Rutongeso rwaJehovha Pavadzidzisi Venhema
“Kuvaporofita veJerusarema ndakaonawo chinhu chinonyangadza: Vanoita upombwe, nokufamba nenhema; . . . . vose vava kwandiri seSodhoma, navagerepo seGomora.”—JEREMIA 23:14.
1. Neiko munhu anopinda mukudzidzisa kwoumwari achiva nomutoro wakakomba zvikuru?
ANI nani anopinda mukudzidzisa kwoumwari anova nemutoro wakakomba zvikuru. Jakobho 3:1 inonyevera, kuti: “Hama dzangu, musava vadzidzisi vazhinji, zvamunoziva kuti tichatongwa nokupfuurisa.” Hungu, vadzidzisi veShoko raMwari vane mutoro wakakomba zvikuru wokupa kuzvidavirira kunogamuchirika kupfuura zvakaita maKristu ose zvawo. Ikoku kucharevei nokuda kwaavo vanobvumikisa kuva vadzidzisi venhema? Ngatitarisei mugariro womuzuva raJeremia. Tichaona kuti wakadeya kufananidzira sei zviri kuitika nhasi.
2, 3. Rutongesoi urwo Jehovha akaita kupfurikidza naJeremia pamusoro pavadzidzisi venhema veJerusarema?
2 Muna 647 P.N.V., gore rechi 13 rokutonga kwaMambo Josia, Jeremia akatumwa somuporofita waJehovha. Jehovha ainyunyutira Judha, naizvozvo akatuma Jeremia kundokuzivisa. Vaporofita venhema veJerusarema, kana kuti vadzidzisi, vaiita “chinhu chinonyangadza” mumaziso aMwari. Uipi hwavo hwakanga huri hukuru kwazvo zvokuti Mwari akafananidza Jerusarema uye Judha neSodhoma neGomora. Jeremia ganhuro 23 rinotiudza pamusoro paikoku. Jer 23 Ndima 14 inoti:
3 “Kuvaporofita veJerusarema ndakaonawo chinhu chinonyangadza: Vanoita upombwe, nokufamba nenhema; vanosimbisa maoko avanoita zvakaipa, naizvozvo hakuna nomumwe unodzoka pazvakaipa zvake; vose vava kwandiri seSodhoma, navagerepo seGomora.”
4. Muenzaniso wakaipa wetsika wavadzidzisi veJerusarema unowiriraniswa sei muchiKristudhomu nhasi?
4 Hungu, ava vaporofita, kana kuti vadzidzisi, vakagadza ivo vamene mienzaniso yetsika yakaipa zvikuru uye, chaizvoizvo, vakakurudzira vanhu kuita zvimwe chetezvo. Tarisa migariro iri muchiKristudhomu nhasi! Haina kufanana chaizvo neiyo yomuzuva raJeremia here? Nhasi vafundisi vanorega mhombwe navanhu vane mitezo mimwe cheteyo yokubereka nayo vanovatana vachigara mumapoka avo uye kunyange kuvarega vachitungamirira paminamato yavo. Kunomboshamisa here kuti mitezo mizhinji kwazvo yechechi yakazvinyoresa ine uterewo?
5. Neiko mugariro woutere wechiKristudhomu uchipfuura uyo weSodhoma neGomora?
5 Jehovha akafananidza vagari veJerusarema naavo veSodhoma neGomora. Asi mugariro woutere wechiKristudhomu wakaipa zvikuru kupfuura uyo weSodhoma neGomora. Hungu, chinotova nemhaka zvikuru mumaziso aJehovha. Vadzidzisi vacho vanozvidza bumbiro remitemo retsika rechiKristu. Uye ikoku kunoparira mugariro wokushata kwetsika umo mune zvinonyengedza zvamanomano zvamarudzi ose zvokuita zvakaipa. Uyu mugariro wetsika wakapararira kwazvo zvokuti ushati nhasi hunorangarirwa sohwomuzvarirwo.
