Wakawana Rudzidziso Rwakarurama Here?

“Chimiro chokunamata chakachena nechisina kusvibiswa mumurangariro waMwari wedu naBaba ndeichi.”—JAKOBHO 1:27, NW.

1, 2. (a) Mukufunga kwavanhu vakawanda, chii chinosarudza kana rwavo rwuri rudzidziso rwakarurama? (b) Chii chinofanira kurangarirwa zvakakomba mukusarudza rudzidziso?

ISU tinorarama munhambo apo vanhu vakawanda vanogutswa nokupa rudzidziso rutivi ruduku zvikuru rwoupenyu hwavo. Ivo vangapinda minamato yorudzidziso, asi vashomanene vanoita saizvozvo nguva dzose. Vanhu vakawanda zvikurusa havana murangariro wokuti mamwe marudzidziso ose akaipa uye kuti rwavo ndirwo rwakarurama. Vangangorangarira zvavo kuti rudzidziso rwavo rwakavanakira.

² Nemhaka yaikoku, ko mubvunzo wokuti, Wakawana rudzidziso rwakarurama here? unongoreva zvawo kuti, Wakawana rudzidziso rwaunoda here? Chii chinosarudza chaunoda? Mhuri yako here? Vasonganiri vako here? Mirangariro yako umene here? Wakarangarira zvakakomba sei murangariro waMwari wenhau yacho?

Tinogona Sei Kuziva Murangariro waMwari?

3. (a) Kana tichizoziva murangariro waMwari, chii chinofanira kuwanika kwatiri? (b) Mibvunzoi yatinofanira kubvunza pamusoro pechikonzero nei isu somunhu oga tichidavira kuti Bhaibheri rakabva kuna Mwari?

³ Kana tichizoziva icho Mwari amene anofunga, ipapo panofanira kuva nechizaruro chinobva kwaari. Bhaibheri ibhuku rakare zvikurusa rinotaura kuva rakafuridzirwa naMwari. (2 Timotio 3:16, 17) Asi kunogona kutaurwa zvirokwazvo here kuti iri bhuku, mukupesana namamwe ose, rine shoko raMwari rorudzi rwose rwomunhu? Waizopindura sei mubvunzo iwoyo, uye nei? Imhaka here yokuti vabereki vako vaiva nomurangariro iwoyo? Imhaka here yechimiro chendangariro chavasonganiri vako? Wakanzvera here ufakazi hwacho iwe umene? Kuregerereiko kuita izvozvo zvino, uchishandisa nzira ina dzinotevera dzoufakazi?

4. Kana kuri kuwanika, chii chinoratidzira kuti Bhaibheri, panzvimbo perimwe bhuku rakati, rakabva kuna Mwari?

⁴ Kuwanika: Shoko rinobva zvirokwazvo kuna Mwari uye iro riri remhuri yose yavanhu rinofanira kuwanika kwavari. Ikoko ndokwechokwadi neBhaibheri here? Rangarira ichi: Bhaibheri, rose kana kuti rutivi rwakati, zvino rinobudiswa mumitauro inopfuura 2 000. Mukuwirirana neAmerican Bible Society, anodokuva makore gumi apfuura mitauro umo Bhaibheri rakatsikirirwa yakariita rinowanika ku 98 muzana yechiverengero chavagari venyika. Sezvinooneswa neGuinness Book of World Records, Bhaibheri nokure ndiro “bhuku rinoparadzirwa zvakafara zvikurusa renyika.” Ikoku ndiko kwataizokarira nezveshoko rinobva kuna Mwari ravanhu vamadzinza ose namarudzi namapoka omutauro. (Enzanisa naZvakazarurwa 14:6.) Hakuna rimwe bhuku munyika rine chinyorwa chakatongofanana naro.

