Ganhuro 22
Pfuurira Kutaura Shoko raMwari Noushingi
1. (a) Ko vadzidzi vaJesu vakaparidzira mashokoi akanaka kutangira paPentekosta ya 33 N.V., asi chii chakava kuita kwavabati ushe navarume vakuru vavaJudha? (b) Mibvunzoiko yatingazvibvunza timene pamsoro paikoku?
ZVINOITIKA zvinoisvokosha mumakore anopfuura 4 000 enhau yomunhu zvakaitika. Mwanakomana waMwari amene, Jesu Kristu, akazodzwa saMambo womunguva yemberi pamsoro papasi rose. Pasinei hapo nokuurawa kwaJesu pakugombedzera kwavavengi vorudzidziso, Jehovha akanga akamutsa Mwanakomana wake muvakafa. Kupfurikidza naye ruponeso rwakabvira mukurangarira upenyu husingaperi. Asi apo vadzidzi vakatendeka vaJesu vakazivisa pamhene aya mashoko akanaka, chishoro chinotyisa chakaitika. Kutanga, vaviri vavaapostora vakapfigirwa mutorongo, tevere ivo vose. Vakarohwa ndokurairwa kurega kutaura pamsoro pohwaro hwezita raJesu. (Mab. 4:1-3, 17; 5:17, 18, 40) Chii chavaifanira kuita? Waizodai wakaitei? Waizodai wakapfuurira kuparidzira noushingi here?
2. (a) Ndaapi anotova mashoko anoshamisa zvikuru anodikanirwa kuparidzirwa muzuva redu? (b) Ndivanaani vano mutoro wokukuita?
2 Mugore ra 1914 N.V. chimwe chinoitika chinotoshamisa zvikuru chakaitika. Umambo hwaMwari hunodzorwa naJesu Kristu zvamazvirokwazvo hwakagadzwa mudenga. Tevere, Satani namadhemoni ake vakaburutsirwa kupasi. (Zvak. 12:1-5, 7-12) Mazuva okupedzisira etsika ino yakaipa akanga avamba. Chizvarwa chakapupurira zvinoitika zva 1914 chisati chafa, Mwari achaputsanya tsika yose yezvinhu yaSatani. (Mat. 24:34) Vapukunyuki vachava nekariro youpenyu husingaperi pamberi pavo. Mukuzadzika kwedonzo rapakuvamba raMwari, pasi rose richava Paradhiso. Kana wakatogamuchira aya mashoko akanaka, une mutoro wokuagovera kuna vamwe. (Mat. 24:14) Asika idavidzoiko yaungakarira?
3. (a) Ko vanhu vanodavidza sei shoko roUmambo? (b) Naizvozvo, mubvunzoi watinofanira kunangana nawo?
3 Kunyange vamwe vanhu vangakugamuchira noushamwari somuparidzi woUmambo, voruzhinji vachangova havo vasingakendengi. (Mat. 24:37-39) Vamwe vangakunyomba kana kuti vangakushora zvakakasharara. Jesu akanyevera kuti chishoro chakati kuti chingamuka muhama dzako umene dzokunyama. (Ruka 21:16-19) Chingananganwawo nacho kunzvimbo yako yebasa kana kuti kuchikoro. Mumativi mazhinji apasi Zvapupu zvaJehovha zvinotova mukurambidzwa kusina kururama kwehurumende. Paunonangana neipi neipi kana kuti yose yemigariro yakadaro, uchapfuurira kutaura Shoko raMwari noushingi here?
4. Ko kurunda kwomunhu kunosimbisira kuti tichapfuurira kubatira Mwari mukutendeka here?
4 Mukusapanikira, unoda kuva mubatiri waMwari anoushingi. Asika, vamwe vairangarira kuti hakuna chinhu chaigona kuvadzosera shure vakarega kuva pamitsara yavaparidzi voUmambo. Mukusiana, vamwe, kubatanidza vanhu vanenge vanoti ityei kupfurikidza nomuzvarirwo, vanopfuurira vasingaregi kuva vabatiri vaMwari vanoshingaira. Ko ungabvumikisa sei kuva mumwe aka“tsiga mukutenda”?—1 VaK. 16:13.
Kusatsamira Pasimba Redu Timene
5. (a) Kuzvibvumikisa timene kuva vabatiri vakatendeka vaMwari, chii chiri chinodikanwa chikuru? (b) Neiko misangano ichikosha zvikuru?
