Zvatingaita Pakuparidza Nezvingoro Nematafura

Nzira yekuparidza nezvingoro nematafura iri kubudirira chaizvo pakuita kuti vaya vane mwoyo yakatendeseka vazive chokwadi. (Joh. 6:44) Saka vakuru vakakurudzirwa kuronga kuti ungano iparidze munzvimbo dzinopfuura nevakawanda mundima yenyu. Sezvo zvingoro zvisingagari panzvimbo imwe chete, kazhinji hazvidi hazvo kuti tikumbire mvumo kune vakuru vakuru vemunzvimbo yacho. Ndivanaani vanokodzera kuita basa iri? Vaparidzi vanokwanisa kuongorora mamiriro ezvinhu akakodzera kuparidza, vanopfeka zvine mutsigo, uye vane unyanzvi hwekukurukura nevanhu. Kuti tibudirire, pane zvatinofanira kuita nezvatisingafaniri kuita.

Zvatingaita:

Iva noushamwari, ratidza kuti unoda kutaura nevanhu, uye batsira vanenge vachipfuura. Vamwe vaparidzi vanonyemwerera vasingaiti zvechipameso, vokwazisa vanhu zvine ushamwari. Kana munhu akatarisa mabhuku edu paanenge achipfuura, ungati, “Torai henyu kana muchida.”
Mira pakakodzera. Mune dzimwe nzvimbo vamwe vaparidzi vanoona zvichibatsira kumira pedyo nengoro yavo. Vamwewo vanomira nechekure zvishoma kusvikira munhu auya pangoro yacho nekuti vanoona sokuti kumira pedyo kunoita kuti vanhu vazeze kuuya. Kana munhu angouya pane mabhuku acho, edza kutanga kukurukura naye. Ungamubvunza kuti, “Makambofungawo nezvemubvunzo iwoyo here?”
Shandisa Bhaibheri pese pazvinoita.
Tsanangura urongwa hwekudzidza Bhaibheri kune munhu anenge atora chimwe chezvinyorwa zvatinoshandisa pakudzidza nevanhu, zvakadai sebhuku raBhaibheri Rinombodzidzisei? Mukumbire kuti umuratidze vhidhiyo yaNei Uchifanira Kudzidza Bhaibheri? pafoni kana mumwe mudziyo wemagetsi.
Kana zvichiita kumbira munhu anenge afarira mashoko okuti ungamuwana sei. Kana munhu wacho asingagari mundima yenyu, zadza fomu rinonzi Tapota Onai Munhu Uyu (S-43), woripa munyori nokukurumidza.