5. Neiko hwaro hwenhau hweBhaibheri huchikosha?

⁵ Kuva renhau: Kunzverwa kwokungwarira kwenhauro dzeBhaibheri kunozivisa imwe nzira umo Bhaibheri rakasiyana namamwe mabhuku anotaura kuva matsvene. Bhaibheri rine maidi enhau, kwete ngano dzisingabvumikiswi. Irwin Linton, uyo segweta akanga ajaira kukamuranisa chaidikanwa sechitendiso mudare, akanyora, kuti: “Nepo mabhuku enhau dzorudo, ngano uye chipupuriro chenhema zvichingwarira kuisa zvinoitika zvinorondedzerwa munzvimbo iri kure nenguva isingazivikanwi, . . . nhauro dzeBhaibheri dzinotipa musi nenzvimbo zvezvinhu zvinorondedzerwa noururami hukurusa.” (Nokuda kwemienzaniso, ona 1 Madzimambo 14:25; Isaya 36:1; Ruka 3:1, 2.) Kuvanhu vanotendeukira kurudzidziso kwete nokuda kwokunzvenga chinhu chaichoicho asi nokuda kwezvokwadi, iyi irangariro inokosha.

6. (a) Bhaibheri rinobetsera sei chaizvoizvo mumwe munhu nezvinetso zvoupenyu? (b) Bhaibheri rinobatsira mumwe munhu kugonana nezvomene dzakaipa munzirai nhatu?

⁶ Kushanda: Avo vanonzvera Bhaibheri zvakakomba vanokurumidza kuziva kuti mirairo yaro nenheyo hazvina kurongedzerwa kuvashandisa zvisakafanira. Panzvimbo pezvo, izvozvi zvinoratidzira mararamire anounza betsero kuavo vanosanonamatira kwazviri. (Isaya 48:17, 18) Nyaradzo yarinopa kuavo vanotambudzika haisi yenhando, yakavakirwa pauzivi husina maturo. Panzvimbo pezvo, rinobetsera vanhu kugonana nezvomene dzakaipa dzoupenyu. Seiko? Munzira nhatu: (1) kupfurikidza nokupa zano rakanaka pamusoro penzira yokubata nayo nezvinetso, (2) kupfurikidza nokutsanangura nzira yokugamuchira nayo tsigiro yorudo iyo Mwari anopa kuvabatiri vake zvino, uye (3) kupfurikidza nokuzivisa nguva yemberi inoshamisa iyo Mwari akachengetera avo vanomubatira, kuchikupa zvikonzero zvakanaka zvokuvimba nezvipikirwa zvake.

7. (a) Uchishandisa magwaro akarongwa mumashoko omuzasi, tsanangura mhinduro yeBhaibheri kuimwe yenhau huru dzinonetsa vanhu nhasi. (b) Ratidza kuti zano reBhaibheri rinotitaviridza kana kuti rinotibetsera sei kugonana nomugariro unotambudza.

⁷ Kunyange zvazvo zano reBhaibheri kazhinji kazhinji risina kukurumbira pakati paavo vanoramba chiremera ndokuronda upenyu hwokuzvigutsa, vakawanda vakasvika pakuziva kuti upenyu hwakadaro hahuna kuvaunzira mufarwa wechokwadi. (VaGaratia 6:7, 8) Bhaibheri rinopa mhinduro dzakananga kumibvunzo pamusoro pokubvisa pamuviri, chatanuro, uye vatano yavanhu vane mitezo mimwe cheteyo yevatano. Zano raro chitaviridzo pakushandiswa zvisakafanira kwemirimo nezvinodhakisa uye pakubata AIDS kupfurikidza neropa rakashatiswa kana kuti kusasarura muvatano. Rinotiratidza nzira yokuva nayo nemhuri dzinofara. Rinogovera mhinduro dzinogonesa munhu kugonana nemigariro inotambudza zvikurusa muupenyu, kubatanidza kurambwa nemitezo yapedyo yemhuri, chirwere chinouraya, uye rufu rwomudiwa. Rinotibetsera kunzwisisa zvokutanga zvedu zvokuti upenyu hwedu hunozadzwa nerevo panzvimbo pokuzvidemba.a

8, 9. (a) Uporofitai hunokuorora somunhu oga sechibvumikiso chokufuridzirwa kweBhaibheri? (b) Uporofita huri muBhaibheri hunobvumikisei pamusoro pamavambo ahwo?