5 Chokwadika, kune zvikonzero zvizhinji zvinobatanidzwa mukuva mubatiri akatendeka waMwari. Asika chikuru chazvo zvose ndiko kutsamira pana Jehovha negadziriro dzake. Ko tinoratidzira sei rutsamiro rwakadaro? Imwe nzira ndiyo iri kupfurikidza nokupinda misangano yeungano. Magwaro anotikuchidzira kusairegeredza. (VaH. 10:23-25) Avo vakapfuurira kuva Zvapupu zvaJehovha zvakatendeka, kunyange mukunangana nokusaitira hanya kwapamhene kana kuti nechitambudzo, ivo vamene vakarwisa kuti vagova venguva dzose mukupinda misangano navanamati biyavo. Pamisangano iyeyo kuziva kwedu Magwaro kunowedzera, asika hakuzati kuri kungoyevedzwawo zvako nezvinhu zvitsva kunotinakidza. (Enzanisa Mabasa 17:21.) Kunzwisisa kwedu zvokwadi dzinozivikanwa kunowedzera, uye kuziva kwedu nzira dzokudzishandisa nomadziri kunokura. Muenzaniso watakagadzirwa naJesu unova wakarovererwa zvikurukuru pandangariro yedu nomwoyo. (VaEf. 4:20-24) Tinoswededzwa pedyo nehama dzedu dzechiKristu mukunamata kwakabatana uye isu timene tinosimbaradzwa kupfuurira kuita kuda kwaMwari. Mudzimu waJehovha unogovera nhungamiro kupfurikidza neungano, uye kupfurikidza nomudzimu iwoyo Jesu ari pakati pedu patinoungana muzita rake.—Zvak. 3:6; Mat. 18:20.
6. Uko Zvapupu zvaJehovha zvinorambidzwa, chii chinoitwa nemisangano?
6 Ko unogaropinda misangano yose uye iwe umene unoshandisa zvaunonzwa zvichikurukurwa here? Dzimwe nguva, mukurambidzwa, kwakava kuri madikanwa kuita misangano mumapoka maduku mumisha. Nzvimbo nenguva zvingava zvakasiana-siana uye ingave isina kukodzera nguva dzose, mimwe misangano ichiva inoitwa pakati pousiku. Asi, pasinei hapo nechinetso chomunhu mumwe nomumwe kana kuti ngozi, hama nehanzvadzi dzakatendeka dzinoratidzira nhamburiko yokudisisa kuvapo nokuda kwomusangano mumwe nomumwe.
7. (a) Ko tinoratidzirazve sei rutsamiro rwedu pana Jehovha? (b) Ko ikoku kunogona kutibetsera sei kupfuurira kutaura noushingi?
7 Rutsamiro pana Jehovha runoratidzirwawo kupfurikidza nokutendeukira kwaari mumunyengetero—kwete somuitirowo zvawo womurairo, asi pano kuziva kunobva mumwoyo kwokuti tinoda betsero yaMwari. Unoita izvozvo here? Jesu akanyengetera anyengeterazve mukati mohushumiri hwake hwapasi. (Ruka 3:21; 6:12, 13; 9:18, 28; 11:1; 22:39-44) Uye pausiku pamberi pokurovererwa kwake iye akakuchidzira vadzidzi vake, kuti: “Rindai muchinyengetera, kuti murege kupinda mumuedzo.” (Marko 14:38) Kana tikanangana nokusaitira hanya kukuru shoko roUmambo, pangava nomuedzo wokuderera muushumiri hwedu. Kana vanhu vachitinyomba kana kuti kana pachitova nechitambudzo chikukutu zvikuru, tingatoedzwa kunyarara kuti tigokudzivisa. Asi kana tikanyengeterera zvikurusa mudzimu waMwari kutibetsera kupfuurira kutaura noushingi, tichataviridzirwa pakukurirwa nomuedzo iwowo.—Ruka 11:13; VaEf. 6:18-20.
Chinyorwa Chokupupurira Noushingi
8. (a) Neiko chinyorwa chiri muna Mabasa chiri chefariro chaiyo kwatiri? (b) Pindura mibvunzo inogoverwa pakuguma kwendima ino, uchisimbisa kuti mashokowo anogona kutibetsera sei?
