Nyanzvi Dzinopedza Kufunda dzeShoko raMwari
MUKUTEVEDZERA Vakristu vemuzana rekutanga remakore, Zvapupu zvaJehovha zvinozivikanwa munyika yose nokuda kwekuparidza kwazvo pasuo nesuo. Iri basa rakasimbiswa mutsinhiro dzokuzarura papurogiramu yekupedza kufunda yekirasi yechi102 yeWatchtower Bible School of Gilead.
Pana March 1, 1997, Albert Schroeder, mutezo weMutumbi Unodzora weZvapupu zvaJehovha, akakwevera ngwariro kunyaya yemisi ichangobva kupfuura mupepanhau rechiFrench Le Point. Rakadudza gadziriro dzeRoma Katurike dzekuvamba kuparidza paimba neimba muItaly. “Kuitira kuti [vafundisi veVatican] vasasvike vasina chinhu sezvavanokwikwidza munzvimbo yeZvapupu zvaJehovha,” yakataura kudaro nyaya yacho, “Vatican yakatoronga kudhindisa makopi miriyoni eEvhangeri yaMusande Marko, sezvo nhume dzayo dzinotarisana nenyanzvi [Zvapupu] mu‘kupa’ kwepasuo nesuo shoko rakanaka.”
Vakapedza kufunda 48 vari pakati peavo vakatevedzera mitoo yeunyanzvi yekuparidza yaJesu mukuparadzira Shoko raMwari. Vakanga vabva kunyika sere vachienda kuWatchtower Educational Center kuPatterson, New York. Mukati memwedzi mishanu yekudzidza kwavo, vakafunda Bhaibheri kubva kubutiro kusvika kubutiro. Kosi yavo yakabatanidzawo nhau yesangano raMwari, mativi anoshanda oupenyu hweufundisi, uye zvibereko zvomudzimu waMwari. Zvose izvozvi zvakanga zvine vavariro imwe—kuvagadzirira nokuda kwebasa roufundisi kunyika dzokumwe munyika 17 dzavakanga vachitumirwa kwadziri. Sezvo vakanga vachipedza kufunda, vateereri 5 015 vemarudzi akawanda vakagoverana mufaro wenhambo yacho. Izanoi rakaisvonaka rinoshanda iro vadzidzi ivavo veGilead vakagamuchira?
Kurudziro Panguva Yakafanira Nokuda Kwevafundisi Vatsva
Pashure petsinhiro dzokuzarura dzasachigaro, Ralph Walls, mubetseri weDare Revashandi reMutumbi Unodzora, akapa hurukuro pfupi yokutanga nezano rinoshanda nokuda kwevafundisi vatsva. Musoro wake wakanga uri “Yeukai Kuda.” Akanongedzera kuti Bhaibheri, muna 2 Timotio ganhuro 3, rakafanotaura kuti nyika yaizowedzera mukusava norudo. Akapa ichi chiyeuchidzo panguva yakafanira kuvafundisi vatsva, mutsinhirano nerondedzero yerudo inowanwa pana 1 VaKorinte 13:1-7: “Imi, sevafundisi, mungapfuura maawa enyu anodikanwa. Mungava nepfuma yezivo kubva murovedzo yenyu yeGilead. Kana kuti tingashanda nokushingaira nguva yemuraudzo pamigove yedu yepabazu. Asi nhamburiko dzedu dzose nokurega zvimwe zvinhu dzinova pasina kana tikakanganwa kuda.”
Akatevera papurogiramu akanga ari Carey Barber, weMutumbi Unodzora, uyo akarangarira nhau inoti “Jehovha Ari Kutitungamirira Kurukundo.” Kubva mumavambo avo maduku mushure meHondo Yenyika 1, Jehovha Mwari akatungamirira vabatiri vake vakatendeka kurukundo mukuziviswa kwemashoko akanaka eUmambo hwake, pasinei zvapo nokutambudzwa. Muna 1931 Vadzidzi veBhaibheri, sokuzivikanwa kwavaiitwa panguva iyoyo, vakagamuchira zita rokuti Zvapupu zvaJehovha, kukunetseka kwevafundisi veChikristudhomu. “Kirasi yechi102 yevafundisi vakarovedzwa neGilead zvino ine ropafadzo huru yekuva negoverano huru mubasa rakaisvonaka rekupa vakawanda sevanobvira mukana wekudzidza zita iroro rinoyera,” vakadaro Hama Barber. Vanokumbanira ndaza refu yevafundisi 7 131 vakarovedzwa paChikoro cheGilead uye vakabetsera kutambanudza kuparidzwa kweshoko raMwari kubva munyika 54 muna 1943 kusvika kunyika 233 nhasi.
