Mamwe Makwai Nesungano Itsva

“Navatorwawo . . . , mumwe nomumwe unochengeta sabata kuti arege kurimhura, nokubatisisa sungano yangu; ivavo ndichavauyisa kugomo rangu dzvene.”—ISAYA 56:6, 7.

1. (a) Maererano nechiono chaJohane, chii chinoitwa apo mhepo dzorutongeso rwaJehovha dzinenge dzakabatwa? (b) Johane akaona bokai rinoshamisa?

MUCHIONO chechina mubhuku raZvakazarurwa, muapostora Johane akaona mhepo dzinoparadza dzorutongeso rwaJehovha dzichibatwa apo kuiswa chisimbiso kwemitezo yose ya“vaIsraeri vaMwari” kwakanga kuri kupedziswa. Ivava ndivo vokutanga kukomborerwa kupfurikidza naJesu, rutivi rwokutanga rwembeu yaAbrahama. (VaGaratia 6:16; Genesi 22:18; Zvakazarurwa 7:1-4) Muchiono chimwe chetecho, Johane akaona “vazhinji-zhinji vasingagoni kuverengwa nomunhu, vakabva kundudzi dzose, namarudzi, navanhu, nendimi . . . , vakadanidzira nenzwi guru, vachiti: Ruponeso ngaruve kuna Mwari unogara pachigaro choushe, nokuGwayana.” (Zvakazarurwa 7:9, 10) Mukuti, “Ruponeso ngaruve . . . kuGwayana,” boka guru rinoratidza kuti ivowo vanokomborerwa kupfurikidza neMbeu yaAbrahama.

2. Boka guru rakaoneka rini, uye rinoziviswa sei?

² Iri boka guru rakazivikanwa shure muna 1935, uye nhasi rinopfuura mamiriyoni mashanu. Yakaiswa chiratidzo chokupukunyuka dambudziko guru, mitezo yaro ichaparadzaniswa nokuda kwoupenyu husingaperi apo Jesu anoparadzanisa “makwai” ne“mbudzi.” VaKristu veboka guru vari pakati pe“mamwe makwai” omumuenzaniso waJesu wematanga amakwai. Vanokarira kurarama nokusingaperi muparadhiso yapasi.—Mateo 25:31-46; Johane 10:16; Zvakazarurwa 21:3, 4.

3. VaKristu vakazodzwa namamwe makwai vakasiyana sei kana toreva nezvesungano itsva?

³ Nokuda kwavane 144 000, chikomborero chesungano yaAbrahama chinopiwa kupfurikidza nesungano itsva. Sevanotora rutivi musungano iyi, vanova “pasi penyasha” uye “pasi pomurayiro waKristu.” (VaRoma 6:15; 1 VaKorinte 9:21) Nokudaro, mitezo 144 000 bedzi yaIsraeri waMwari yakadya zviratidzo nenzira yakafanira mukati meChirangaridzo chorufu rwaJesu, uye Jesu akaita sungano yake yoUmambo navo bedzi. (Ruka 22:19, 20, 29) Mitezo yeboka guru haisi vanotora rutivi musungano itsva. Zvisinei, vanosonganirana naIsraeri waMwari ndokurarama navo mu“nyika” yavo. (Isaya 66:8) Naizvozvo zvine mufungo kutaura kuti ivowo vanova pasi penyasha dzisina kufanirwa dzaJehovha uye pasi pomurayiro kuna Kristu. Nepo vasiri vanhu vanotora rutivi musungano itsva, vanobetserwa nayo.

“Vatorwa” na“vaIsraeri vaMwari”

4, 5. (a) Maererano naIsaya, nderipi boka raizoshumira Jehovha? (b) Isaya 56:6, 7 inozadzikwa sei paboka guru?