⁸ Uporofita: Bhaibheri rakasiyana sebhuku rouporofita, bhuku rinotaura chichaitika munguva yemberi, uye rinokuita muudzame. Iro rakadeya kutaura ruparadziko rweTire yakare, kuwa kweBhabhironi, kuvakwazve kweJerusarema, kumuka nokuwa kwamadzimambo eMedhia nePersia neGirisi, uye zvinoitika zvakawanda muupenyu hwaJesu Kristu. Iro rakadeya kutaurawo muudzame migariro yenyika yakaitika muzana rino ramakore, uye rinotsanangura revo yayo. Runoratidza kuti zvinetso zvinokurira vatongi vohunhu zvichapedzwa sei, uye rinozivisa Mutongi achaunza rugare rusingagumi nechengeteko yechokwadi kurudzi rwomunhu.b—Isaya 9:6, 7; 11:1-5, 9; 53:4-6.

⁹ Nenzira inokosha, Bhaibheri rinopa mano okudeya kutaura nguva yemberi zvakarurama somuedzo wouMwari. (Isaya 41:1–46:13) Uyo anogona kukuita kana kuti anogona kufuridzira vamwe kukuita hachisati chichingova zvacho chidhori chisina upenyu. Iye haasati achingova zvake munhu akazvipira. Iye ndiMwari wechokwadi, uye bhuku rine uporofita hwakadaro iShoko rake.—1 VaTesaronika 2:13.

Vose Vanoshandisa Bhaibheri Vakarurama Here?

10, 11. Sezvakaratidzwa naJesu, kunyange zvazvo mumwe mufundisi angashandisa Bhaibheri, chii chingaita kuti rudzidziso rwaanotsigira ruve rusina maturo?

¹⁰ Kune mufungo here—kunokosha zvikuru, ndokwapaMagwaro here—kugumisa, ipapoka, kuti mapoka ose orudzidziso anotaura kuti anoshandisa Bhaibheri anodzidzisa rudzidziso rwechokwadi? Munhu ari wose anotakura kana kuti anonokora mashoko muBhaibheri anoshandisa rudzidziso rwakarurama here?

¹¹ Vakawanda vavafundisi, kunyange zvazvo vane Bhaibheri, vanoshandisa rudzidziso somutoo wokuzvirumbidza nawo vamene. Vanonetesa zvokwadi dzakachena namagamuchidzanwa nouzivi zvavanhu. Kunamata kwavo kunogamuchirika kuna Mwari here? Kuvatungamiriri vorudzidziso vomuJerusarema romuzana rokutanga ramakore avo vakanga vachiita izvozvo chaizvo, Jesu Kristu akashandisa zvakakodzera ziviso yaMwari kupfurikidza nomuporofita Isaya, achiti: “Vanhu ava vanondikudza nemiromo yavo, asi mwoyo yavo iri kure neni. Asi vanondinamata pasina, vachidzidzisa dzidziso iri mirairo yavanhu.” (Mateo 15:8, 9; 23:5-10) Nenzira yakajeka, rudzidziso rworudzi irworwo harusi rudzidziso rwechokwadi.

12, 13. (a) Mufambiro wemitezo yechechi unogona sei kubetsera mumwe munhu kusarudza kana rwavo rwuri rudzidziso rwakarurama? (b) Mwari acharangarira sei kunamata kwedu kana tikasarudza savasonganiri avo iye anoramba? (2 Makoronike 19:2)