Mukurukuri akatevera, Lloyd Barry, mumwezve weMutumbi Unodzora, akanga ari akapedza kufunda wekirasi yechi11 yeGilead uye akabatira semufundisi muJapan kwemakore anopfuura 25. Akagovera kurudziro nehurukuro yake yaiti, “Urambire Pazvinhu Izvi.” “Mufaro wenyu mukuru uchawanwa mukutsungirira,” akaudza vadzidzi vacho kudaro. Mibayiroi inobva mukutsungirira mubasa reufundisi kana kuti mumugove upi noupi weubati ushe hwaMwari? “Kupfuura zvose, kutsungirira kwedu kunoita kuti mwoyo waJehovha ufare . . . Kune gutsikano huru inowanwa mukuchengeta perero mumuedzo . . . Itai kuti basa reufundisi rive basa roupenyu hwenyu . . . mubayiro wenyu uchava ‘maita zvakanaka’ anofadza.” (Mateo 25:21; Zvirevo 27:11) Mukugumisa hurukuro yavo, Hama Barry nemwoyo wose vakarumbidza kuti vafundisi vatsva “[va]rambire pazvinhu izvi” kupfurikidza nokutsunga kuti basa reufundisi rive upenyu hwavo chaihwoihwo.—1 Timotio 4:16.
“Muchaonei?” wakanga uri mubvunzo wakabvunzwa naKarl Adams, uyo akava negoverano mukurayiridza kirasi dzakawanda dzeGilead. Akaonesa kuti izvo vafundisi vatsva vaizoona mumigove yavo zvinotsamira kwete bedzi pakuona kwavo chaikoiko asiwo pamaziso emwoyo yavo. (VaEfeso 1:18) Ikoku kwakaenzanisirwa neizvo tsori dzechiIsraeri dzakaona apo dzakanzvera Nyika Yakapikirwa. Tsori dzose 12 dzakaona zvinhu zvimwe chetezvo mukuona chaikoiko, asi mbiri bedzi dzakaona Nyika Yakapikirwa mumurangariro waMwari. Vafundisi vanogonawo kurangarira zvinhu munzira dzakasiyana-siyana. Mudzimwe nyika uko vachave vachibatira, vangaona urombo, kutambura, uye kusava netariro. Asi havafaniri kusafadzwa ndokusiya mugove wacho. Hama Adams vakataura nezvemumwe mufundisi wekirasi ichangobva kupfuura uyo akati: “Izvi zvakaitika zvakandiita kuti ndizive kuti ndinofanira kugara kuno. Ava vanhu vanoda tariro yenguva yemberi. Ndinoda kuvandudza upenyu hwavo.” Hama Adams vakagumisa kupfurikidza nokukurudzira vafundisi vatsva kuona nyika dzavakagoverwa kwadziri senzvimbo idzo Jehovha akasarudza kuita rutivi rweParadhiso Yake yenyika yose uye kurangarira vanhu ikoko semitezo inokarirwa yenzanga yenyika itsva.
Hurukuro yekupedzisira muurwu rutivi rwepurogiramu yakapiwa naWallace Liverance, uyo akabatira kwemakore anoverengeka mubasa reufundisi asati ava murayiridzi weGilead. “Itai Nokunzwisisa Mabasa Anoshamisa aMwari” ndiwo wakanga uri musoro wehurukuro yake. Kuita nokunzwisisa kunobatanidza kuita nokuchenjera, kungwarira, uye kufunga. Ichocho chakanga chiri chimwe chinhu icho Mambo Sauro waIsraeri akakundikana kuita.—1 Samueri 13:9-13; 15:1-22.