⁴ Muporofita Isaya akanyora kuti: “Navatorwawo vanonamatira Jehovha, kuti vamushumire, nokudana zita raJehovha, nokuva varanda vake, mumwe nomumwe unochengeta sabata kuti arege kurimhura, nokubatisisa sungano yangu; ivavo ndichavauyisa kugomo rangu dzvene, nokuvafadza muimba yangu yokunyengetera; zvipiriso zvavo zvinopiswa nezvibayiro zvavo zvichagamuchirwa paartari yangu.” (Isaya 56:6, 7) Muna Israeri, izvi zvaireva kuti “vatorwa,” vasiri vaIsraeri, vaizonamata Jehovha—vachida zita rake, vachiteerera mashoko esungano yoMutemo, vachichengeta Sabata, uye vachipa zvipiriso patembere, “imba yokunyengetera” yaMwari.—Mateo 21:13.

⁵ Muzuva redu, “vatorwawo vanonamatira Jehovha” iboka guru. Ivava vanoshumira Jehovha pamwe chete naIsraeri waMwari. (Zekaria 8:23) Vanopa zvibayiro zvimwe chetezvo zvinogamuchirika saIsraeri waMwari. (VaHebheru 13:15, 16) Vanonamatira mutembere yaMwari yomudzimu, “imba [yake] yokunyengetera.” (Enzanisa naZvakazarurwa 7:15.) Vanochengeta Sabata yevhiki nevhiki here? Vakazodzwa kana kuti mamwe makwai havarayirwi kuita izvi. (VaKorose 2:16, 17) Zvisinei, Pauro akati kuvaKristu vechiHebheru vakazodzwa: “Zvino zororo resabata ravanhu vaMwari richiripo. Nokuti uyo wakapinda muzororo rake, wakazorora iye amene pamabasa ake, saMwari pane ake.” (VaHebheru 4:9, 10) VaHebheru ivavo vakapinda muiri “zororo resabata” pavakazviisa pasi po“kururama kwaMwari” ndokuzorora pakuedza kuzviruramisa namabasa oMutemo. (VaRoma 10:3, 4) VaKristu Vemamwe Marudzi vakazodzwa vanofarikanya zororo rimwe chetero kupfurikidza nokuzviisa pasi pokukururama kwaJehovha. Boka guru rinovakumbanira muzororo iroro.

6. Mamwe makwai nhasi anobata sei sungano itsva?

⁶ Uyezve, mamwe makwai akazviisa pasi pesungano itsva sezvo vatorwa vakazviisa pasi pesungano Yomutemo. Munzirayi? Kwete kupfurikidza nokuva vanotora rutivi mairi asi kupfurikidza nokuzviisa pasi pemitemo ine chokuita nayo uye kubetserwa negadziriro dzayo. (Enzanisa naJeremia 31:33, 34) Kufanana neshamwari dzawo dzakazodzwa, mamwe makwai ane mutemo waJehovha wakanyorwa mu‘mwoyo yawo.’ Anoda zvikuru uye anoteerera mitemo yaJehovha nenheyo. (Pisarema 37:31; 119:97) Kufanana navaKristu vakazodzwa, anoziva Jehovha. (Johane 17:3) Zvakadini nokudzingiswa? Makore ane 1 500 sungano itsva isati yaitwa, Mosesi akakurudzira vaIsraeri kuti: “Dzingisai mwoyo yenyu.” (Dheuteronomio 10:16; Jeremia 4:4) Nepo kudzingiswa kwokunyama kwokumanikidzirwa kwakapfuura noMutemo, vose vari vaviri vakazodzwa namamwe makwai vanofanira ku“dzingisa” mwoyo yavo. (VaKorose 2:11) Pakupedzisira, Jehovha anokanganwira mhosho yemamwe makwai pahwaro hwe“ropa . . . resungano itsva” rakateurwa raJesu. (Mateo 26:28; 1 Johane 1:9; 2:2) Mwari haavagamuchiri savanakomana vomudzimu, sezvaanoita vane 144 000. Asi anoruramisa mamwe makwai, mupfungwa yokuti Abrahama akaruramiswa seshamwari yaMwari.—Mateo 25:46; VaRoma 4:2, 3; Jakobho 2:23.

