Vatariri Vanopa Nhungamiro—Muitisi weFundo yeNharireyomurindi
1 Nharireyomurindi Yokuzivisa Umambo hwaJehovha ndicho chinhu chikuru cho“muranda akatendeka, akangwara” chokuparadzira nacho zvokudya zvomudzimu kwatiri “nenguva yakafanira.” (Mat. 24:45) Mukuru anoitisa Fundo yeNharireyomurindi ane basa rinokosha somudzidzisi anokwanisa anopa muenzaniso wakanaka wokurarama kwechiKristu.—VaR. 12:7; Jak. 3:1.
2 Kuti adzidzise zvinobudirira, muitisi weFundo yeNharireyomurindi anofanira kuedza nepose paangagona napo kugadzirira vhiki roga roga. Anonyatsoita kudaro nokunyengetera. Kufarira kwake kukuru ungano kunooneka mukuedza kwake kwechokwadi kusvika pamwoyo yedu nemashoko ari kudzidzwa. Anosimbisa pfungwa huru yechidzidzo chacho ndokutibatsira kuona kuti inobatana sei nemusoro mukuru wenyaya.
3 Kunyatsogadzirira kwaanoita kunobatanidza kufanorava magwaro arimo kuitira kuti azive mashandire aanoita. Anoramba achitungamidza Shoko raMwari mberi nokukurudzira ungano kushandisa Bhaibheri zvakanaka pakufunda kwacho. Kana pfungwa inokosha ikasataurwa mutsinhiro dzinopiwa neungano kana kuti kushanda kwerugwaro runotungamirira kukasabudiswa pachena, anobvunza mubvunzo wakajeka wokuwedzera kuti mashoko acho abude. Nomutoo uyu, anotibatsira kusvika pamhedziso dzakarurama uye kuziva mashandisirwe ezvatinodzidza muupenyu hwedu.
4 Muitisi weFundo yeNharireyomurindi anoramba achiedza kuvandudza mano ake okudzidzisa. Haatsinhiri zvakanyanyisa asi anotikurudzira kuti titsinhire—nemashoko edu, nokupfupikisa, uye zvakananga. Panguva nenguva angatiyeuchidza kuti anotanga kutsinhira pandima anofanira kupa mhinduro pfupi, yakananga yemubvunzo wakadhindwa. Tsinhiro dzokuwedzera dzinobva kuvateereri dzingataura mashandire anoita magwaro, kutsigira pfungwa, kana kuti kushandiswa kungaitwa mashoko acho. Kupfurikidza nokukurudzira kugadzirira semunhu oga uye semhuri, muitisi weFundo yeNharireyomurindi anovavarira kuita kuti munhu wose anzwe shungu dzokuda kupindura.
5 Sevanhu vano“dzidziswa naJehovha,” tinoonga “zvipo [zviri] varume,” zvakadai sevaitisi veFundo yeNharireyomurindi, avo “vanoshanda nesimba . . . pakudzidzisa.”—Isa. 54:13; VaEf. 4:8, 11, NW; 1 Tim. 5:17, NW.