MaKristu Ose Echokwadi Anofanira Kuva Vaevhangeri
“Ita basa romuevhangeri [kana kuti, romufundisi].”—2 TIMOTIO 4:5, NW, mashoko omuzasi.
1. Chii chakanga chiri mashoko akanaka ayo akaparidzirwa navaevhangeri vomuzana rokutanga ramakore?
KUNOREVEI nhasi kuva muevhangeri? Uri mumwe here? Shoko rokuti “muevhangeri” rinobva mushoko rechiGiriki rokuti eu·ag·ge·li·stesʹ, iro rinoreva kuti “muparidziri wamashoko akanaka.” Kuvambira pakutangwa kweungano yechiKristu muna 33 N.V., mashoko akanaka echiKristu akasimbisa nzira yaMwari yoruponeso uye akazivisa kuti Jesu Kristu aizodzokera panguva yapashure kuzotanga kutonga kwake kwoUmambo parudzi rwomunhu.—Mateo 25:31, 32; 2 Timotio 4:1; VaHebheru 10:12, 13.
2. (a) Zviri mumashoko akanaka zvakapfumiswa sei muzuva redu? (b) Musengwai uri pamaKristu ose echokwadi nhasi?
2 Kuvambira muna 1914 zvichienda mberi, ufakazi hwakavamba kuwedzera hwokuti chiratidzo icho Jesu akanga apa pamusoro pokudzoka kwake nokuvapo kusingaoneki chakanga chichizadzika. (Mateo 24:3-13, 33) Zvakare, mashoko akanaka aigona kubatanidza kutaura kwokuti “umambo hwaMwari hwava pedyo.” (Ruka 21:7, 31; Marko 1:14, 15, NW) Zvamazvirokwazvo, nguva yakanga yasvika yokuti uporofita hwaJesu hwakanyorwa pana Mateo 24:14, (NW), huve nezadziko huru: “Aya mashoko akanaka oumambo achaparidzirwa mupasi rose rinogarwa nokuda kwouchapupu kumarudzi ose; uye ipapo mugumo uchasvika.” Naizvozvo, kuparidza evhangeri zvino kunobatanidza kuzivisa nokushingaira Umambo hwakagadzwa hwaMwari nezvikomborero zvahuchaunza nokukurumidza kurudzi rwomunhu runoteerera. MaKristu ose anorairwa kuita iri basa no“kuita vadzidzi.”—Mateo 28:19, 20, NW; Zvakazarurwa 22:17.
3. (a) Irevoi yokuwedzera ine shoko rokuti “muevhangeri”? (Ona Insight on the Scriptures, Vhoriyamu 1, peji 770, chikamu 2, ndima 2.) (b) Ikoku kunomutsa mibvunzoi?
3 Mukuwedzera kukuparidzirwawo zvako kwamashoko akanaka, Bhaibheri rinoshandisa shoko rokuti “muevhangeri” mupfungwa chaiyo pamusoro paavo vanosiya ndima yavo yokumusha kundoparidzira mashoko akanaka munzvimbo dzisati dzashandwa. Muzana rokutanga ramakore, makanga muna vaevhangeri vafundisi vazhinji, vakadai saFiripo, Pauro, Bharnabhasi, Sirasi, uye Timotio. (Mabasa 21:8; VaEfeso 4:11) Asi zvakadiniko nezvenguva yedu chaiyo chifo cha 1914? Vanhu vaJehovha nhasi vakazviita vamene vanowanika savaevhangeri vomunzvimbomo pamwe chete navafundisi here?
Fambiro Mberi Chifo Cha 1919
4, 5. Ndedzipi dzaiva kariro dzebasa rokuparidza evhangeri nokukurumidza pashure pa 1914?
4 Apo Hondo yeNyika I yakasvika kumugumo muna 1918, vabatiri vaMwari vakawana chishoro chinowedzera chakabva kuvose vari vaviri vawi pakutenda navafundisi vechiKristudhomu neshamwari dzavo dzezvamatongerwe enyika. Kutaura idi, kuparidza evhangeri kwapachokwadi kwechiKristu kwakadokumira muna June 1918 apo vakuru vakuru vanotungamirira veWatch Tower Society muUnited States vakatongerwa kupinzwa mutorongo kwamakore 20 mupomero dzenhema. Vavengi vaMwari vakanga vabudirira mukugumisa kuparidzirwa kwamashoko akanaka here?
5 Nenzira isingakarirwi, muna March 1919 vakuru vakuru veSosaiti vakasunungurwa uye gare gare vakawanwa vasina mhosva yepomero dzenhema idzo dzakanga dzaparira kuti vapinzwe mutorongo. Norusununguko rwavo ruchangobva kuwanwa, aya maKristu akazodzwa akaziva kuti pakanga pachine basa zhinji raifanira kuitwa asati aunganidzirwa kutuso yawo yokudenga savadyi venhaka pamwe chete muUmambo hwaMwari.—VaRoma 8:17; 2 Timotio 2:12; 4:18.