“Kufamba Nenhema”
6. Jeremia akatii pamusoro pouipi hwavaporofita veJerusarema?
6 Zvino cherechedza icho Jer 23 ndima 14 inotaura pamusoro pavaporofita veJerusarema. Vakanga vachi“famba nenhema.” Uye rutivi rwokupedzisira rweJer 23 ndima 15 runoti: “Kumhura Jehovha kwakabuda kuvaporofita veJerusarema kukaenda kunyika yose.” Ipapo Jer 23 ndima 16 inowedzera, kuti: “Zvanzi naJehovha wehondo: Regai kuteerera mashoko avaporofita vanokuporofiterai; vanokudzidzisai zvisina maturo, vanotaura zvavakaona pamwoyo yavo, zvisati zviri izvo zvinobuda mumuromo waJehovha.”
7, 8. Neiko vafundisi vechiKristudhomu vakafanana navaporofita venhema veJerusarema, uye izvozvi zvakatapura sei vaendi kuchechi?
7 Kufanana navaporofita venhema veJerusarema, vafundisi vechiKristudhomu vanofambawo munhema, vachiparadzira dzidziso dzokuwa pakutenda, dzidziso dzisingawanikwi muShoko raMwari. Ndedzipi dziri dzimwe dzeidzi dzidziso dzenhema? Kusafa kwomweya, Utatu, purigatori, uye hero yomwoto yokutambudza vanhu nokusingagumi. Vanofadzawo nzeve dzavanzwi vavo kupfurikidza nokuparidzira izvo vanhu vanoda kunzwa. Vanodzokorora vadzokororazve kuti hapana ngozi yakatarisana nechiKristudhomu nemhaka yokuti chine rugare rwaMwari. Asi vafundisi vari kutaura “zvavakaona pamwoyo yavo.” Inhema. Avo vanodavira nhema dzakadaro vari kukuvadzwa mumudzimu. Vari kutsauswa kusvikira kuruparadziko rwavo!
8 Rangarira icho Jehovha anotaura nezvavadzidzisi venhema ivava Jer 23 mundima 21: “Ini handina kutuma vaporofita ava, kunyange zvakadaro vakamhanya; ini handina kutaura navo, kunyange zvakadaro vakaporofita.” Naizvozvo nhasi, vafundisi havana kutumwa naMwari, uyewo havadzidzisi zvokwadi dzake. Chii chakava muuyo wacho? Kusaziva Bhaibheri kunokatyamadza kuripo pakati pavaendi kuchechi nemhaka yokuti vashumiri vavo vanovadyisa uzivi hwenyika.
9, 10. (a) Vadzidzisi venhema veJerusarema vakanga vane zviroto zvorudzii? (b) Vafundisi vechiKristudhomu nenzira yakafanana vakadzidzisa sei “kurota kwenhema”?
9 Kupfurirazve, vafundisi nhasi vanozivisa tariro dzenhema. Cherechedza Jer 23 ndima 25: “Ndakanzwa zvakarehwa navaporofita, vanoporofita nhema muzita rangu, vachiti: Ndarota hope, ndarota hope.” Izvo zviroto zverudzii? Jer 23 Ndima 32 inotiudza, kuti: “Tarirai, ndizvo zvinotaura Jehovha ‘handina ukama navanoporofita kurota kwavo kwenhema, vachiudza vamwe, vachirashisa vanhu vangu nenhema dzavo uye nokuzvirumbidza kwavo kusina maturo; kunyange zvakadaro handina kuvatuma, kana kuvaraira; uye havatongobatsiri vanhu ava, ndizvo zvinotaura Jehovha.”
