Zita raJehovha—Kukosha Kwarinoita Kuna Jesu

1-2. (a) Jesu akaitei usiku hwekupedzisira asati aurayiwa? (b) Mibvunzo ipi yatichakurukura munyaya ino?

WAIVA musi weChina, Nisani 14, 33 C.E., uye Jesu akanga ava pedyo kutengeswa, kutongwa, kunzi ane mhosva, kurohwa zvakaipisisa uye kuurayiwa. Akanga achangobva kupedza Kudya kwaShe Kwemanheru nevaapostora vake vakatendeka mune imwe imba yepamusoro. Pashure pekunge vapedza kudya, Jesu akaudza vaapostora vake mashoko ekuvakurudzira. Pavakanga vava kuda kubuda muimba iyoyo yepamusoro, Jesu akapa munyengetero unokosha chaizvo. Muapostora Johani akanyora munyengetero iwoyo uye tinouwana muna Johani chitsauko 17.

² Munyaya ino tichaona kuti zvii zvatinodzidza kubva pamunyengetero iwoyo waJesu. Zvii zvaainyanya kunetseka nazvo nguva pfupi asati afa? Munyengetero iwoyo unoratidza sei kuti zvii zvaainyanya kukoshesa paaiita ushumiri hwake pano panyika? Ngatikurukurei mhinduro dzemibvunzo iyi.

“NDAKAVAZIVISA ZITA RENYU”

3. Jesu akatii nezvezita raJehovha uye airevei? (Johani 17:​6, 26)

³ Mumunyengetero wake, Jesu akati: “Ndakavazivisa zita renyu.” Akatotaura kaviri kese kuti akanga azivisa zita raJehovha kuvadzidzi vake. (Verenga Johani 17:​6, 26.) Jesu airevei? Akanga avaudza zita ravakanga vasingazive here? Vadzidzi vaJesu vaitova vaJudha saka vakanga vagara vachiziva zita raMwari rekuti Jehovha. Zita iroro raiwanika kane zviuru muMagwaro echiHebheru. Saka Jesu akanga asiri kutaura nezvezita chairo raMwari, asi aireva zvaimiririrwa nezita racho. Jesu akabatsira vadzidzi vake kuziva zvakawanda nezvaJehovha, izvo zvinosanganisira chinangwa chaakasikira nyika nevanhu, mabasa aakaita uye aachaita, uye kuti ndiMwari akaita sei. Jesu chete ndiye ainyatsokwanisa kuita izvozvo nekuti anonyatsoziva Jehovha.

4-5. (a) Taura muenzaniso unoratidza zvinorehwa nekuziva zita remumwe munhu. (b) Vadzidzi vaJesu vakasvika sei pakuziva zita raJehovha?

⁴ Ngatitii muungano menyu mune mumwe mukuru anonzi David uyewo ndichiremba. Wava nemakore akawanda uchimuziva. Asi rimwe zuva unobva warwara zvakaipisisa wobva wamhanyiswa kuchipatara kwaanoshanda. David anoshandisa ruzivo rwake rwezvekurapa kukuponesa. Iye zvino wava kunyanya kumuda kupfuura zvawaiita kare. Uye paunonzwa zita rake, unofunga zvaakakuitira. David haasisingori mukuru waunoziva asi wava kumuzivawo sachiremba akakuponesa.

⁵ Saizvozvowo, vadzidzi vaJesu vakanga vagara vachitoziva zita raJehovha. Asi vakawedzera kukoshesa zita iroro pavaiona Jesu achiita ushumiri hwake. Nei tichidaro? Nekuti Jesu ainyatsoratidza zvakaita Baba vake pazvese zvaaitaura uye zvaaiita. Saka vaapostora vake vakasvika ‘pakuziva’ Jehovha pavaiona madzidzisiro aiita Jesu uye mabatiro aaiita vanhu.—Joh. 14:9; 17:3.

