Vadiwa Vako Vakafa—Uchavaonazve Here?
JOHN aingova namakore mapfumbamwe bedzi apo amai vake vakafa. Gare gare, iye akayeuka chakaitika panzvimbo inogadzirirwa mariro: “Ndakadhirowa mufananidzo wavo ndokunyora tsamba duku pauri ndichivakumbira kutimirira tose zvedu mudenga. Ndakaupa kuna Baba kuti vaise mubhokisi umo vaiva, uye kunyange zvazvo vakanga vakafa, ndinoda kufunga kuti ivo vakawana shoko iroro rokupedzisira rakabva kwandiri.”—How It Feels When a Parent Dies, rakanyorwa naJill Krementz.
Hapagoni kuva nepanikiro yokuti John aida zvikuru amai vake. Pashure pokurondedzera mavara avo akanaka, iye akati: “Zvimwe kunongova chete kuti handidi kuyeuka zvinhu zvakaipa, asi handigoni kufunga nezvechinhu chipi nechipi chakaipa pamusoro pavo. Ivo vakanga vari mukadzi akanakisisa wandati ndamboona muupenyu hwangu hwose.”
Kufanana naJohn, vakawanda vane yeuko dzakanaka dzavadiwa vavo vakafa uye vanobvuma chinodikanwa chemirangariro chokuvaonazve. Edith, ane mwanakomana ane makore 26 okukura akafa nekenza, akati: “Ndinofanira kudavira kuti mwanakomana wangu aripo kune imwe nzvimbo asi handizivi kuti kupi. Ndichamuonazve here? Handizivi asi ndinovimba kuti ndichamuona.”
Zvamazvirokwazvo, Musiki ane rudo womunhu haana utsinye pamusoro peichi chishuvo chomuzvarirwo chavanhu. Ndokusaka iye akapikira kuti nguva ichauya apo mamirioni achabatanidzwazve navadiwa vavo vakafa. Shoko raMwari rine nongedzero dzakawanda kuichi chipikirwa chorumuko rwuri kuuya rwavakafa.—Isaya 26:19; Dhanieri 12:2, 13; Hosea 13:14; Johane 5:28, 29; Zvakazarurwa 20:12, 13.
Ndivanaani Vanomutsirwa Kudenga?
Ngatirangarirei tariro yaJohn yokuti amai vake vanodiwa vakamumirira mudenga. Vaendi vokuchechi vakawanda vane iyi tariro kana kuti chitendero. Mukuedza kutsigira mirangariro yakadaro, vafundisi navamwe vashandi vomuchaunga vanoshandisa zvisakafanira Magwaro anobva muBhaibheri.
Somuenzaniso, nyanzvi mukubetsera vakafirwa, Dr. Elisabeth Kübler-Ross, akati mubhuku rake On Children and Death: “Kufa kunoreva bedzi kuti tinorasa muviri wedu nenzira yatingaisa nayo parutivi bhachi rekare rasakara, kana kuti kubva mukamuri imwe kupinda mune imwe. Muna Muparidzi, 12:7, tinorava, kuti: ‘Ipapo guruva richadzokera kupasi sezvarakanga rakaita; uye mudzimu uchadzokera kuna Mwari akaupa.’ Jesu akati: ‘Ndinoenda kundokugadzirirai nzvimbo kuti apo ndiri imi mugovapowo.’ Uye kumbavha yaiva pachipiyaniso: ‘Nhasi uchava neni muparadhiso.’”
Magwaro ari pamusoro apa anoreva chaizvoizvo here kuti vadiwa vedu vakafa zvino vapenyu uye vakatimirira mudenga? Ngatirangarirei magwaro acho nokungwarira zvikuru, tichitanga naMuparidzi 12:7. Sezvinooneka, munhu akachenjera akataura mashoko iwayo haana kurangarira kupokanidza zvaakanga atotaura mubhuku rimwe chetero reBhaibheri: “Vapenyu vanoziva kuti vachazofa, asi vakafa havana chavanoziva.” (Muparidzi 9:5) Iye akanga achikurukura rufu rworudzi rwomunhu rwose zvarwo. Kune mufungo here kudavira kuti vasingatendi kuvapo kwaMwari vose vanobvuma pachena namatsotsi chaiwo vanodzokera kuna Mwari parufu rwavo? Nyangwe. Kutaura idi, ikoko hakugoni kutaurwa nezvoupi noupi wedu, pasinei zvapo nokuti tinozvirangarira timene kuva vakanaka kana kuti vakaipa here. Sezvo pasina navamwe vedu vakava naMwari mudenga, kunogona sei kutaurwa kuti tinodzokera kwaari?
