzariyeh (El ʽEizariya), o se igoa Arapi o lona uiga “Le Nuu o Lasalo.” E mautinoa sa nofo Iesu i le fale o Mareta, Maria ma Lasalo. (Mat 21:17; Mar 11:11; Lu 21:37; Ioa 11:1) Atonu e taitutusa le auala o loo faaalia i le vitiō, ma le auala na uia e Iesu pe a malaga mai i le fale o Lasalo agaʻi i Ierusalema. Iā Nisani 9 i le 33 T.A., ina ua tiʻetiʻe Iesu i le tama a se asini i le mauga o Olive agaʻi i Ierusalema, e foliga na malaga mai o ia mai i Petefake.

Auala mai Petania agaʻi i Petefake
Petefake
Mauga o Olive
Alia o Ketarono
Vaipanoa o le Malumalu

Fao i le Ponaivi o le Mulivae

I le 1968, na maua ai i suʻesuʻega o toega o mea i Ierusalema i mātū, se ponaivi o le mulivae o loo tutuʻi ai se fao e 11.5 senitimita (4.5 inisi) le umī, ma o se mea e mai i le taimi o Roma. O loo faaalia i le ata se kopi na fausia o le ponaivi na maua. Ua faamaonia mai ai na faaaogā fao i taimi o faasalaga, e tutuʻi ai se tagata i le laau e faasala ai. Atonu e taitutusa lenei fao ma fao na faaaogā e fitafita Roma e tutuʻi ai Iesu Keriso i le laau. Na maua lenei ponaivi i se pusa sa tuu ai ponaivi mamago o se tagata oti pe a uma ona pala lona tino. E faailoa mai ai na mafai ona tanu i latou na fasiotia i luga o se laau.—Mat 27:35.