8 Chinyorwa chiri mubhuku raMabasa ndechefariro chaiyoiyo kwatiri tose. Chinozivisa kuti vaapostora navamwe vadzidzi vapakuvamba, vanhu vakanga vane mirangariro yakafanana neyedu vakakurira sei mhinganidzo ndokubvumikisa kuva zvapupu zvinoushingi nezvakatendeka zvaJehovha. Ngatinzverei chikamu chechinyorwa ichocho kupfurikidza neyamuro yemibvunzo inotevera namagwaro akarongwa. Zvatinoita kudaro, rangarira kuti iwe somunhu oga unogona kubetserekana sei nezvauri kurava.
Ko vaapostora vakanga vari vanhu vakadzidza zvikuru here? Ko ivo vaiva avo kupfurikidza nomuzvarirwo vakanga vasingatyi here, pasinei hapo nezvakaitika? (Mabasa 4:13; Johane 18:17, 25-27; 20:19)
Chii chakagonesa Petro kutaura noushingi pamberi pedare rechiJudha rakanga razvidza Mwanakomana waMwari amene asati ari mavhiki mazhinji pakuvamba-vamba? (Mabasa 4:8; Mat. 10:19, 20)
Ko vaapostora vakanga vave vachiitei mavhiki apamberi pokuunzwa kwavo pamberi pedare raMakurukota? (Mabasa 1:14; 2:1, 42)
Apo vabati ushe vakavaraira kurega kuparidzira pahwaro hwezita raJesu, ko Petro naJohane vakapindura kutii? (Mabasa 4:19, 20)
Pashure pokusunungurwa kwavo, ivo vakatsvakazve betsero kunaani? Ko ivo vakamukumbira kugumisa chitambudzo here, kana kuti chii? (Mabasa 4:24-31)
Ko Jehovha akagovera betsero kupfurikidza nomutooi apo vashori vakaedza kumisa basa rokuparidzira? (Mabasa 5:17-20, 33-40)
Ko vaapostora vakaratidza sei kuti vainzwisisa chikonzero chokuti ivo vakanga vanunurwa? (Mabasa 5:21, 41, 42)
Kunyange apo vazhinji vavadzidzi vakanga vakapararira nokuda kwoukuru hwechitambudzo, ivo vakapfuurira kuitei? (Mabasa 8:3, 4; 11:19-21)
9. (a) Miuyoi inofadza yakabva muhushumiri hwavadzidzi vaya vapakuvamba? (b) Ko isu takazova vanobatanidzwa sei?
9 Basa ravo pamsoro pamashoko akanaka rakanga risati riri risina maturo. Vanenge vadzidzi vane 3 000 vakanga vabhapatidzwa paPentekosta ya 33 N.V. “Vadaviri muna Ishe vakapfuurira kuwedzera, vazhinji zhinji vavarume navakadzi.” (Mabasa 2:41; 4:4; 5:14) Mukufambira mberi kwenguva kwakashumwa kuti kunyange mumwe wavatambudzi ano utsinye zvikuru, Sauro weTarso, akanga ava muKristu uye iye amene akanga achipupurira noushingi zvokwadi. Iye akazova anozivikanwa kuva muapostora Pauro. (VaG. 1:22-24) Basa rakavamba muzana rokutanga ramakore harina kumira. Rakawedzera zvikuru mu“mazuva okupedzisira” ano uye rakasvika mumativi ose apasi. Tine ropafadzo yokupinda mariri, uye sezvatinoita kudaro tinogona kudzidza mumuenzaniso wakagadzwa nezvapupu zvinovimbika zvakabatira pamberi pedu.
10. (a) Ko Pauro akashandisa mabanzai mukupupurira? (b) Ko iwe unoparadzira shoko roUmambo kuna vamwe munzirai?
10 Apo Pauro akadzidza zvokwadi pamsoro paJesu Kristu, haana kusundira mberi. “Pakarepo . . . iye akavamba kuparidza Jesu, kuti Iyeyu Mwanakomana waMwari.” (Mabasa 9:20) Akanzwisisa tsitsi dzakakomba dzaMwari dzaakaitirwa uye akaziva kuti munhu ari wose aida mashoko akanaka aakanga agamuchira. Mukuwirirana netsika yomuzuvaro, sezvo iye akanga ari muJudha akaenda kumasinagoge, dzaiva nzvimbo dzechiJudha dzegungano ravose, kundopupurira. Iye akaparidzirawo paimba neimba uye achirangarira navanhu mumusika. Uye iye akanga achidisisa kutamira mundima itsva kundoparidza mashoko akanaka.—Mabasa 17:17; 20:20; VaR. 15:23, 24.
