Unogona Kuita Kuti Mhuri Yenyu Ifare

Jehovha anoda kuti mhuri dzifare. (Pis 127:3-5; Mup 9:9; 11:9) Asi mufaro iwoyo unogona kupera nemhaka yenhamo dzeupenyu uyewo kukanganisa kunoitwa nevamwe vari mumhuri. Munhu mumwe nemumwe ari mumhuri angaitei kuti mhuri iwedzere kufara?

Murume anobata mudzimai wake nerukudzo. (1Pe 3:7) Anowana nguva yekuva naye. Haatarisiri kuti aite zvaasingakwanisi uye anoratidza kuti anokoshesa zvaanoitirwa nemudzimai wake. Anomutendawo nezvaanoitira mhuri yavo. (VaK 3:15) Anomuratidza rudo uye anomurumbidza.—Zvi 31:28, 31.

Mudzimai anotsvaga nzira dzekutsigira murume wake. (Zvi 31:12) Anozviisa pasi pake uye anoshanda pamwe naye. (VaK 3:18) Anotaura zvakanaka naye uye nezvake.—Zvi 31:26.

Vabereki vanowana nguva yekuva nevana vavo. (Dhe 6:6, 7) Vanoudza vana vavo kuti vanovada. (Mt 3:17) Pavanovarayira kana kuvatsiura, vanozviita nerudo uye vachiratidza kuti vanovanzwisisa.—VaE 6:4.

Vana vanokudza uye vanoteerera vabereki vavo. (Zvi 23:22) Vanoudza vabereki vavo zvavari kufunga uye manzwiro avanenge vachiita. Vanobvuma kurayirwa uye kutsiurwa nevabereki vavo uye vanovaremekedza.—Zvi 19:20.

ONA VHIDHIYO INONZI FARAI MUMHURI YENYU, WOZOPINDURA MUBVUNZO UNOTEVERA:

Zvii zvakaitwa nemunhu mumwe nemumwe wemumhuri iyi kuti mhuri yavo ifare?