10 Zviroto zvenhema zvakadini, kana kuti tariro, izvo vafundisi vakadzidzisa? Chokwadi, tariro iyoyo bedzi yomunhu yorugare nechengeteko nhasi Chibatanwa chaMarudzi. Mumakore achangobva kupfuura aya vakadana CM kuti “tariro yokupedzisira yebvumirano norugare, “nzvimbo hurusa yorugare neruramisiro,” “tariro huru yapasi yorugare rwenyika.” Inyengedzo yakadini! Tariro bedzi yorudzi rwomunhu Umambo hwaMwari. Asi vafundisi havasati vachiparidzira nokudzidzisa zvokwadi pamusoro pehurumende iyoyo yokudenga, iyo yakanga iri musoro mukuru wokuparidzira kwaJesu.
11. (a) Vadzidzisi venhema veJerusarema vakava nomuuyoi wakaipa pazita raMwari amene? (b) Mukusiana neboka raJeremia, vadzidzisi vorudzidziso rwenhema vanhasi vakaitei pamusoro pezita roumwari?
11 Jer 23 Ndima 27 inotiudza zvakawanda. “Ivo, vanofunga kukanganwisa vanhu vangu zita rangu nokurota kwavo, kwavanoudza mumwe nomumwe hama yake, madzibaba avo sezvaakakanganwa zita rangu nokunamata Bhaari.” Vaporofita venhema veJerusarema vakaparira vanhu kukanganwa zita raMwari. Vadzidzisi vorudzidziso rwenhema vanhasi havana kuita zvimwe chetezvo here? Zvakaipa zvikuru, vanovanza zita raMwari, Jehovha. Vanodzidzisa kuti hakusati kuri madikanwa kurishandisa, uye vanoribvisa mushanduro dzavo dzeBhaibheri. Vanoshora zvakasimba ani nani unodzidzisa vanhu kuti zita raMwari ndiJehovha. Asi boka raJeremia, vakasarira vamaKristu akazodzwa nomudzimu, pamwe chete neshamwari dzavo, vakaita sezvakangoita Jesu. Vakadzidzisa mamirioni pamusoro pezita raMwari.—Johane 17:6.
Kufumura Mhaka Yavo
12. (a) Neiko kune mhaka huru yeropa kuvadzidzisi vorudzidziso rwenhema? (b) Chii chave chiri basa ravafundisi muhondo mbiri dzenyika?
12 Boka raJeremia rakafumura rafumurazve vafundisi sevadzidzisi venhema vari kutungamirira makwai avo munzira yakafara yoruparadziko. Hungu, vakasarira vakajekesa chikonzero nei varoti ivavo vachifanirwa norutongeso rwakaipa rwaJehovha. Somuenzaniso, vabatiri vaJehovha vakanongedzera kazhinji kazhinji kuna Zvakazarurwa 18:24, inotaura kuti muBhabhironi Guru makawanikwa ropa “ravose vakaurawa panyika.” Funga nezvehondo dzose dzakarwiwa nemhaka yemisiano yorudzidziso. Ihuru zvakadini mhaka yeropa iri pamusoro pavadzidzisi vorudzidziso rwenhema! Dzidziso dzavo dzakaparira kukamukana uye dzakapfuuridzira kuvengana kwaavo vokutenda kwakasiana namapoka amarudzi. Pamusoro peHondo yeNyika I, bhuku rinonzi Preachers Present Arms rinoti: “Vafundisi vakapa hondo revo yayo yembavarira yomudzimu nesundo. . . . Chechi nomutoo iwoyo yakava rutivi rwegadziriro yehondo.” Zvimwe chetezvo zvakanga zviri zvechokwadi muHondo yeNyika II. Vafundisi vakatsigira zvizere marudzi airwa uye vakakomborera mauto awo. Hondo mbiri dzenyika dzakavamba muchiKristudhomu umo vezvorudzidziso biyavo vakaurayana. Mapoka enyika neorudzidziso ari mukati mechiKristudhomu anopfuurira kuparira kudeurwa kweropa kusvikira kunguva yazvino. Dzidziso dzavo dzenhema dzakava nemiuyo yakashata zvakadini!