Imwe nzira yekuita nayo nenzwisiso iri kupfurikidza nokubvuma zvinetso zvekuchinjira kunzira itsva youpenyu, kubatanidza kudzidza mutauro mutsva uye kusvika pakuziva vanhu. Zviitiko izvo vafundisi vanova nazvo mukunangana nezvinetso uye kukurira mhinganidzo zvinogona kuvasimbisa mumudzimu munzira iyo Joshua naKarebi vakasimbiswa nayo sezvo vakakurira nyika iyo Mwari akanga avagovera kwavari.
Bvunzurudzo
Rutivi rwakatevera rwepurogiramu rwaibatanidza nhevedzano yebvunzurudzo. Harold Jackson akabvunzurudza Ulysses Glass, munyoresi uye murayiridzi weChikoro cheGilead kwenguva refu, uyo zvino ava nemakore 85 okukura. Vafundisi vakawanda vachiri mubasa racho vanoyeuka zvakanaka makore ake ekudzidzisa nokutendeka uye kurovedza. Pashure kwakauya Mark Noumair, murayiridzi weGilead uyo akapedza makore munyika dzokumwe muAfrica asati akumbanira mitezo yeChikoro cheGilead. Akabvunzurudza vadzidzi pamusoro peushumiri hwavo mukati memwedzi mishanu yekudzidza kwavo. Zvakaitika zvavo zvakaratidzira nenzira yakajeka kuti kune vanhu vanofarira Shoko raMwari mundima yemunzvimbomo.
Ipapo Robert Ciranko naCharles Molohan vakataura nevarume vane ruzivo rwekuzviwanira avo vakanga vachipinda chimwe chikoro pazvivako zvacho, chikoro chevashandi vepamapazu. Zano ravo kukirasi yaipedza kufunda raibatanidza kudikanwa kwekuva vanozvininipisa uye kubetsera kukubatana kweungano. Vakakarakadza kuti vakapedza kufunda havafaniri kuva nepfungwa dzakafanofungwa dzezvichaitika mubasa reufundisi asi, panzvimbo pezvo, kungoda kugamuchira mamirire ezvinhu api kana api. Kushandisa iri zano pasina mubvunzo kuchabetsera vafundisi vatsva kuita migove yavo sevadzidzisi veShoko raMwari.
Pakupedzisira, Theodore Jaracz, mumwe mutezo weMutumbi Unodzora, akataura kuvateereri pamusoro unoti “Ndiani Ari Kupesvedzera Mumwe?” Akatsanangura kuti apo isu seVakristu tinoratidzira chibereko chomudzimu, tinogona kuva pesvedzero yakanaka pavamwe vanhu. “Vafundisi vanotumwa nesangano raJehovha vakaburitsa chinyorwa chinorumbidzwa chekupesvedzera vanhu munzira yakanaka, yomudzimu,” akatsinhira kudaro. Ipapo akarondedzera dzimwe tsinhiro dzakaitwa nevanhu vakabetserwa kubatira Mwari semugumisiro wemienzaniso yakanaka yakagadzwa nevafundisi. “Pfuurirai kuchengeta mukurumbira uyo vanhu vaJehovha vakawana uye pfuurirai kugogodza pamasuo iwayo mumigove yenyu yekudzimwe nyika muchitsvaka vakafanirwa . . . Uyewo, kupfurikidza nomufambiro wenyu wakarurama, wakachena, dzivisai mudzimu wenyika ino, uye ivai pesvedzero yakanaka kukurumbidzwa nokukudzwa kwaJehovha,” akagumisa achidaro.
Mukupfupikiswa kwepurogiramu yacho, sachigaro akagoverana kwaziso dzakabva pedyo uye kure uye ipapo akapa madhipuroma ndokuzivisa migove yeufundisi. Pashure paizvozvo, mumwe wevakapedza kufunda akarava chisarudzo chekirasi achionga kurayiridzwa kwakagoverwa. Nenzira yakajeka, purogiramu yekupedza kufunda yekirasi yechi102 yakaita kuti vose vakanga vari muvateereri vave vakatsunga zvikuru kufambira mberi mukuparidza Shoko raMwari.
[Mufananidzo uri papeji 31]
Kirasi Yakapedza Kufunda yeWatchtower Bible School of Gilead Yechi 102
Mundaza iri pasi apa, mitsetse yakaverengwa ichibva kumberi ichienda kumashure, uye mazita akarongwa kubva kuruboshwe achienda kurudyi mumutsetse mumwe nomumwe.
(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.