¹² Zvakadiniko kana chibereko chinoberekwa nedzidziso dzamarudzidziso akati, sechinooneka muupenyu hwemitezo yawo ine chimiro chakanaka, chakaora? MuMharidzo yake yapaGomo, Jesu akanyevera, kuti: “Chenjerai vaporofita venhema, . . . muchavaziva nezvibereko zvavo. Muti mumwe nomumwe wakanaka unobereka zvibereko zvakanaka, asi muti wakaipa unobereka zvibereko zvakaipa.” (Mateo 7:15-17) Ichokwadi kuti vanhu vamwe navamwe vangaita chakaipa ndokuda ruramiso. Asi mugariro wakasiyana apo mitezo yechechi, kunyange vafundisi, vanopinda muufeve noupombwe, kurwa, udhakwa, makaro, kureva nhema, kushandisa midzimu, kunamata zvidhori—chipi nechipi kana kuti zvose zvezvinhu izvozvi—bva pasina chirango chinopiwa, uye avo vanopfuurira muiyi nzira havasati vachidzingwa muungano. Bhaibheri rinotaura zvakajeka kuti avo vanoita zvinhu zvakadaro vanofanira kudzingwa muungano; havasati vachizova nenzvimbo muUmambo hwaMwari. (VaGaratia 5:19-21) Kunamata kwavo hakufadzi kuna Mwari, uyewo kunamata kwedu hakusati kuchizofadza Mwari kana tikasarudza savasonganiri avo iye anoramba.—1 VaKorinte 5:11-13; 6:9, 10; Zvakazarurwa 21:8.

¹³ Kuri pachena kuti haasati ari mapoka ose anotaura kuti anoshandisa Bhaibheri anoshandisa rudzidziso rwechokwadi rwarinorondedzera. Chii, ipapoka, chinoonesa Bhaibheri sezviratidzo zvinozivisa zvorudzidziso rwechokwadi?

Zviratidzo Zvinozivisa Zvorudzidziso Rwechokwadi

14. (a) Dzidziso dzose dzorudzidziso rwechokwadi dzakavakirwa pai? (b) Dzidziso dzechiKristudhomu pamusoro paMwari nomweya dzinokunda sei uyu muedzo?

¹⁴ Dzidziso dzarwo dzakavakirwa zvakasimba paMagwaro akafuridzirwa. “Rugwaro rwose rwakafuridzirwa naMwari uye runobetsera nokuda kwokudzidzisa, nokuda kwokutsiura, nokuda kwokururamisa zvinhu.” (2 Timotio 3:16, NW) Asi ndapapi apo Bhaibheri Dzvene rinotaura nezvoUtatu hwechiKristudhomu? Uye ndapapi apo Bhaibheri rinodzidzisa, sezvinoita vafundisi, kuti vanhu vane mweya unopukunyuka rufu rwomuviri wenyama? Wati wambokumbira mufundisi kuti akuratidze dzidziso idzodzo muBhaibheri rako here? The New Encyclopædia Britannica inoti: “Shoko rokuti Utatu kana kuti dzidziso yakajeka haiwaniki muTestamente Itsva.” (1992, Micropædia, Volume 11, peji 928) Uye New Catholic Encyclopedia inobvuma, kuti: “Pakati paVanyori venguva dzaVaapostora, pakanga pave pasina chinhu chaimbosvika zvacho murangariro wakadaro kana kuti pfungwa.” (1967, Volume XIV, peji 299) Kana uri murangariro wechiKristudhomu womweya unoparadzana nomuviri parufu, nyanzvi dzechechi dzinobvuma kuti dzakatora pfungwa yacho kuuzivi hwechiGiriki. Zvisinei, rudzidziso rwechokwadi haruisi parutivi zvokwadi yeBhaibheri nokuda kwouzivi hwavanhu.—Genesi 2:7; Dheuteronomio 6:4; Ezekieri 18:4; Johane 14:28.

15. (a) Bhaibheri rinozivisa sei Uyo oga anofanira kunamatwa? (b) Vanamati vechokwadi vanorangarira sei pamusoro pokuswedera pedyo naJehovha?