13. Jeremia 23:22 inobvumikisa sei kuti vafundisi vechiKristudhomu havana ukama naJehovha?
13 Tapota cherechedza Jeremia ganhuro 23, ndima 22: “Asi dai vakanga vamira parangano yangu, vangadai vakanzwisa vanhu vangu mashoko angu, vakavadzora panzira yavo yakaipa, napazvakaipa zvamabasa avo.” Kudai vaporofita vorudzidziso vechiKristudhomu vakanga vakamira muboka riri pedyo raJehovha, muukama hwapedyo naye sokunge mubatiri akatendeka neakachenjera, ipapo ivowo vaizova vachirarama mukuwirirana nemipimo yaMwari. Ivowo vaizova vachiita kuti marudzi echiKristudhomu anzwe mashoko aMwari amene. Panzvimbo pezvo, vadzidzisi venhema vomuzuva razvino uno vakaita vateveri vavo vabatiri vakapofumadzwa voMuvengi waMwari, Satani Dhiabhorosi.
14. Kufumurwai kune simba kwechiKristudhomu kwakabudiswa muna 1958?
14 Kufumurwa kwavafundisi neboka raJeremia kwave kune simba. Somuenzaniso, pa 1958 Kuda Kwoumwari Gungano Ramarudzi Ose reZvapupu zvaJehovha muNew York City, mutevedzeri wapurezidhendi weWatch Tower Society akapa kutaura uko kwakati murutivi: “Pasina chibhende chipi nechipi kana kuti kuzengurira tinozivisa ichi chisakiso chikuru choutsotsi hwose, usindimari, ruvengo, gakava, fungira mano akaipa, . . . uye vhiringidziko youpengo kuva rudzidziso rwusakarurama, rudzidziso rwenhema; kuseri kwarwo kune muvengi womunhu asingaoneki, Satani Dhiabhorosi. Varume vane mutoro zvikurusa nokuda kwomugariro wenyika varairidzi vorudzidziso navatungamiriri; uye vane mhaka zvikurusa vaivava vafundisi vorudzidziso vechiKristudhomu. . . . Pashure paaya makore ose chifo cheHondo yeNyika I, chiKristudhomu chinomira muukama kuna Mwari kufanana nouhwo hwaIsraeri muzuva raJeremia. Hungu, chiKristudhomu chinotarisana noruparadziko runotyisa zvikuru norunoparadzanya kupfuura urwo Jeremia akaona ruchiitika kuJerusarema.”
Kutongwa Kwavadzidzisi Venhema
15. Vafundisi vakaita zviporofitai zvorugare? Zvichazadzikwa here?
15 Pasinei zvapo neiyi nyevero, vafundisi vakaita sei chifo chenguva iyeyo? Kungofanana neizvo Jer 23 ndima 17 inoshuma: “Vanoramba vachiti kuna vanondizvidza: Jehovha wakati: “Muchava norugare.” Uye kuno mumwe nomumwe unofamba noukukutu hwomwoyo wake, vanoti: Hakune chakaipa chingakuwira. Ichi ichokwadi here? Aiwa! Jehovha achafumura unhema hwouhu uporofita hwavafundisi. Haasati achizozadzika zvavari kutaura muzita rake. Zvisinei, vimbiso yenhema yavafundisi yorugare naMwari inonyengera zvikuru!
16. (a) Chii chiri mugariro wetsika wenyika ino, uye ndiani anogoverana mutoro wawo? (b) Chii icho boka raJeremia riri kuita pamusoro pemirangariro yetsika yakashata yenyika ino?
