Mibvunzo Inobva Kuvaravi

Ko Johane uyo akabhapatidza Jesu anofanira kunongedzerwa kwaari sa“Johane Mubhapatidzi [“Baptist”]” kana kuti “Johane Mubhapatidzi [“Baptizer”]” here?

Mazita ose ari maviri akarurama uye anotsigirwa neBhaibheri.

Johane aifanira “kugadzirira Jehovha vanhu vakagadzirirwa,” uko akaita kupfurikidza no“kuparidzira rubhapatidzo muchiratidzo chorupfidzo nokuda kwekanganwirwo yezvivi.” (Ruka 1:17; 3:3, NW) Muapostora Mateo akanyora, kuti: “Johane Mubhapatidzi [Baptist] akauya achiparidzira murenje reJudhea, achiti: ‘Pfidzai, nokuti umambo hwamatenga hwaswedera pedyo.’ . . Ipapo Jerusarema neJudhea rose . . . vakabudira kwaari, uye vanhu vakabhapatidzwa naye muRwizi rwaJoridhani, vachireurura pachena zvivi zvavo.”—Mateo 3:1-6, NW.

Cherechedza kuti Mateo anozivisa Johane so“Mubhapatidzi [Baptist].” Mateo, uyo sezviri pachena akanga achikodzeresa nhauro yake kuvaJudha, anofanira kuva akanzwa kuti vaJudha vaizoziva akanga ari “Mubhapatidzi [Baptist].” Iye akashandisa “Mubhapatidzi [Baptist]” sorudzi rwakati rwezita rorudzi. Jesu navadzidzi vake vakashandisa “Johane Mubhapatidzi [Baptist],” sezvakaita vabatiri vaHerodhe.a—Mateo 11:11, 12; 14:2; 16:14.

Mudzidzi Marko anoshuma kushandiswa kwakafanana kwa“Mubhapatidzi [Baptist].” (Marko 6:25; 8:28) Asi pakusuma Johane, Marko akamudana kuti “Johane mubhapatidzi [baptizer].” (Marko 1:4) ChiGiriki chinobatanidzwa pana Marko 1:4 chinosiana zvishomanene neicho chedzimwe ndima. Marko 1:4 ingashandurwawo kuti “anobhapatidza.” Marko akanga achisimbisa icho Johane akanga achiita; iye ndiye akanga achibhapatidza, mubhapatidzi (baptizer).

Hakusati kuchioneka, zvisinei, kuti tinofanira kusianisa pakati peidzi nzira dzokunongedzera kuna Johane. Pana Marko 6:24, 25, tinorava pamusoro paSarome: “Akabuda, akati kuna mai vake: ‘Ndichakumbireiko?’ Vakati: ‘Musoro waJohane Mubhapatidzi [Baptizer].” Pakarepo akakurumidza kupinda kuna Mambo, akakumbira achiti: ‘Ndinoda kuti mundipe mundiro iko zvino musoro waJohane Mubhapatidzi [Baptist].’” Mazita maviri aishandiswa nenzira yokuchinjanisa.

Vamwe vanhu vanganzwisisa “Mubhapatidzi [Baptist] mukuwirirana nerondedzero yechipiri muduramashoko, inoti: “Mutezo kana kuti mutsigiri wesangano reevhangeri rePurotestendi rinoratidzirwa nomuitiro weungano norubhapatidzo kupfurikidza nokunyudzwa kwavatendi bedzi.” Johane zvamazvirokwazvo akanga asina kudaro.

Nokudaro, ose ari maviri “Johane Mubhapatidzi [Baptist]” uye “Johane Mubhapatidzi [Baptizer]” akarurama uye akafanira.

[Mashoko Omuzasi]