Unonyatsodya Mumudzimu Here?
1 Pane chirevo chechiRungu chinoti ‘utano hwedu hunoenderana nezvatinodya.’ Chokwadi, simba redu romuviri uye utano hwedu zvine chokuita nemadyiro edu. Sezvo Jesu akati: “Munhu anofanira kurarama, kwete nechingwa choga, asi nokutaura kwose kunobuda mumuromo maJehovha,” madyiro atinoita zvokudya zvomudzimu anogonawo kutiita vanhu vari nani kana kuti vakaipisisa. (Mat. 4:4) Naizvozvo, unonyatsodya zvakadini mumudzimu? Unosarudza-sarudza zvaunodya here? Unodya uchingomhanya-mhanya here? Kana kuti unofarira kuzvipa nguva yokudya zvokudya zvenguva dzose, zvakanaka, uye zvinovaka mumudzimu here?
2 Ongorora Madyiro Ako: Jehovha anogovera “zvokudya . . . panguva yakafanira” uye “mutambo wezvakakora,” achishandisa “muranda akatendeka, akangwara.” (Mat. 24:45; Isa. 25:6) Kuti tibatsirwe zvizere nezvinhu zvaanogovera izvi nenzira yorudo, tinofanira kushingaira kunyatsodya mumudzimu.
3 Ungazvibvunza kuti: ‘Ndinoverenga rugwaro rwezuva netsanangudzo dzarwo zuva rimwe nerimwe here? Zuva nezuva ndinoverenga Bhaibheri ndokufungisisa zvandinoverenga here? Ndinogadzirira misangano yeungano nokufanodzidza zvichakurukurwa here? Ndakaverenga mabhuku edu achangobuda, kusanganisira mabhuku aUprofita hwaIsaya—Chiedza Chavanhu Vose ose ari maviri here?’
4 Jesu akapikira kuti: “Vanofara avo vanoziva zvinodiwa zvavo zvomudzimu . . . Vanofara avo vane nzara nenyota yekururama, sezvo vachagutiswa.” (Mat. 5:3, 6) Saka nyatsodya mumudzimu kuburikidza nokuzadza pfungwa dzako uye mwoyo nezivo yaMwari.