16 Uri kufunga kuti, ‘Chii, ini kufurirwa nedzidziso dzenhema dzavafundisi? Kana!’ Eya, usava nechokwadi kudaro! Yeuka kuti dzidziso dzenhema dzavafundisi dzakasimudzira mugariro wetsika wamanomano, wakaipa. Dzidziso dzavo dzamadiro dzinoruramisa chinodokuva chinhu chipi nechipi, pasinei zvapo nokuti ndecheutere sei. Uye uyu mugariro wetsika wakaipa unotekeshera mumativi ose evaraidzo, mabhaisikopo, TV, magazini, uye nziyo. Isu, ipapoka, tinofanira kushandisa kungwarira kukurusa kutyira kuti, zvimwe tingawira mupesvedzero youyu mugariro wetsika wakaipa asi unofadza nenzira yamanomano. Vaduku vanogona kubatwa mumavhidhiyo nenziyo zvakashata. Yeuka kuti ichi chimiro chendangariro chokuti chinhu chiri chose chinogamuchirika chavanhu nhasi muuyo wakananga wedzidziso dzenhema dzavafundisi uye kukundikana kwavo kutsigira mipimo yakarurama yaMwari. Boka raJeremia riri kurwisa iyi mirangariro youtere uye riri kubetsera vabatiri vaJehovha kuramba ushati huri kukurira chiKristudhomu.
17. (a) Mukuwirirana naJeremia, rutongesoi rwaifanira kuuya paJerusarema rakaipa? (b) Chii chichakurumidza kuitika kuchiKristudhomu?
17 Rutongeso rwakadini urwo vadzidzisi venhema vechiKristudhomu vachagamuchira kuna Jehovha, Mutongi mukuru? Jer 23 Ndima 19, 20, 39, uye Jer 23:40 dzinopindura, kuti: “Tarirai, dutu remhepo raJehovha, iko kutsamwa kwake, rabuda, zvirokwazvo dutu rechamupupuri; richamonereka pamisoro yavakaipa. Kutsamwa kwaJehovha hakungadzoki, kusvikira azviita, apedza ndangariro dzemwoyo wake; . . . Ndichakukanganwai chose, ndichakurashai kure neni, imi, neguta randakakupai imi namadzibaba enyu; ndichauyisa pamusoro penyu kushorwa kusingaperi, nokunyadziswa kusingaperi, zvisingazokanganikwi.” Zvose zvaizvozvo zvakaitika kuJerusarema rakaipa netembere yaro, uye zvino ngwavaira yakafanana ichakurumidza kuwira kuchiKristudhomu chakaipa!
Kuzivisa “Mutoro waJehovha, NW”
18, 19. “[Mutoro[i] waJehovha, NW]” uyo Jeremia akazivisa kuJudha, nerevoi?
18 Naizvozvo, chii chiri mutoro weboka raJeremia neshamwari dzavo? Jer 23 Ndima 33 inotiudza, kuti: “Zvino kana vanhu ava, kana muporofita kana muprista, vakakubvunza, vachiti: Chii chiri [mutoro waJehovha?, NW] Ipapo uti kwavari: “[Imi vanhu muri—Haiwa mutoro wakadini!, NW] Ini ndichakurashai—ndizvo zvinotaura Jehovha.”
19 Shoko rechiHebheru re“mutoro” rine revo mbiri. Rinogona kunongedzera kuziviso youmwari inokosha kana kuti kuchimwe chinhu chinoremera munhu uye chinomunetesa. Pano kutaura kwokuti “[mutoro waJehovha, NW]” kunonongedzera kuuporofita hunokosha—kutaura kwokuti Jerusarema rakanga rashurikidzirwa kuruparadziko. Vanhu vakada here kunzwa kutaura kwakadaro kunorema kwouporofita uko Jeremia akavapa avapazve kwakabva kuna Jehovha? Aiwa, vanhu vakaseka Jeremia: ‘Uporofitai (mutoro) hwaunahwo zvino? Tine chokwadi chokuti uporofita hwako huchava mumwe mutoro unonetesa!’ Asi Jehovha akavaudzei? Izvi: “[Imi vanhu muri—Haiwa mutoro wakadini!, NW] Ini ndichakurashai.” Hungu, ava vanhu vakanga vari mutoro kuna Jehovha, uye akanga achizovabvisa mukusazotongomuremerazve.