7. Ndeipi kariro inozarukira mamwe makwai nhasi, anoruramiswa sezvakaitwa Abrahama?

⁷ Nokuda kwavane 144 000, kururamiswa kunozarura nzira yokuva kwavo netariro yokutonga naJesu muUmambo hwokudenga. (VaRoma 8:16, 17; VaGaratia 2:16) Nokuda kwamamwe makwai, kururamiswa seshamwari dzaMwari kunoabvumira kugamuchira tariro youpenyu husingaperi muparadhiso yapasi—kungava kupfurikidza nokupukunyuka Armagedhoni sorutivi rweboka guru kana kuti kupfurikidza no‘kumuka kwavakarurama.’ (Mabasa 24:15) Iropafadzo yakadini kuva netariro yakadaro uye kuva shamwari yaChangamire wechisiko chose, kuva “muenzi mutende [rake]”! (Pisarema 15:1, 2, NW) Hungu, vose vari vaviri vakazodzwa namamwe makwai vanokomborerwa nenzira yakaisvonaka kupfurikidza naJesu, Mbeu yaAbrahama.

Zuva Guru Reyananiso

8. Chii chakafanofananidzirwa nezvibayiro zveZuva Reyananiso muMutemo?

⁸ Pakukurukura sungano itsva, Pauro akayeuchidza varavi vake nezveZuva Reyananiso regore negore musungano yoMutemo. Pazuva iroro, zvibayiro zvakasiyana zvaipiwa—chimwe nokuda kworudzi rwouprista rwaRevhi uye chimwe nokuda kwendudzi 12 dzavasiri vaprista. Izvi zvakanguri zvatsanangurwa sezvaifanofananidzira chibayiro chikuru chaJesu chaizobetsera vose vari vaviri vane 144 000 vane tariro yokudenga uye mamiriyoni ane tariro yapasi.a Pauro akaratidza kuti mukuzadzika betsero dzechibayiro chaJesu dzinopiwa kupfurikidza neZuva guru Reyananiso musungano itsva. SoMuprista Mukuru wezuva iri guru, Jesu akapa upenyu hwake hwakakwana sechibayiro cheyananiso kuitira kuti awane “rudzikinuro rwusingaperi” nokuda kwavanhu.—VaHebheru 9:11-24.

9. Vachiva musungano itsva, vaKristu vakazodzwa vechiHebheru vaigona kugamuchirei?

⁹ VaKristu vakawanda vechiHebheru vezana ramakore rokutanga vakanga vachiri ku“shingairira murayiro” waMosesi. (Mabasa 21:20) Nenzira yakafanira, ipapoka, Pauro akavayeuchidza kuti: “[Jesu] Murevereri wesungano itsva, kuti, rufu zvarwakasvika kuzodzikinura avo vakadarika musungano yokutanga, vakadanwa vagopiwa chipikirwa chenhaka isingaperi.” (VaHebheru 9:15) Sungano itsva yakasunungura vaKristu vechiHebheru pasungano yekare, yaifumura kutadza kwavo. Nemhaka yesungano itsva, vaigona kugamuchira “chipikirwa chenhaka [yokudenga] isingaperi.”

10. Vakazodzwa namamwe makwai vanoonga Mwari nokuda kwechii?

¹⁰ “Ani naani” uyo “unotenda kuMwanakomana,” achabetserwa nechibayiro chorudzikinuro. (Johane 3:16, 36) Pauro akati: “Kristuwo, zvaakaitwa chibayiro kamwe chete, kuti atakure zvivi zvavanhu vazhinji, uchazoonekwa rwechipiri, asingatakuri zvivi, naivo vanomutarira kuti avaponese.” (VaHebheru 9:28) Nhasi, avo vanotsvaka Jesu nomwoyo wose vanobatanidza vaKristu vari kurarama vakazodzwa vaIsraeri waMwari uye mamiriyoni anoumba boka guru, avo vanewo nhaka isingaperi. Mapoka ose ari maviri anoonga Mwari nokuda kwesungano itsva uye nokuda kwezvikomborero zvinopa upenyu zvine chokuita nayo, kubatanidza Zuva guru Reyananiso uye ushumiri hwoMuprista Mukuru, Jesu, muNzvimbo Tsvene tsvene yokudenga.