¹⁵ Rudzidziso rwechokwadi runotsigira kunamatwa kwaMwari mumwe bedzi wechokwadi, Jehovha. (Dheuteronomio 4:35; Johane 17:3) Achitaura namamwe mashoko Dheuteronomio 5:9 uye 6:13, Jesu Kristu akati nenzira yakasimba: “NdiJehovha Mwari wako waunofanira kunamata, uye ndokwaari oga kwaunofanira kuita basa rinoyera.” (Mateo 4:10, NW) Mukuwirirana naikoko, Jesu akazivisa zita raBaba vake kuvadzidzi vake. (Johane 17:26) Rudzidziso rwako rwakakudzidzisa kunamata Jehovha here? Wati wasvika here pakuziva Munhu anoziviswa nezita iroro—madonzo ake, mibato yake, mavara ake—zvokuti unonzwa kuti unogona nenzira ine chivimbo kuswedera pedyo naye? Kana rwako rwuri rudzidziso rwechokwadi, mhinduro ndihungu.—Ruka 10:22; 1 Johane 5:14.

16. Kutenda muna Kristu kunorevei kuavo vanoshandisa rudzidziso rwechokwadi?

¹⁶ Rutivi runokosha rwokunamata kunofadza kuna Mwari kutenda muMwanakomana wake, Jesu Kristu. (Johane 3:36; Mabasa 4:12) Ikoku hakusati kuchingoreva zvako kudavira kuti iye akararama kana kuti iye akanga ari munhu akatanhamara. Kunobatanidza kunzwisiswa kweizvo Bhaibheri rinodzidzisa pamusoro poukoshi hwechibairo choupenyu hwakakwana hwohunhu hwaJesu nokuzivikanwa kwenzvimbo yake nhasi saMambo wokudenga. (Pisarema 2:6-8; Johane 3:16; Zvakazarurwa 12:10) Kana iwe wakabatanidzwa naavo vanoshandisa rudzidziso rwechokwadi, unoziva kuti muupenyu hwezuva riri rose vanoshandisa nhamburiko yokungwarira kuti vateerere Jesu, kutevedzera muenzaniso wake, uye kugoverana somunhu oga uye nokushingaira mubasa raakagovera kuvadzidzi vake. (Mateo 28:19, 20; Johane 15:14; 1 Petro 2:21) Kana ikoko kusati kuri kwechokwadi nezvaavo unonamata navo, unofanira kutarisa kune imwe nzvimbo.

17. Neiko vanamati vechokwadi vachingwarira kuramba vasina kushatiswa nenyika, uye ikoko kunobatanidzei?

¹⁷ Kunamata kwechokwadi hakuna kushatiswa nokubatanidzwa mune zvamatongerwe enyika nerwisano dzenyika. (Jakobho 1:27) Zvokona neiko? Nemhaka yokuti Jesu akati pamusoro pavateveri vake: “Havasati vari rutivi rwenyika, kungofanana neni ndisati ndiri rutivi rwenyika.” (Johane 17:16, NW) Jesu haana kupindira mune zvamatongerwe enyika, uye akadzora vateveri vake pakutendeukira kuzvombo zvokunyama. (Mateo 26:52) Avo vanofunga zvakakomba izvo Shoko raMwari rinotaura ‘havasati vachadzidzazve hondo.’ (Isaya 2:2-4) Kana rudzidziso rupi norupi rwaune kunyange batano nezita bedzi narwo rusingakodzeri rondedzero iyoyo, yava nguva yokuparadzana narwo.—Jakobho 4:4; Zvakazarurwa 18:4, 5.

18. (a) Chii icho Johane 13:35 inozivisa sevara rakatanhamara rorudzidziso rwechokwadi? (b) Iwe ungabetsera sei mumwe munhu kusarudza kuti ibokai rinowirirana naJohane 13:35?