20. Chii chiri “[mutoro waJehovha, NW]” nhasi?
20 Chii chiri “[mutoro waJehovha, NW]” nhasi? Ishoko rinokosha rouporofita rinobva muShoko raMwari. Rakazadzwa neshurikidzo, richizivisa ruparadziko rwava pedyo rwechiKristudhomu. Kana vari vanhu vaJehovha, tine mutoro wakakomba wokuzivisa uyu “[mutoro waJehovha, NW].” Sezvo mugumo unoswedera pedyo, tinofanira kuudza vose kuti vanhu vakasindimara vechiKristudhomu “[mutoro, NW]” hungu, “[Haiwa mutoro wakadini!, NW]” kuna Jehovha Mwari, uye kuti achakurumidza kuzvibvisira amene uyu “[mutoro, NW]” kupfurikidza nokusiira chiKristudhomu kungwavaira.
21. (a) Neiko Jerusarema rakaparadzwa muna 607 P.N.V.? (b) Pashure pokuparadzwa kweJerusarema, chii chakaitika kuvaporofita venhema uye kumuporofita wechokwadi waJehovha, kuchitipa vimbisoi nhasi?
21 Rutongeso rwaJehovha rwakaitwa muzuva raJeremia apo vaBhabhironi vakaparadza Jerusarema muna 607 P.N.V. Sezvakaporofitwa, irworwo rwakanga rwuri ‘ruzvidzo nenyadzi nokuda kwavaIsraeri ivavo vane chisimbwa, vasina kutendeka. (Jeremia 23:39, 40) Rwakavaratidza kuti Jehovha uyo vakanga vazvidza vazvidzazve, pakupedzisira akanga avasiyira kumiuyo youipi hwavo. Miromo yavaporofita vavo venhema vanozvitutumadza yakanyaradzwa pakupedzisira. Bva, muromo waJeremia wakaramba uchiporofita. Jehovha haana kumusiya. Mukuwirirana nouyu mutoo, Jehovha haasati achizosiya boka raJeremia apo chisarudzo chake chinokosha chinotungamirira kukuparadza upenyu huchibva muvafundisi vechiKristudhomu naavo vanodavira nhema dzavo.
22. ChiKristudhomu chichaderedzwa kumugariro namarutongeso aJehovha?
22 Hungu, mugariro wokuparadzwa, wokusagarwa weJerusarema pashure pa 607 P.N.V. ndizvo zvomenemene izvo chiKristudhomu chorudzidziso chichatarisika pashure pokunge chabvisirwa upfumi hwacho uye chafumurwa nenzira inonyadzisa. Urwu ndirwo rutongeso rwakafanirwa urwo Jehovha akaraira pavadzidzisi venhema. Rutongeso irworwo harusati ruchizokundikana. Sezvo ose amashoko enyevero akafuridzirwa aJeremia akava echokwadi munguva dzakapfuura, achava echokwadi muzadziko yawo yomuzuva razvino uno. Naizvozvo ngative vakafanana naJeremia. Nenzira yokusatya ngatizivise mutoro wouporofita waJehovha kumarudzi, kuti vagoziva chikonzero nei chiyero chakakwana chorutongeso rwake rwakarurama chiri kuuya pavadzidzisi vose vorudzidziso rwenhema!
Mibvunzo Yehwirudzuro
◻ Jerusarema rakare rakanga rakaipa sei mumurangariro waJehovha?
◻ ChiKristudhomu ‘chakafamba muunhema’ munzirai?
◻ Mhaka yavafundisi vomuzuva razvino uno yakaratidzwa sei?
◻ “[Mutoro[i] waJehovha, NW]” uri kuziviswa zvino?
[Mufananidzo uri papeji 8]
Vaporofita veJerusarema vakaita “chinhu chinonyangadza”
[Mufananidzo uri papeji 9]
“Vanotaura zvavakaona pamwoyo yavo”
[Mufananidzo uri papeji 10]
Jerusarema pashure pokuparadzwa kwaro rinoratidzira mugumo wokupedzisira wechiKristudhomu