“ZITA RENYU, IRO RAMAKANDIPA”

6. Zvinorevei kuti Jehovha akapa Jesu zita rake? (Johani 17:​11, 12)

⁶ Jesu akanyengeterera vadzidzi vake achiti: “Vachengetedzei nekuda kwezita renyu, iro ramakandipa.” (Verenga Johani 17:​11, 12.) Izvi zvinoreva here kuti Jesu aizozivikanwa nezita rekuti Jehovha? Aiwa. Cherechedza kuti mumunyengetero wake, Jesu anotaura nezvezita rekuti Jehovha achiti “zita renyu.” Izvi zvinoratidza kuti Jesu haana kubva apiwa zita rekuti Jehovha. Saka Jesu airevei paakati akanga apiwa zita raMwari? Chekutanga, Jesu aitaura achimiririra Jehovha. Akauya muzita raBaba vake uye akaita zvishamiso muzita iroro. (Joh. 5:43; 10:25) Uyewo, zita rekuti Jesu rinoreva kuti “Jehovha Ruponeso.” Saka zita raMwari rakabatana chaizvo nezita raJesu.

7. Taura muenzaniso unoratidza kuti nei Jesu aigona kutaura muzita raJehovha.

⁷ Semuenzaniso, munhu anomiririra mumwe purezidhendi mune imwe nyika anogona kutaura achimiririra purezidhendi wacho. Saka mashoko emumiririri iyeye anenge aine simba rakangofanana nerapurezidhendi wacho. Saizvozvowo, Jesu aimiririra Jehovha uye aitaura nevanhu muzita raBaba vake.—Mat. 21:9; Ruka 13:35.

8. Jesu asati auya panyika, zita raJehovha raiva paari pakuti kudii? (Eksodho 23:​20, 21)

⁸ Paaiita basa rake seShoko, Jesu aimiririra Jehovha achiudza ngirozi nevanhu zvavaifanira kuziva uye zvavaifanira kuita. (Joh. 1:​1-3) Jesu anofanira kunge ari iye ngirozi yakatungamirira vaIsraeri pavaiva murenje. Paakaudza vaIsraeri kuti vateerere ngirozi iyoyo, Jehovha akati: “Nekuti zita rangu riri pairi.”a (Verenga Eksodho 23:​20, 21.) Zita raJehovha raiva pana Jesu pakuti anomiririra Jehovha uye ndiye ari pamberi pakutsigira uye kutsvenesa zita raBaba vake.

“BABA, KUDZAI ZITA RENYU”

9. Jesu aikoshesa zita raJehovha zvakadii, uye nei tichidaro?

⁹ Sezvatichangobva kukurukura, kunyange asati auya panyika Jesu aikoshesa chaizvo zita raJehovha. Paakanga ava panyika, Jesu akaratidza nezvese zvaaiita kuti aikoshesa chaizvo zita raJehovha. Paakanga ava kupedza ushumiri hwake, Jesu akashevedzera kuti: “Baba, kudzai zita renyu.” Achingobva kutaura kudaro, Baba vake vakapindura nenzwi guru vari kudenga vachiti: “Ndakarikudza uye ndicharikudzazve.”—Joh. 12:28.

10-11. (a) Jesu akakudza sei zita raJehovha? (Onawo mufananidzo.) (b) Nei zita raJehovha richifanira kutsveneswa uye kurevererwa?

¹⁰ Jesu akakudzawo zita raBaba vake. Akazviita sei? Imwe nzira yaakaita nayo izvi ndeyekuudza vamwe nezvekunaka kwaBaba vake uye zvinhu zvinoshamisa zvavanoita. Asi haana kugumira ipapo. Zita raJehovha raifanirawo kutsveneswa uye kurevererwa.b Jesu akaratidza kuti izvi zvaikosha chaizvo paakadzidzisa vateveri vake kunyengetera. Akati: “Baba vedu vari kudenga, zita renyu ngaritsveneswe.”—Mat. 6:9.