Kubatikana Mubasa Rinoyera

11. Nehana dzakacheneswa kupfurikidza nechibayiro chaJesu, vose vari vaviri vakazodzwa namamwe makwai vanoitei vachifara?

¹¹ Mutsamba yake kuvaHebheru, Pauro akasimbisa kukosha kukuru kwechibayiro chaJesu mugadziriro yesungano itsva chichienzaniswa nezvipiriso zvezvivi musungano yekare. (VaHebheru 9:13-15) Chibayiro chiri nani chaJesu chinokwanisa ku“natsa hana dzedu pamabasa akafa, kuti tishumire Mwari mupenyu.” Nokuda kwavaKristu vechiHebheru, “mabasa akafa” aibatanidza “k[u]darika pasungano yokutanga.” Nokuda kwavaKristu nhasi, anobatanidza zvivi zvakaitwa munguva yakapfuura izvo zvakapfidzwa zvechokwadi uye izvo Mwari akakanganwira. (1 VaKorinte 6:9-11) Nehana dzacheneswa, vaKristu vakazodzwa vano“shumir[a] Mwari mupenyu.” Uye ndizvo zvinoitawo boka guru. Vachenesa hana dzavo kupfurikidza ne“ropa reGwayana,” vari mutembere huru yomudzimu yaMwari, “va[chi]mushumira masikati nousiku.”—Zvakazarurwa 7:14, 15.

12. Tinoratidza sei kuti tine “kutenda kwakasimba”?

¹² Mukuwedzera, Pauro akati: “Ngatiswedere nomwoyo wazvokwadi, nokutenda kwakasimba, mwoyo yedu yasaswa kuti inatswe pahana yakaipa, nemiviri yedu yakashambidzwa nemvura yakanaka.” (VaHebheru 10:22) Tingaratidza sei kuti tine “kutenda kwakasimba”? Pauro akakurudzira vaKristu vechiHebheru kuti: “Ngatichengete kwazvo kupupura kwetariro yedu [yokudenga], kuti irege kuzununguka; nokuti iye, wakapikira, wakatendeka; ngatirangarirane, timutsane mwoyo kuti tive norudo namabasa akanaka, tisarega kuungana kwedu, sezvinoita vamwe, asi tirayirane; zvikuru zvamunoona kuti zuva roswedera.” (VaHebheru 10:23-25) Kana kutenda kwedu kuri kupenyu, isuwo hatizo‘regi kuungana kwedu pamwe chete.’ Tichafara kunyandura hama dzedu uye kunyandurirwa nadzo kurudo namabasa akanaka uye kusimbiswa nokuda kwebasa rinokosha rokuzivisa pachena tariro yedu, ingava iri yapasi kana kuti yokudenga.—Johane 13:35.

“Sungano Isingaperi”

13, 14. Sungano itsva haiperi munzirai?

¹³ Chii chinoitika apo vokupedzisira vevane 144 000 vanowana tariro yavo yokudenga? Sungano itsva icharega kushanda here? Panguva iyoyo, hapana mutezo waIsraeri waMwari uchasara pasi pano. Vanotora rutivi vose musungano yacho vachava naJesu “muushe hwaBaba” vake. (Mateo 26:29) Asi tinoyeuka mashoko aPauro mutsamba yake yokuvaHebheru okuti: “Mwari worugare, wakadzosa kuvakafa mufudzi mukuru wamakwai, iye Ishe wedu Jesu Kristu, neropa resungano isingaperi.” (VaHebheru 13:20; Isaya 55:3) Sungano itsva haiperi mupfungwai?