¹⁸ Rudzidziso rwechokwadi runodzidzisa uye runoshandisa rudo rusina udyire. (Johane 13:35; 1 Johane 3:10-12) Rudo rwakadaro harusati ruchingotaurwa chete pamusoro parwo mumharidzo. Runokwevera pamwe chete zvomenemene muuhama hwechokwadi vanhu vamadzinza ose, mabhuku ose ezvemari, mitauro yose, marudzi ose. (Zvakazarurwa 7:9, 10) Runoparadzanisa vaKristu vechokwadi nenyika yakavapoteredza. Kana usati watoita saizvozvo, pinda misangano paHoro yoUmambo yeZvapupu zvaJehovha, pamwe chete nekokorodzano dzazvo huru zvikuru. Zvitarire sezvazvinoshandira pamwe chete kuvaka imwe yeHoro dzoUmambo dzazvo. Cherechedza kubata kwazvinoita vose vari vaviri vakwegura (kubatanidza chirikadzi) navanhu vaduku (kubatanidza avo vanongova nomubereki mumwe bedzi kana kuti vasitongorina). (Jakobho 1:27) Enzanisa zvaunocherechedza neizvo wakaona murumwe rudzidziso rupi norupi. Ipapo zvibvunze umene kuti, ‘Ndiani anoshandisa rudzidziso rwechokwadi?’

19. (a) Imhinduroi kuzvinetso zvorudzi rwomunhu iyo rudzidziso rwechokwadi runotsigira? (b) Mitezo yeboka inonamatira kurudzidziso rwechokwadi inofanira kuva ichiitei?

¹⁹ Rudzidziso rwechokwadi runotsigira Umambo hwaMwari somushonga unogarisa kuzvinetso zvorudzi rwomunhu. (Dhanieri 2:44; 7:13, 14; 2 Petro 3:13; Zvakazarurwa 21:4, 5) Ko ipi neipi yechechi dzechiKristudhomu inoita izvozvo here? Ndirini iri nguva yokupedzisira apo wakanzwa mufundisi achitsanangura Umambo hwaMwari neizvo Magwaro anoratidza kuti huchaita? Sangano rauri mariri rinokukurudzira kutaura kuvamwe pamusoro poUmambo hwaMwari here, uye kana zvakadaro, ko mitezo yose inogoverana mukukuita here? Jesu akaita kupupurira kwakadaro; vadzidzi vake vapakuvamba vakadaro. Iwewo unogona kuva neropafadzo yokugoverana muuyu mubato. Ibasa rinokosha zvikurusa riri kuitwa pamusoro papasi nhasi.—Mateo 24:14.

20. Mukuwedzera kukuziva rudzidziso rwakarurama, chii chatinofanira kuita?

²⁰ Kunyange zvazvo kune zviuru zvamarudzidziso, Bhaibheri rinotibetsera nokukurumidza kubvisa nyongano kuti tizive rwechokwadi. Asi tinofanira kuita zvinopfuura kuruziva. Kunokosha kuti tirushandise. Icho ikoku kunobatanidza chicharangarirwa zvikuru munyaya yedu inotevera.

[Mashoko Omuzasi]

Waizopindura Sei?

◻ Mukuziva rudzidziso rwakarurama, murangariro waani unokosha zvikurusa?

◻ Inzirai ina dzoufakazi dzinonongedzera kuBhaibheri seShoko raMwari?

◻ Neiko marudzidziso ose anoshandisa Bhaibheri asingagamuchiriki kuna Mwari?

◻ Zviratidzoi zvitanhatu zvinozivisa zvorudzidziso rumwe rwakarurama?

[Bhokisi riri papeji 10]

Zvapupu zvaJehovha . . .

◆ Zvinovakira dzidziso dzazvo dzose paBhaibheri.

◆ Zvinonamata Mwari mumwe wechokwadi, Jehovha.

◆ Zvinorarama mutsinhirano nokutenda kwazvo muna Jesu Kristu.

◆ Hazvibatanidzwi mune zvamatongerwe enyika nerwisano dzenyika.

◆ Zvinotsvaka kuratidzira rudo rusina udyire muupenyu hwezuva riri rose.

◆ Zvinotsigira Umambo hwaMwari somushonga unogarisa kuzvinetso zvorudzi rwomunhu.

[Mufananidzo uri papeji 9]

BHAIBHERI—chii chinoratidzira kuti rine shoko raMwari rorudzi rwose rwomunhu?