Tyisidziro Yenyukireya—Yabviswa Nokusingaperi!
KUGARA une rutyo rwakaipa hakusati kuri uko Mwari anoda nokuda kworudzi rwomunhu. Sa“Mwari anofara,” iye anoda kuti vafarikanye rugare ndokugara vakachengeteka—mukupfupikisa, vachifara. (1 Timotio 1:11, NW) Munyika yakazara netyisidziro dzenyukireya, ikoku hakubviri nenzira yakajeka.
“Rugare Nechengeteko”—Nyengedzo
Kunofanira kuva kuri pachena kuti tyisidziro yenyukireya haina kutongoenda. Zvisinei, pasinei zvapo nokusaterama kwezvamatongerwe enyika, kwemari, uye kwenzanga, marudzi anoratidzika zvikuru kuva ane tariro. Kuedza kwakatsiga kupedza ngozi yacho kwave kuri pachena chifo cheUN International Year of Peace muna 1986.
The Bulletin of the Atomic Scientists mumakore gumi apfuura yakachinja wachi yayo yezuva rorutongeso—mutoo wayo wokuratidzira kubvira kwehondo yenyukireya—kubva pamaminiti 3 pakati pousiku pasati pasvika kudzokera kumaminiti 17 pakati pousiku pasati pasvika. Muna 1989 Stockholm International Peace Research Institute yakataura kuti “tariro yechisarudzo cherwisano ine rugare ine hwaro huri nani kupfuura murimwe gore ripi neripi chifo chomugumo weHondo yeNyika II.”
Mumakore achangobva kupfuura Chibatanwa chaMarudzi chakasimbiswa kuti chibate nenzvimbo dzine zvinetso dzamarudzi ose. Budiriro yacho, nepo isina kukwana, yave yakakwana kuparira mudzimu wavose wokuva netariro. Nguva yemberi sezvinobvira ichaunza budiriro dzokuwedzera. Danidziro dzo“rugare nechengeteko” zvimwe dzichava dzinonzwika zvikuru nedzakakomba zvikuru. Idzo dzingatodavirwa.
Asi ngwarira! “Panguva ipi neipi pavanoti: ‘Rugare nechengeteko,’” rinonyevera kudaro Bhaibheri, “ipapo ruparadziko rwakamwe kamwe ruchakurumidza kuva pavari kungofanana namarwadzo enhamo pamukadzi ane pamuviri; uye havasati vachizotongopukunyuka.” Nokudaro, danidziro dzo“rugare nechengeteko” dzicharatidzira nguva yaMwari “yokuparadza avo [kupfurikidza nokushatisa, nenyukireya uye neimwe nzira,] vanoparadza pasi.”—1 VaTesaronika 5:3, 4, NW; Zvakazarurwa 11:18, NW.
Cherechedza kuti Bhaibheri harisati richitaura kuti marudzi achawana “rugare nechengeteko.” Iwo sezviri pachena achava achitaura pamusoro parwo nenzira yechienzi, achiratidzira kuva netariro uye kupwiswa kusina kunzwika kusvikira panguva ino. Mabanza okuwana rugare nechengeteko acharatidzika kuva ari pedyo zvikuru kupfuura nakare kose. Pasinei zvapo netyisidziro yenyukireya inopfuurira, marudzi achanyaradzwa ndokupinda mupfungwa yenhema yechengeteko.
VaKristu vechokwadi, zvisinei, havasati vachizonyengedzwa. Nefariro huru vachatarira mberi kworugare nechengeteko zvavanhu kuchimwe chinhu chiri nani!
Rugare Nechengeteko—Chinhu Chaichoicho
Mukuwirirana nePisarema 4:8, rugare rwechokwadi nechengeteko ruchawanwa bedzi mukati megadziriro yaJehovha Mwari: “Ndichavata pasi norugare, ndibatwe nehope; nokuti ndimi moga Jehovha munondigarisa pakasimba.” Danidziro ipi neipi yo“rugare nechengeteko” inotaurwa kunze kwamashoko akapoteredza egadziriro yoUmambo hwaJehovha inogona kuva bedzi nyengedzo. Haigoni kuwana chinhu chipi nechipi choukoshi husingagumi.
Hafu hadzina kunaka zvakakwana nokuda kwoUmambo hwaMwari hunodzorwa naKristu. Hurumende youmwari ichaita zvakawanda kupfuura kuderedza chiverengerero chezvombo zvenyukireya; ichazvibvisa chose chose nezvimwe zvombo zvose zvehondo. Pisarema 46:9 rinopikira, kuti: “Unogumisa kurwa kusvikira pakuguma kwenyika; unovhuna uta, nokuvhuna-vhuna pfumo; unopisa ngoro dzokurwa nomwoto.”
Nenzira yakafanana, tyisidziro dzenyukireya dzakapiwa namagwenya enyukireya asingashandi zvakanaka kana kuti dzakapiwa netsvina ine mwaranzi inochetura zvichava zvinhu zvomunguva yakapfuura. Kana kukasadaro mashoko aizova asiri echokwadi, anoti: “Mumwe nomumwe uchagara pasi pomuzambiringa wake napasi pomuonde wake, hakuna ungazovatyisa, nokuti muromo waJehovha wehondo wakataura izvozvo.” Mwari haagoni kureva nhema. Hatina chikonzero chokupanikira mashoko ake.—Mika 4:4; Tito 1:2.
Ungafarikanya here kuva nekariro yokugara munyika umo tyisidziro yenyukireya yakabviswa nokusingaperi? Unogona, nokuti Shoko raMwari rinoronga zvakajeka zvinodikanwa zvacho. Kupfurikidza nokudzidza pamusoro pazvo uye kupfurikidza nokurarama nenzira inowirirana, rimwe zuva ungava nomufaro wokutaura nebefu rorusununguko, uchiti: “Tyisidziro yenyukireya—yapera pakupedzisira!”
[Mufananidzo uri papeji 7]
Rugare ruchatonga munyika itsva yaMwari pasina tyisidziro dzipi nedzipi dzenyukireya
[Kwazvakatorwa]
M. Thonig/H. Armstrong Roberts
[Vakatipa Mufananidzo uri papeji 6]
Mufanikiso weU.S. National Archives