¹⁴ Chokutanga, kusafanana nesungano yoMutemo, haizombofi yakatsiviwa. Chechipiri, migumisiro yokushanda kwayo ndeyechigarire, kunyange sezvakaita umambo hwaJesu. (Enzanisa Ruka 1:33 na1 VaKorinte 15:27, 28.) Umambo hwokudenga hune nzvimbo isingagumi muzvinangwa zvaJehovha. (Zvakazarurwa 22:5) Uye chechitatu, mamwe makwai achapfuurira kubetserwa negadziriro yesungano itsva. Mukati moKutonga kwaKristu Kwamakore Ane Chiuru, vanhu vakatendeka vacharamba vachi“shumira [Jehovha] masikati nousiku mutembere yake” sezvavanongoita zvino. Jehovha haazoyeukizve zvivi zvavo zvomunguva yakapfuura zvakakanganwirwa pahwaro hwe“ropa resungano” raJesu. Vachapfuurira kufarikanya chimiro chakarurama seshamwari dzaJehovha, uye mutemo wake uchange wakangonyorwa mumwoyo yavo.

15. Rondedzera ukama hwaJehovha navanamati vake vapasi munyika itsva.

¹⁵ Jehovha ipapo achakwanisa kutaura nezveava vabatiri vari vanhu kuti: ‘Ndiri Mwari wavo, uye ivo vanhu vangu’ here? Hungu. “Uchagara navo, ivo vachava vanhu vake; Mwari amene uchava navo.” (Zvakazarurwa 21:3) Vachava “misasa yavatsvene,” vamiriri vapasi ve“guta rinodikanwa,” mwenga wokudenga waJesu Kristu. (Zvakazarurwa 14:1; 20:9; 21:2) Zvose izvi zvichava zvinobvira nemhaka yokutenda kwavo “ropa resungano” raJesu rakateurwa uye kuzviisa kwavo pasi pamadzimambo navaprista vokudenga, avo pavakanga vari pasi pano vakanga vari Israeri waMwari.—Zvakazarurwa 5:10.

16. (a) Ndezvipi zvinobvira zvakamirira avo vanomutsirwa papasi? (b) Ndezvipi zvikomborero zvichauya pakupera kwamakore ane chiuru?

¹⁶ Zvakadini nevakafa vanomutswa pasi pano? (Johane 5:28, 29) Ivowo vachakumbirwa kuti va“zviropafadze” kupfurikidza naJesu, Mbeu yaAbrahama. (Genesi 22:18, NW) Vachafanirawo kuda zita raJehovha, kumushumira, kupa zvibayiro zvinogamuchirika, uye kuita basa rinoyera muimba yake yomunyengetero. Avo vanoita kudaro vachapindawo muzororo raMwari. (Isaya 56:6, 7) Panosvika mugumo wamakore ane chiuru, vakatendeka vose vachava vapinzwa mukukwana kwavanhu kupfurikidza nokushumira kwaJesu Kristu navaprista biyake vane 144 000. Vachava vakarurama, kwete kungoruramiswa seshamwari dzaMwari. Vachava va“penyu,” vachiva vasina chivi chose chose norufu zvakagarwa nhaka kuna Adhama. (Zvakazarurwa 20:5; 22:2) Ichocho chichava chikomborero chakadini! Mukurangarira kwedu nhasi, zvinoratidzika kuti basa rouprista raJesu navane 144 000 richava rapedzwa panguva iyoyo. Zvikomborero zveZuva guru Reyananiso zvichava zvashandiswa zvakazara. Uyezve, Jesu acha‘pa umambo kuna Mwari wake naBaba.’ (1 VaKorinte 15:24) Pachava nemuedzo wokupedzisira nokuda kworudzi rwomunhu, uye ipapo Satani namadhimoni ake vachaparadzwa nokusingaperi.—Zvakazarurwa 20:7, 10.