Chii, ipapoka, icho munyori weBhaibheri akareva nokutaura kuti parufu, ‘mudzimu unodzokera kuna Mwari wechokwadi’? Mukushandisa shoko rechiHebheru rinoshandurwa kuti “mudzimu,” iye akanga asiri kunongedzera kuchimwe chinhu chechienzi chinosiyanisa munhu mumwe nomumwe. Panzvimbo pezvo, pana Muparidzi 3:19 (NW), munyori weBhaibheri mumwe cheteyo akafuridzirwa anotsanangura kuti munhu nemhuka “zvose zvinongova nomudzimu mumwe.” Sezviri pachena iye akareva kuti “mudzimu” isimba roupenyu riri mumasero ayo anoumba miviri yenyama yomunhu nemhuka. Hatina kugamuchira uyu mudzimu zvakananga uchibva kuna Mwari. Wakapfuuridzirwa kwatiri navabereki vedu vohunhu apo takanambwa gare gare ndokuberekwa. Kupfuurirazve, uyu mudzimu hausati uchifamba chaizvoizvo muchadenga ndokudzokera kuna Mwari parufu. Kutaura kwokuti, ‘mudzimu unodzokera kuna Mwari wechokwadi,’ kutaura kwokufananidzira kunoreva kuti kariro dzoupenyu hwomunguva yemberi dzomunhu akafa zvino dzina Mwari. Zviri kwaari kusarudza waachayeuka ndokumutsa pakupedzisira. Zvicherechedzere umene kuti Bhaibheri rinoratidza nenzira yakajeka sei ikoku paPisarema 104:29, 30.
Jehovha Mwari akaronga kuti chiverengero chakaganhurirwa chavateveri vakatendeka vaKristu, chinoita hwerengedzo yavane 144 000 bedzi, chichamutsirwa kuupenyu hwokudenga savanakomana vomudzimu vaMwari. (Zvakazarurwa 14:1, 3) Ivava vanoumba hurumende yokudenga naKristu nokuda kwokukomborerwa kworudzi rwomunhu pasi pano.
Vokutanga kuziva pamusoro paikoku vakanga vari vaapostora vakatendeka vaJesu, kwavari iye akati: “Mumba maBaba vangu mune nzvimbo zhinji dzokugara; dai kusaiva kudaro, ndingadai ndaikuudzai; nokuti ndinoenda kundokugadzirirai pokugara. Kana ndaenda kundokugadzirirai pokugara, ndinozouyazve, ndikugamuchirei kwandiri; kuti apo pandiri, nemi mugovapowo.” (Johane 14:2, 3) Vaapostora ivavo navamwe vaKristu vapakuvamba vakafa uye vaifanira kumirira vasingazivi murufu kutozosvikira kuuya kwaJesu kuzovatusa norumuko rwokudenga. Ndokusaka tichirava kuti mufiri kutendeka wokutanga wechiKristu, Stefano, “akavata rufu.”—Mabasa 7:60; 1 VaTesaronika 4:13.
Rumuko Kuupenyu Pasi pano
Asi zvakadiniko nechipikirwa chaJesu kutsotsi rakafira parutivi pake? Kufanana navaJudha vakawanda venguva iyoyo, uyu murume aidavira kuti Mwari aizotumira Mesia uyo aizogadza umambo ndokudzorera rugare nechengeteko kurudzi rwechiJudha pasi pano. (Enzanisa 1 Madzimambo 4:20-25 naRuka 19:11; 24:21 naMabasa 1:6.) Uyezve, muiti wezvakaipa akaratidzira kutenda kuti Jesu akanga ari Uyo amene akasarudzwa naMwari kuva Mambo. Bva, panguva iyoyo, rufu rwaiva pedyo rwaJesu somunhu akashurikidzwa rwakaita kuti ikoku kuratidzike kuva kusingabviri. Ndokusaka Jesu akanyaradza tsotsi racho kupfurikidza nokutanga chipikirwa Chake naaya mashoko: “Zvirokwazvo ndinokuudza nhasi, Iwe uchava neni muParadhiso.”—Ruka 23:42, 43, NW.
