Jehovha Anotonga Netsitsi
MUNHAU yose vatongi vakawanda vakashandisa simba noruzvidzo rwoutsinye nokuda kwokutambura kwevatongwi vavo. Zvisinei, Jehovha akagovera musiyano kupfurikidza nokusarudza rudzi—Israeri—nokurutonga netsitsi.
VaIsraeri pavakanga vachiri varanda muEgipita yakare, Jehovha akanzwa kuchemera kwavo betsero. “Pakutambudzika kwavo kwose naiyewo wakanga achitambudzika, . . . wakavadzikinura norudo rwake netsitsi dzake.” (Isaya 63:9) Jehovha akaponesa Israeri, akavagovera zvokudya nenzira inoshamisa, uye akavanunura kuti vapinde munyika yavo pachavo.
Vara raJehovha retsitsi dzakaratidzirwazve mumitemo yaakapa rudzi urwu. Akarayira vaIsraeri kuti vabate netsitsi nherera, chirikadzi, uye vagari vokune dzimwe nyika. Vakanga vasingafaniri kukorovhera vakaremara.
Mutemo waida kuti tsitsi dziratidzirwe vaya vaishayiwa. Varombo vaigona kuunganidza zvaiva zvasara pashure pokukohwa. Zvikwereti zvaidzimwa mugore reSabata (rechinomwe). Minda yose yenhaka yakanga yatengeswa yaifanira kudzorerwa mugore reJubheri (rechi50). Ancient Israel—Its Life and Institutions rinoshuma kuti: “Muna Israeri, hamuna kumbova nemapoka enzanga mupfungwa yazvino uno.” “Mumazuva apakuvamba okugara, vaIsraeri vose vaifarikanya mararamire akangoda kufanana.”—Revhitiko 25:10; Dheuteronomio 15:12-14; 24:17-22; 27:18.
Kutevedzera Tsitsi dzaJehovha
Vabatiri vaMwari vanokurudzirwa netsitsi dzake. Somuenzaniso, munhau yose, mamwe madzimambo matsva akauraya mitezo yakanga ichiri mipenyu yeimba youmambo yakapfuura. Asi mubatiri waJehovha Dhavhidhi haana kuita izvi. Pashure pokufa kwaMambo Sauro, Dhavhidhi akadzivirira Mefibhosheti, muzukuru waSauro akanga ari mupenyu uye mudyi wenhaka. “Mambo waka[nzwira tsitsi, NW] Mefibhosheti mwanakomana waJonatani, mwanakomana waSauro.”—2 Samueri 21:7.
Hapana mumwe munhu akatevedzera tsitsi dzaJehovha sezvakaita Jesu. Zvishamiso zvake zvakawanda zvakasundwa netsitsi dzaMwari. Pane imwe nhambo mumwe aiva namaperembudzi akamuteterera kuti: “Kana muchida, munogona kundinatsa.” Jesu akasundwa netsitsi ndokumubata, achiti: “Ndinoda, chinatswa.” (Marko 1:40-42) Imwe nguva mapoka makuru akatevera Jesu. Pakati penyonga nyonga, Jesu akapa ngwariro kumapofu maviri aichema achiti: “Ishe, Mwanakomana waDhavhidhi, tinzwirei ngoni! . . . Jesu akaanzwira tsitsi, akabata meso awo; pakarepo akasvinudzwa.”—Mateo 20:29-34.
Mapoka makuru haana kuparadza mirangariro yaJesu nokuda kwavamwe. Nemhaka yokuti vakanga vasina kudya kwenguva yakati, akati pane imwe nhambo: “Ndine tsitsi navanhu vazhinji.” Naizvozvo akavadyisa nenzira inoshamisa. (Marko 8:1-8) Jesu paakafamba, haana kungodzidzisa mapoka bedzi asi aicherekedza zvaaida. (Mateo 9:35, 36) Pashure pekufamba kwakadaro, Jesu navadzidzi vake vakanga vasina nguva yokuzorora kunyange yokudya zvokudya. Nhoroondo yeBhaibheri inotiudza kuti: “Vakaenda negwa kunzvimbo murenje vari voga. Vanhu vakavaona vachienda, vazhinji vakamuziva, vakamhanyira vose ikoko, vachibva pamaguta ose, vakavatangira kusvika. Zvino wakati achibuda mugwa, akaona vazhinji-zhinji, akavanzwira tsitsi, nokuti vakanga vakafanana namakwai asina mufudzi; akatanga kuvadzidzisa zvizhinji.”—Marko 6:31-34.