¹¹ Nei zita raJehovha richifanira kutsveneswa uye kurevererwa? Nekuti Satani Dhiyabhorosi akasvibisa zita raJehovha Mwari mumunda weEdheni. Satani akataura kuti Jehovha murevi wenhema uye kuti akanga asingadi kuti Adhamu naEvha vawane zvinhu zvakanaka. (Gen. 3:​1-5) Paakataura izvozvo, Satani aitoreva kuti maitiro anoita Jehovha zvinhu haana kunaka. Zvinhu izvozvo zvakataurwa naSatani zvaigona kuita kuti vamwe vafunge kuti Jehovha ndiMwari akaipa. Pava paya mumazuva aJobho, Satani akataura kuti vanhu vanongoshumira Jehovha nemhaka yezvavanenge vachida kupiwa naye. Murevi iyeye wenhema akataura kuti hapana munhu anoda Jehovha zvekuti angaramba achimushumira kana akasangana nematambudziko. (Job. 1:​9-11; 2:4) Paitoda nguva kuti zvibude pachena kuti murevi wenhema ndiani, Jehovha here kana kuti Satani.

“NDINOPA UPENYU HWANGU”

12. Jesu akanga akazvipira kuitei nemhaka yekuda kwaaiita zita raJehovha?

¹² Jesu aida Jehovha zvekuti aida kuita zvese zvaaigona kuti atsvenese uye areverere zita raJehovha. Jesu akati: “Ndinopa upenyu hwangu.” (Joh. 10:​17, 18) Akanga akazvipira kunyange kutofira zita raJehovha.c Vanhu vaviri vekutanga vakanga vasina chivi, Adhamu naEvha, vakasiya Jehovha vachibva vatsigirana naSatani. Asi Jesu akazvipira kuuya panyika kuti aratidze kuda kwaaiita Jehovha. Akaratidza kuti aida Jehovha nekunyatsomuteerera pazvese zvaaiita uye zvaaitaura. (VaH. 4:15; 5:​7-10) Akaramba akaperera kuna Jehovha kweupenyu hwake hwese kusvikira paakazofa padanda rekutambudzirwa. (VaH. 12:2) Paakaita izvi, akaratidza kuti aida Jehovha uye zita rake.

13. Pavanhu vese, nei Jesu ari iye ainyatsogona kuratidza kuti Satani murevi wenhema? (Onawo mufananidzo.)

¹³ Mararamiro akaita Jesu akaratidza kuti Satani ndiye murevi wenhema, kwete Jehovha! (Joh. 8:44) Jesu ainyatsoziva Jehovha kupfuura chero ani zvake. Kudai paiva nechimwe chete zvacho chechokwadi pane zvakataurwa naSatani, Jesu haaimbotadza kuzviziva. Asi Jesu akaramba akashinga kureverera zita raJehovha kuratidza kuti zvese zvakataurwa naSatani pamusoro paJehovha zvaiva zvenhema. Kunyange pazvaiita sekuti Jehovha amusiya, Jesu akazvipira kuti afe hake pane kusateerera Baba vake vane rudo.—Mat. 27:46.d

“NDAPEDZA BASA RAMAKANDIPA”

14. Jehovha akapa sei Jesu mubayiro nemhaka yekuramba akatendeka kwaakaita?

¹⁴ Mumunyengetero waakapa usiku hwekupedzisira asati afa, Jesu aigona kutaura kuti: “Ndapedza basa ramakandipa kuti ndiite.” Aivimba kuti Jehovha aizomupa mubayiro kana akaramba akatendeka. (Joh. 17:​4, 5) Uye ndizvo chaizvo zvakaitika. Paakafa, Jehovha haana kumusiya ari muguva. (Mab. 2:​23, 24) Akamutsa Jesu akamupa chinzvimbo chepamusoro. (VaF. 2:​8, 9) Pava paya, Jesu akazotanga kutonga saMambo weUmambo hwaMwari. Umambo ihwohwo hwaizoitei? Chikamu chechipiri chezvaakataura paaidzidzisa vateveri vake kunyengetera chinoti: “Umambo hwenyu ngahuuye. Kuda kwenyu [Jehovha] ngakuitwe, panyika, sekudenga.”—Mat. 6:10.

