Kupedza Kudzidza Kwekirasi Yegiriyedhi Yechi126

Zvaungaita Kuti Ubudirire Somumishinari

BOKA raifara zvikuru rakaungana paWatchtower Educational Center kuPatterson, New York, nokuda kwechiitiko chinokosha. Musi woMugovera, March 14, 2009, ndiwo waiva zuva rakapedza kudzidza kirasi yechi126 paChikoro cheBhaibheri cheWatchtower cheGiriyedhi. Vakapedza kudzidza vacho vakanga vava kuda kutumirwa kunyika 22 kuti vanoparidza mashoko oUmambo hwaMwari.—Mateu 24:14.

Vadzidzi vacho vakanga vapedza kudzidza kosi yemwedzi mishanu yokudzidza Bhaibheri zvakadzama yakanga yakagadzirirwa kuvabatsira kuti vabudirire semamishinari echiKristu. Zuva rokupedza kudzidza rakavapa mukana wokupedzisira sekirasi kuti vateerere mazano ouchenjeri okuti vangabudirira sei mubasa ravo.

Chikoro cheGiriyedhi chakatanga kudzidzisa mamishinari muna 1943, akadaro Anthony Morris, ari mumwe weDare Rinodzora reZvapupu zvaJehovha, aiva sachigaro wepurogiramu yacho. Kubvira ipapo, vakapedza kudzidza ndivo vakaita zvakawanda mubasa rokuparidza riri kuitwa munyika yose.

Kunyange zvazvo vanyori nevaFarisi vaitarisira pasi vaapostora vaJesu vachiti vaiva “vanhuwo zvavo, vasina kudzidza,” akadaro mukurukuri wacho, vashori ivavo vaifanira kuziva kuti vaapostora vacho vaigona kunyatsotaura nokuti vaiva naJesu. (Mabasa 4:13, Bhaibheri muNdimi yeUnion Shona) Dzidzo inowana vadzidzi ava inoita kuti vakwanise kuparidzira nechivimbo.

“Usayera Munhu Nechitarisiko Chake” ndeimwewo hurukuro yakakurukurwa naRobert Ciranko, anobatsira Komiti Yokunyora yeDare Rinodzora. Akati nenguva isipi vadzidzi vaizosangana nevanhu vanobva mutsika dzakasiyana-siyana. Kunyange zvakadaro, kuvaparidzira kwaisazova dambudziko kana vadzidzi vakava nemafungiro aJehovha. Mashoko epakutanga akashandiswa pana Mabasa 10:34 chaizvoizvo anopa pfungwa yokuti “Mwari haayeri munhu nechitarisiko chake.” “Mwari haasaruri.” (Mabasa 10:34) “Nokuva nemafungiro aMwari uye kuona munhu wose wekwamuchange muchishandira somunhu anodiwa naMwari, chokwadi muchabudirira semamishinari,” vakadaro Hama Ciranko.

“Mune Zvose Zvamunoda Kuti Mubudirire”

“Vamwe vanofunga kuti ngamera yakanyangara,” vakatanga vachidaro Hama Samuel Herd, vari mumwe weDare Rinodzora, “asi zvairi zvinonyatsokodzera kuti irarame murenje.” Saizvozvowo mamishinari matsva ane zvose zvaanoda kuti abudirire mundima yaachanoshanda. Achabatsirwa nezvinhu zvishanu.

1. Nokuda Jehovha. (Mateu 22:37, 38) Vadzidzi vakatoratidza kuti vanoda kushumira Jehovha.

2. Nokuchengetedza zivo yeShoko raMwari. Ngamera inochengetedza zvokudya zvayo panyundwa yayo. Asi hairegi kudya nokungovimba nenyundwa iyoyo. Saizvozvowo, mamishinari haafaniri kungovimba nemashoko aakadzidza muchikoro cheGiriyedhi chete, asiwo anofanira kudya zvokudya zvine chokuita nokunamata.

3. Nokuda vanhu. (Mateu 22:39) Vadzidzi vanonzwira tsitsi vanhu.

4. Nepfungwa inoda. (Pisarema 110:3) Mumishinari paanopera simba, Jehovha ndiye anomuwedzera simba.—Isaya 40:29.

5. Nesimba rouduku. Sezvinongoitawo ngamera inotakura munhu paanenge achipfuura nomurenje, mumishinari angafanira ‘kutakurawo’ mumwe wake wechiKristu anenge aomerwa nekunamata. Izvozvo zvinoda simba rakawanda, asi mamishinari ane simba rouduku.

Zvimwewo Zvakakurukurwa Papurogiramu Yacho

Mumwe murayiridzi weGiriyedhi anonzi Michael Burnett akataura kuti maarumondi aivawo pakati pezvimwe zvibereko zvakanaka izvo Jakobho akatumira sechipo kuna mambo weIjipiti. (Genesisi 43:11) Sumbu dukuduku remaarumondi rinogona kuvaka muviri kwazvo. Vadzidzi vakadya maarumondi akawanda okufananidzira pavaiita kosi yavo. Pane zvavakadzidza vanofanira kuyeuka kuti zvinokosha kugutsikana nezvatinopiwa naJehovha uye kudzidza kuda mamiriro ezvinhu avo matsva.

