Umambo hwaMwari Chii?

PAKUTANGA vanhu vakawirwa nenjodzi yaityisa chaizvo munhoroondo yavo! Imwe ngirozi yakapandukira chiremera choMunhu chaiye akanga aisika. Mupanduki uyu akanyengedza mukadzi wokutanga, Evha, kuti adye muchero wakanga warambidzwa. Ichitaura nezvake uye murume wake, Adhamu, ngirozi yacho yakati: “Chokwadi hamungafi. Nokuti Mwari anoziva kuti zuva ramuchaudya, maziso enyu achasvinudzwa uye muchava vakafanana naMwari, muchiziva zvakanaka nezvakaipa.” (Genesisi 2:16, 17; 3:1-5) Ngirozi yacho yakapanduka yakazonzi Dhiyabhorosi uye Satani.—Zvakazarurwa 12:9.

Evha akateerera mashoko aSatani here? Bhaibheri rinotiudza kuti: “Mukadzi akaona kuti muti wacho wakanga wakanakira kudya uye kuti wakanga uri chimwe chinhu chinoyevedza, chokwadi, muti wacho waifadza kutarira. Naizvozvo akatanga kutora michero yawo achidya. Akazopawo murume wake paakanga ava naye, akatanga kuudya.” (Genesisi 3:6) Chokwadi, vanhu vaviri vokutanga, Adhamu naEvha, vakabatana naSatani pakupandukira kwake. Zvakaguma zvaitika ndezvokuti havana kuzova muParadhiso ivo nevazukuru vavo. Vana vaifanira kuberekwa vakakwana vaine tarisiro yokurarama nokusingaperi vaizogara nhaka chivi norufu.—VaRoma 5:12.

Jehovha Mwari, Changamire noMutongi wezvinhu zvose akaita sei nazvo? Akaita urongwa hwokuti zvivi zvikanganwirwe. (VaRoma 5:8) Jehovha Mwari akaitawo kuti pave nourongwa hwehurumende inogadzirisa njodzi iyi. Urongwa uhwu hunonzi “umambo hwaMwari.” (Ruka 21:31) Zvahwakaitwa kuti huve urongwa hwokutsigira kutonga kwaMwari kwaanoita zvinhu zvose, Umambo uhwu hune chinangwa chaicho.

Chinangwa choUmambo hwaMwari ndechei? Hwakamboita sei chaizvo, uye zvahuri zvingaenzaniswa sei nokutonga kwevanhu? Umambo uhwu hwaizotanga kutonga rini? Mibvunzo iyi ichakurukurwa munyaya inotevera.