15. Zvii zvimwe zvichaitwa naJesu?

¹⁵ Munguva pfupi iri kuuya, Jesu acharwa nevavengi vaMwari oparadza vakaipa paAmagedhoni. (Zvak. 16:​14, 16; 19:​11-16) Achingopedza kudaro, achakanda Satani “mugomba rakadzikadzika” umo maanenge asingakwanisi kuita kana chinhu. (Zvak. 20:​1-3) Mumakore 1 000 ekutonga kwake, Jesu achaita kuti panyika pave nerugare zvakare uye achaita kuti vanhu vasava nechivi. Achamutsa vakafa. Achaita kuti pasi rese rive paradhiso. Chinangwa chaJehovha chichazadziswa!—Zvak. 21:​1-4.

16. Upenyu huchange hwakaita sei pachazopera Kutonga kwaJesu Kwemakore 1 000?

¹⁶ Upenyu huchange hwaita sei pachazopera Kutonga kwaJesu Kwemakore 1 000? Chivi chichabviswa zvachose. Vanhu vachange vasisafanire kukumbira kuti varegererwe zvivi zvavo pachishandiswa rudzikinuro; vachange vasisadi vapristi kana munhu anovamiririra kuti vakwanise kuva neushamwari naMwari. Uye “muvengi wekupedzisira, rufu [kureva rwuya rwakakonzerwa naAdhamu], achaparadzwa.” Mumakuva muchange musisina chinhu. Vakafa vachange vamutswa. Munhu wese achange ari panyika achange asisina chivi.—1 VaK. 15:​25, 26.

17-18. (a) Chii chichaitika pachapera Kutonga kwaJesu Kwemakore 1 000? (b) Jesu achaitei kana nguva yekutonga kwake yapera? (1 VaKorinde 15:​24, 28) (Onawo mufananidzo.)

¹⁷ Chii chimwe chichaitika pachapera Kutonga kwaJesu Kwemakore 1 000? Panguva iyoyo pachaitika chimwe chinhu chinokosha chaizvo. Nyaya yekutsveneswa kwezita raJehovha ichange yanyatsogadziriswa. Zvichaitika sei? Mumunda weEdheni, Satani akataura kuti Jehovha murevi wenhema uye kuti haatongi zvine rudo. Kubvira panguva iyoyo, zita raJehovha riri kutsveneswa ratsveneswazve nevaya vanomukudza uye vanomuremekedza. Saka pachazopera Kutonga kwaJesu Kwemakore 1 000, zita raJehovha richange rarevererwa zvakakwana. Zvichange zvanyatsova pachena kuti Jehovha ndiBaba vekudenga vane rudo.

¹⁸ Zvichange zvanyatsova pachena kuti zvakataurwa naSatani pamusoro paJehovha ndezvenhema. Jesu achaitei kana nguva yake yekutonga yapera? Achaita here zvakaitwa naSatani, opandukira Jehovha? Aiwa! (Verenga 1 VaKorinde 15:​24, 28.) Jesu achadzorera Umambo kuna Baba vake. Achazviisa pasi pekutonga kwaJehovha. Haasi kuzopanduka sezvakaita Satani asi achazvipira kusiya zvese nekuti anoda Jehovha.

19. Zita raJehovha rinokosha zvakadii kuna Jesu?

¹⁹ Ndosaka Jehovha asina kumbozeza kupa Jesu zita rake. Jesu akanyatsoratidza kuti aiva mumiririri akakwana waBaba vake. Saka zita raJehovha rinokosha zvakadii kuna Jesu? Rinokosha chaizvo kupfuura chero chii zvacho. Akanga akazvipira kufira zita iroro. Uye achazvipira kudzorera zvese kuna Jehovha pachapera Kutonga Kwemakore 1 000. Tingatevedzera sei zvakaitwa naJesu? Tichakurukura mhinduro yemubvunzo iwoyo munyaya inotevera.