Mark Noumair, ariwo murayiridzi weGiriyedhi, akatsanangura kuti Shoko raMwari rakafanana ne“homwe izere nouchenjeri.” (Jobho 28:18) Tinofanira kuvhura homwe iyi toshandisa zviri mukati. Kana basa roumishinari rikasaita sezvanga zvichitarisira vadzidzi, vangafunga nezvomuapostora Pauro. Vadzidzi vaJesu vakamutumira kuguta rokumusha kwake kwemakore mapfumbamwe. Pane kuti afunge kuti zvaaiva “mudziyo wakasarudzwa” aifanira kushanda kune imwe nzvimbo, Pauro akashanda nesimba kwose kwaaiva. (Mabasa 9:15, 28-30) Zvingatiomera kuremekedza zvinenge zvasarudzwa naJehovha. Mumwewo akaita saizvozvo aiva Jonatani. Zvaaiziva kuti Dhavhidhi ndiye akanga asarudzwa naJehovha kuti ave mambo, Jonatani aigutsikana zvokuti akamutsigira.

Muhurukuro yaiti, “Vashumiri vaMwari Vanotaura Noushingi,” vadzidzi vakadzokorora semaitikiro azvakaita pavaiita basa rokuparidzira munguva yekosi yavo. Vakawanda vavo vakatanga kudzidza Bhaibheri nevanhu. Muhurukuro yakatevera yaiva nomusoro waiti, “Kugadzirirwa Nesangano raJehovha,” mamishinari matatu ava nenguva refu achiita basa iri akabvunzurudzwa. Mumwe nomumwe wavo akatsanangura kuti akadzidziswa sei kushandira pamwe chete nesangano raMwari.

“Iva Mumishinari Anofara”

Gerrit Lösch, mumwewo ari muDare Rinodzora, akazopa hurukuro yavose papurogiramu yacho yaiti, “Iva Mumishinari Anofara.” Akati zvinhu zvakawanda zvinonzi “zvinofadza” hazvipi mufaro chaiwo. (Zvirevo 14:13; Muparidzi 2:10, 11) Mufaro unogara narini unobva pakuita kuda kwaMwari, kunyange zvazvo zvisiri nyore nguva dzose. Kosi yeGiriyedhi yaida kushanda nesimba asi yakaunza kugutsikana zvikuru.

Pane zvinhu zvakawanda zvinoita kuti vaKristu vechokwadi vafare. Vanonamata Mwari anofara. (Pisarema 33:12; 1 Timoti 1:11) Mune zvokunamata vanotova muparadhiso, uye Bhaibheri rinovimbisa kuti nokukurumidza nyika ino ichava paradhiso. Vakawana kuti chinangwa choupenyu ndechokushumira Jehovha uye kumurumbidza. Uyezve, vanodiwa naJehovha naJesu.

“Uchava mumishinari anofara,” akadaro mukurukuri wacho, “kana ukadzidza kugutsikana.” Kuda vamwe uye kudiwawo navo kunoita kuti mufare. Saka pane kutarisisa zvikanganiso zvevamwe musazvitarisa. Itirai vamwe zvakanaka, batsirai vasina simba, vaudzeiwo zvinhu zvakanaka zvinenge zvichiitika. (Pisarema 41:1, 2; Mabasa 20:35) Mufaro unowanika nokupedzera nguva yakawanda mubasa rokuparidza.—Ruka 11:28.

“Rambai muri mamishinari anofara,” vakagumisa vachidaro Hama Lösch, “muchimbosharanganyawo zvine mwero asi muchinyanya kupedzera nguva pakurumbidza Mwari anofara, Jehovha, uye kuita kuti vamwe vakawanda vafarewo.”

Apedza kuverenga kwaziso dzakabva kunyika dzinoverengeka, Anthony Morris akatambidza vadzidzi vacho madhipuroma avo. Zvadaro, mumiririri wekirasi yechi126 yacho akaverenga tsamba yaive yakanyorerwa kuDare Rinodzora. Tsamba yacho yakaratidza kuonga kwevadzidzi kuti vakanga vapinda Chikoro cheGiriyedhi.

Achigumisa, sachigaro akataura kuti “mapfundo nemarunda” zvinobatanidza muviri zvinofananidzira nzira nourongwa huri kushandiswa no“muranda akatendeka, akangwara” kupa vanhu vaJehovha zvokudya uye mirayiridzo. (VaKorose 2:18, 19; Mateu 24:45) Kana vakapedza kudzidza paGiriyedhi vakanyatsoshandira pamwe chete nevamiririri vakagadzwa vaMwari, vachabudirira kuita ushumiri hwavo zvizere.—2 Timoti 4:5.

[Bhokisi riri papeji 30]

MAMIRIRO AKANGA AKAITA KIRASI YACHO

Nyika dzavakabva: 6

Nyika dzavakatumirwa kwadziri: 22

Vadzidzi vose: 56

Nhamba yevakaroorana: 28

Avhareji yezera: 32,8

Avhareji yemakore muchokwadi: 17,9

Avhareji yemakore mubasa renguva yakazara: 13,5

NYIKA DZAVAKATUMIRWA KWADZIRI

Vakapedza kudzidza vakatumirwa kuBenin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, South Africa, Togo neUganda.

[Mufananidzo uri papeji 31]

Kirasi yechi126 Yevakapedza Kudzidza paChikoro cheBhaibheri cheWatchtower cheGiriyedhi

Mitsetse inoverengwa kubva mberi zvichidzokera shure, uye mazita akarongwa kubva kuruboshwe zvichienda kurudyi mumutsetse woga woga.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.