Chakasunda Jesu kwakanga kusiri kungorwara nourombo zvavanhu asi umudzimu hwavo. Vatungamiriri vavo vakanga vachivakorovhera, naizvozvo Jesu “akavanzwira tsitsi.” Shoko rechiGiriki rokuti “nzwira tsitsi” rinoreva “kunzwa ura huchirira.” Zvirokwazvo Jesu akanga ari munhu ane tsitsi!
Tsitsi Munyika Ine Utsinye
Jesu Kristu zvino ndiMambo woUmambo hwaJehovha hwokudenga. Sezvaakaita muna Israeri wakare, nhasi Mwari anotonga vanhu vake netsitsi. “Vachava vangu, ndizvo zvinotaura Jehovha wehondo, ivo vangu chaivo, nezuva randichazviita; ndichavanzwira tsitsi.”—Maraki 3:17.
Avo vanoda kugamuchira tsitsi dzaJehovha vanofanira kutevedzera nzira dzake. Chokwadi, tinorarama munyika umo vanhu vari kufarira zvikuru kuchengetedza mararamiro avo kupfuura kubetsera avo vanoshayiwa. Vanhu vane simba kazhinji kazhinji vanotsvaka mhindu nepo vachikuvadza chengeteko yavashandi nevatengi. Pana 2 Timotio 3:1-4, Bhaibheri rinorondedzera nenzira yakarurama mamiriro etsika dzenguva yedu ayo aparadza tsitsi mumwoyo yavakawanda kwazvo.
Zvisinei, sezvingabvira tingawana mikana yokuratidza tsitsi. Tingapa betsero inodikanwa kuvavakidzani vedu here? Pane mumwe munhu ari kurwara watingashanyira here? Tingagona kunyaradza vaya vakaora mwoyo, maererano nezano rokuti: “Musimbise vanopera mwoyo, mutsigire vasina simba” here?—1 VaTesaronika 5:14.
Tsitsi dzichatibetserawo kudzivisa kutaura nehasha vamwe pavanoita mhosho. Tinoudzwa kuti: “Shungu dzose, nokutsamwa, nehasha, nokupopota, nokutuka, nezvakaipa zvose, ngazvibviswe kwamuri; muitirane mwoyo munyoro, munzwirane tsitsi, mukanganwirane, sezvamakakanganwirwa naMwari muna Kristu.”—VaEfeso 4:31, 32.
Tsitsi dzichatibetsera kudzivisa murangariro wokushandisa simba zvisina kufanira. Bhaibheri rinoti: “Fukai mwoyo une tsitsi, nomwoyo munyoro, nokusazvikudza, nounyoro, nomwoyo murefu.” (VaKorose 3:12) Kuzvininipisa kunotigonesa kuzviisa munzvimbo yaavo vatinotarisira. Kuva ane tsitsi kunobatanidza kuzvininipisa uye ane mufungo panzvimbo pokuva akaoma kufadza. Kuita zvakanaka hakufaniri kuva chikonzero chokubata vanhu semapatiwo zvawo emuchina. Uyewo, mumhuri varume vane tsitsi vanoyeuka kuti vadzimai vavo midziyo isina simba. (1 Petro 3:7) Kufungisisa muenzaniso waJesu wokuva netsitsi kunogona kutibetsera mune zvose izvi.
Sezvo Jesu akanzwira tsitsi zvikuru vanhu mukati moushumiri hwake hwapasi, tinogona kuva nechokwadi chokuti zvino iye Mutongi ane tsitsi, uye achapfuurira kuva akadaro. Pisarema 72 rinoti nenzira youporofita nezvake: “Uchatongera varombo vavanhu, uchaponesa vana vavashayiwi, nokupwanya mumanikidzi. Uchabata ushe kubva pagungwa kusvikira pagungwa, nokubva parwizi kusvikira kumigumo yapasi. Uchanzwira nyasha murombo nomushayiwi, uchaponesa mweya yavashayiwi.”—Pisarema 72:4, 8, 13.
Shoko raMwari rinofanotaura kuti: “Uchatongera varombo nokururama, uchatambira vanyoro venyika mhaka dzavo zvakarurama . . . uchauraya vakaipa.” Pashure pokurondedzera nzira iyo kunyange vamwe vanhu vane utsinye, vakafanana nemhuka vachachinja nayo nzira dzavo, uporofita hwacho hunopfuurira kuti: “Hazvingakuvadzi kana kuparadza pagomo rangu rose dzvene, nokuti nyika yose ichazara nokuziva Jehovha, sezvinofukidza mvura pasi pegungwa.” (Isaya 11:4-9) Uporofita uhu hunovimbisa chaizvoizvo nzanga yepasi rose yavanhu vanoziva Jehovha ndokutevedzera nzira dzake dzetsitsi!