Shanduro dzeBhaibheri dzinoisa koma pamberi peshoko rokuti “nhasi” dzinoparira vanhu chinetso avo vanoda kunzwisisa mashoko aJesu. Jesu haana kuenda kuparadhiso ipi neipi zuva rimwe chetero rimene. Panzvimbo pezvo, akavata asingazivi murufu kwamazuva matatu kutozosvikira Mwari amumutsa. Kunyange pashure porumuko rwaJesu nokukwira kudenga, iye aifanira kumirira ari parudyi rwaBaba vake kutozosvikira nguva yasvika yokuti atonge saMambo parudzi rwomunhu. (VaHebheru 10:12, 13) Nokukurumidza, kutonga kwoUmambo hwaJesu kuchaunza nyaradzo kurudzi rwomunhu ndokushandura pasi rose kuva paradhiso. (Ruka 21:10, 11, 25-31) Ipapo achazadzika chipikirwa chake kutsotsi iroro kupfurikidza nokurimutsira kuupenyu pasi pano. Uye Jesu achava nomurume wacho mupfungwa yokuti Iye achabetsera nezvinodikanwa zvose zvomurume wacho, kubatanidza kudikanwa kwokutsinhiranisa mararamire ake nemitemo yakarurama yaMwari.
Rumuko Rwavakawanda
Setsotsi iroro rinopfidza, rumuko rwavanhu vakawanda zvikurusa ruchaitika pano pasi pano. Ikoku kunotsinhirana nedonzo raMwari mukusika munhu. Murume wokutanga nomukadzi vakaiswa mubindu reparadhiso ndokuudzwa kudzora pasi. Kudai vakanga varamba vachiteerera Mwari, vangadai vasina kutongokwegura ndokufa. Munguva yakafanira yaMwari, pasi rose ringadai rakadzorwa, rakaitwa paradhiso yenyika yose naAdhama navazukuru vake vakakwana.—Genesi 1:28; 2:8, 9.
Zvisinei, nemhaka yokuti Adhama naEvha vakatadza noune, vakaunza rufu pavari vamene navana vavo vomunguva yemberi. (Genesi 2:16, 17; 3:17-19) Ndokusaka Bhaibheri richiti: “Kupfurikidza nomunhu mumwe [Adhama] chivi chakapinda munyika uye rufu kupfurikidza nechivi, uye nokudaro rufu rwakapararira kuvanhu vose nemhaka yokuti vose vakanga vatadza.”—VaRoma 5:12, NW.
Kwave kune munhu mumwe bedzi akaberekwa asina chivi chakagarwa nhaka. Iyeyo akanga ari Mwanakomana akakwana waMwari, Jesu Kristu, ane upenyu hwakatamiswa huchibva kudenga kuenda kudumbu remhandara yechiJudha, Maria. Jesu akaramba asina chivi uye haana kufanirwa nokuurawa. Naizvozvo, rufu rwake rune ukoshi hunodzikinura “chivi chenyika.” (Johane 1:29, NW; Mateo 20:28) Ndokusaka Jesu aigona kuti: “Ndini kumuka noupenyu; unotenda kwandiri, kunyange akafa, uchararama.”—Johane 11:25.
Naizvozvo, hungu, unogona kuva nekariro yokubatanidzwazve navadiwa vako vakafa, asi ikoku kunoda kuti utende Jesu soMudzikinuri wako ndokumuteerera saMambo akagadzwa waMwari. Nokukurumidza Umambo hwaMwari huchabvisa ushati hwose mupasi rino. Vanhu vose vanoramba kuzviisa pasi pokutonga kwahwo vachaparadzwa. Zvisinei, vadzorwi voUmambo hwaMwari vachapukunyuka uye vachazvibatikanisa vamene mubasa rokushandura pasi rino kuva paradhiso.—Pisarema 37:10, 11; Zvakazarurwa 21:3-5.
Ipapo nguva inofadza ichasvika yokuti rumuko rutange. Uchavapo here kuti ugamuchire vakafa vachidzoka? Kwose kunotsamira pachaunoita zvino. Zvikomborero zvinoshamisa zvakamirira vose vanozviisa pasi zvino pokutonga kwoUmambo hwaJehovha kupfurikidza noMwanakomana wake, Jesu Kristu.