11. (a) Ko Pauro akaratidzira sei kuti, kunyange aiva noushingi, iye akacherekedzawo nzira yaaipupurira nayo? (b) Ko tingaratidzira sei vara irero pakupupurira kuhama dzokunyama, kuvashandi biyedu kana kuti vatinofunda navo?
11 Pauro akanga anoushingi, asi akanga achicherekedzawo, sezvatinofanira kuva. Kuna vaJudha iye akaudzisira pamsoro pehwaro hwezvipikirwa zvakaitwa naMwari kuna madzisekuru avo. KuvaGiriki iye akataura pamsoro pehwaro hwezvinhu zvavakanga vakarovedzana nazvo. Padzimwe nguva aishandisa chinoitika chake amene mukudzidza zvokwadi somutoo wokupupurira nawo. Sokutsanangura kwaakaita, kuti: “Ini ndinoita zvinhu zvose nokuda kwamashoko akanaka, kuti ini ndigova mugoveri wao kuna vamwe.”—1 VaK. 9:10-23; Mabasa 22:3-21.
12. (a) Kunyange zvazvo akanga ano ushingi, ko Pauro akaitei kuti agodzivisa kugombedzera kunangana kunopfuurira navashori? (b) Ndiriini patingatevedzera nokuchenjera muenzaniso iwowo, uye sei? (c) Ko simba rokupfuurira kutaura noushingi rinobva kupi?
12 Apo chishoro chamashoko akanaka chakakuita kuratidzike kuva kwakanakisisa kundoparidzira kune imwe nzvimbo kana kuti kutamira kune imwe ndima kwechinguvana, Pauro akaita ikoku panzvimbo pokumanikidzira kunangana kwenguva dzose navavengi vezvokwadi. (Mabasa 14:5-7; 18:5-7; VaR. 12:18) Asi iye haana kutombonyadziswa namashoko akanaka. (VaR. 1:16) Kunyange zvazvo Pauro akawana kubatwa kwokuvirimirwa, kunyange kwamasimba masimba, kwakaitwa navashori kusingafadzi, iye “akawana ushingi kupfurikidza naMwari wedu” hwokupfuurira kuparidza. Pasinei hapo nemigariro yakaoma yaakapinda mairi, iye akati: “Ishe akamira pedyo neni ndokundisimbisa, kuti kupfurikidza neni kuparidzira kugoitwa zvizere.” (1 VaT. 2:2; 2 Tim. 4:17) Musoro weungano yechiKristu, Ishe Jesu, anopfuurira kugovera simba rinodikanirwa kuita basa raakadeya kutaura nokuda kwezuva redu.—Marko 13:10.
13. Chii chinopa ufakazi hwoushingi hwechiKristu, uye chii chiri hwaro hwako?
13 Tine chikonzero chiri chose chokupfuurira kutaura shoko raMwari noushingi, sezvo Jesu Kristu navamwe vabatiri vakatendeka vaMwari muzana rokutanga ramakore vakaita. Ikoku hakuzati kuchireva kuva vane hasha kana kuti vanovirima mumutoo wedu. Hapana dikanwo yokuva vasingarangariri kana kuti kugombedzera shoko pana avo vasingaridi. Asika isu hatiregi nokuti vanhu havakatari, uyewo hatityisidzirwi mukunyarara kupfurikidza nechishoro. SaJesu, tinoratidzira Umambo hwaMwari sehurumende ina maruramiro apasi rose. Tinotaura nechivimbo nokuti tinomirira Jehovha, Changamire weChisiko chapose pose, uye shoko ratinozivisa harisati richibva kwatiri asi kwaari.—VaF. 1:27, 28; 1 VaT. 2:13.
Kurukurirano Yehwirudzuro
● Neiko kuchikosha kugovera shoko roUmambo kuno munhu ari wose anobvira? Asika kuitai kwatinofanira kukarira?
● Ko tinogona sei kuratidzira kuti hatizati tiri kuedza kuvimba nesimba redu timene kubatira Jehovha?
● Zvidzidzoi zvinokosha zvatinodzidza mubhuku raMabasa?