17. Nemhaka yomufaro wakatimirira, mumwe nomumwe wedu anofanira kutsunga kuitei?

¹⁷ “Sungano isingaperi” ichaita basai, kana pane ripi neripi, munhambo inofadza ichavamba panguva iyoyo? Izvozvo hazvisi zvokuti isu titaure. Zvakatoziviswa naJehovha kusvika panguva ino zvakwana. Zvinotisiya tichishamisika. Chimbofunga—upenyu husingaperi sorutivi rwe“denga idzva nenyika itsva”! (2 Petro 3:13) Ngapasava nechinhu chinonetesa chishuvo chedu chokugara nhaka chipikirwa ichocho. Kumira takasimba kungasava nyore. Pauro akati: “Munofanira kuva nokutsungirira, kuti, kana maita kuda kwaMwari, mugopiwa chipikirwa.” (VaHebheru 10:36) Yeuka, kunyange zvakadaro, kuti chinetso chipi nechipi chinofanira kukurirwa, chishoro chipi nechipi chinofanira kukundwa, chinova chisingakoshi kana tichienzanisa nomufaro wakatimirira. (2 VaKorinte 4:17) Nokudaro, ngapasava nomumwe wedu anova wo“kudzokera shure, kuti [a]paradzwe.” Panzvimbo pezvo, ngatizvibvumikisei kuva “vokutenda kuti tiponeswe mweya.” (VaHebheru 10:39) Tose ngativei nechivimbo chakazara muna Jehovha, Mwari wesungano, kuchikomborero chisingaperi chomumwe nomumwe wedu.

[Mashoko Omuzasi]

Wanzwisisa Here?

◻ Kunze kwavaKristu vakazodzwa, ndivanaani vari kukomborerwa kupfurikidza neMbeu yaAbrahama?

◻ Mukukomborerwa kupfurikidza nesungano itsva, mamwe makwai akafanana sei navapuroserite vaiva pasi pesungano yekare?

◻ Mamwe makwai anokomborerwa sei kupfurikidza negadziriro yeZuva guru Reyananiso?

◻ Nei Pauro akadana sungano itsva kuti “sungano isingaperi”?

[Bhokisi riri papeji 21]

BASA RINOYERA MUTEMBERE

Boka guru rinonamata navaKristu vakazodzwa muvazhe yapasi yetembere huru yaJehovha yomudzimu. (Zvakazarurwa 7:14, 15; 11:2) Hapana chikonzero chokugumisa kuti vari muVazhe yakasiyana yeMamwe Marudzi. Apo Jesu akanga ari pasi pano, pakanga pane Vazhe yeMamwe Marudzi mutembere. Zvisinei, murongedzero dzakafuridzirwa naMwari dzetembere dzaSoromoni naEzekieri, pakanga pasina gadziriro dzeVazhe yeMamwe Marudzi. Mutembere yaSoromoni, makanga mune vazhe yapanze umo vaIsraeri navapuroserite, varume navakadzi, vainamata pamwe chete. Uyu muitiro wouporofita wevazhe yapasi yetembere yomudzimu, umo Johane akaona boka guru richiita basa rinoyera.

Zvisinei, vaprista navaRevhi bedzi vaigona kupinda muvazhe yomukati, makanga mune artari huru; vaprista bedzi ndivo vaigona kupinda Munzvimbo Tsvene; uye muprista mukuru bedzi ndiye aigona kupinda Munzvimbo Tsvene tsvene. Vazhe yomukati neNzvimbo Tsvene zvinonzwisiswa kuva zvinofananidzira mamiriro ezvinhu akasiyana omudzimu avaKristu vakazodzwa pasi pano. Uye Nzvimbo Tsvene tsvene inofananidzira denga pacharo, uko vaKristu vakazodzwa vanogamuchira kusafa pamwe chete noMuprista wavo Mukuru wokudenga.—VaHebheru 10:19, 20.

[Mufananidzo uri papeji 23]

Nemhaka yomufaro wakatimirira, ngativei “vokutenda kuti tiponeswe mweya”