6. Basa rokuparidza evhangeri rakafambira mberi sei pakati pa 1919 na 1939?
6 Shure muna 1919 kwaiva navasingasviki 4 000 vakashuma kugoverana mukuparadzira mashoko akanaka. Mukati mamakumi maviri amakore akatevera, chiverengero chakati chavarume chakazvipa chimene savaevhangeri vafundisi, uye vamwe vakatumirwa kunyika dzeAfrica, Asia, uye Europe. Pakazosvika 1939, pashure pamakore 20 okuparidzira Umambo, Zvapupu zvaJehovha zvakanga zvawedzera kusvikira kuvanopfuura 73 000. Iyi wedzero yakatanhamara, yakaitwa pasinei hapo nechitambudzo chikuru, yakanga yakafanana nechakaitika mumakore apakuvamba eungano yechiKristu.—Mabasa 6:7; 8:4, 14-17; 11:19-21.
7. Mumakore a 47 N.V. na 1939, mugariroi wakafanana waivapo pamusoro pebasa rechiKristu rokuparidza evhangeri?
7 Kunyanguvezvo, voruzhinji veZvapupu zvaJehovha panguva iyoyo vakanga vakawanda munyika dzePurotesitendi dzinotaura chiNgezi. Kutaura idi, inopfuura 75 muzana yavazivisi voUmambo 73 000 vakanga vachibva kuAustralia, Britain, Canada, New Zealand, uye United States. Sezvakwakanga kwakaita munenge muna 47 N.V., chimwe chinhu chaidikanwa kukurudzira vaevhangeri kupa ngwariro yakawanda zvikuru kunyika dzaishandwa zvishomanene dzapasi.
8. Pakazosvika 1992, chii icho Gilead School yakanga yaita?
8 Ganhuriro dzomunguva yehondo nezvitambudzo zvaisagona kudzivisa mudzimu mutsvene une simba waJehovha kusunda vabatiri vake kugadzirira nokuda kwefutunuko huru zvikuru. Muna 1943, apo Hondo yeNyika II yakanga yaipisisa, sangano raMwari rakatanga Watchtower Bible School of Gilead rine murangariro wokuparadzira mashoko akanaka kwakafara zvikuru. Pakazosvika March 1992, ichi chikoro chakanga chatumira vafundisi 6 517 kunyika 171 dzakasiana-siana. Mukuwedzera, varume vakarovedzwa kutarisira mapazu eWatch Tower Society munyika dzokumwe. Kusvikira muna 1992, pavatsinhanisi veDare reBazu 97, 75 vakanga varovedzwa paGilead.
9. Ipurogiramui dzokurovedza dzakaita rutivi mufambiro mberi yebasa rokuparidza evhangeri nokuita vadzidzi?
9 Kunze kweGilead School, dzimwe purogiramu dzokurovedza dzakashongedzera vanhu vaJehovha kufutunura ndokuvandudza basa ravo rokuparidza evhangeri. Somuenzaniso, Chikoro Choushumiri Choubati Ushe hwaMwari chinoshanda muungano dzeZvapupu zvaJehovha mupasi rose. Iyi gadziriro, pamwe chete noMusangano Webasa wevhiki nevhiki, yakarovedza mamirioni avaparidzi voUmambo kuva vanobudirira muushumiri hwavose. Panewo Chikoro Choushumiri hwoUmambo, icho chinogovera rovedzo inokosha kuvakuru navabatiri vanoshumira kuti ivava vagogona kutarisira zviri nani ungano dziri kukura. Chikoro Chebasa Roupiona chakabetsera vaevhangeri vazhinji venguva yakazara kuva vanobudirira zvikuru mumubato wavo wokuparidzira. Misi ichangobva kupfuura iyi zvikuru, Chikoro Chokurovedza Vashumiri chakashanda munyika dzakasiana-siana kubetsera vakuru navabatiri vanoshumira vasina kuroora kuva vanaTimotio vomuzuva razvino uno.
10. Chii chave chiri muuyo werovedzo yose yakaisvonaka yakagoverwa kupfurikidza nesangano raMwari? (Batanidza mashoko ari mubhokisi.)
10 Chii chave chiri muuyo werovedzo iyi yose? Muna 1991, Zvapupu zvaJehovha zvakanga zvasvika chiverengero chikuru chapamusoro chavazivisi voUmambo vanopfuura mamirioni mana vanoshingaira munyika 212. Zvisinei, kusafanana nomugariro waivapo muna 1939, inopfuura 70 muzana yaivava inobva munyika dzeKaturike, Orthodox, dzisati dziri dzechiKristu, kana kuti dzimwe, uko chiNgezi chisati chiri mutauro mukuru.—Ona bhokisi rinoti “Futunuko Chifo Cha 1939.”
Chikonzero Nei Zvichibudirira
11. Muapostora Pauro akati budiriro yake somushumiri yakaparirwa naani?
11 Zvapupu zvaJehovha hazvitori rumbidzo yeiyi futunuko. Panzvimbo pezvo, zvinorangarira basa razvo munzira iyo muapostora Pauro akaita nayo, sezvaakatsanangura mutsamba yake kuvaKorinte. “Zvino Aporo chinyiko? Pauro chinyiko? Vashumiri vamakatenda navo, mumwe nomumwe sezvaakapiwa naShe. Ini ndakasima. Aporo akadiridza; asi Mwari akameresa. Naizvozvo unosima haazi chinhu, kana unodiridza; asi unomeresa. Nokuti tiri vabati pamwe chete naMwari; muri munda waMwari, muri imba yaMwari.”—1 VaKorinte 3:5-7, 9.
12. (a) Shoko raMwari rinoita rutivii mukuparidza evhangeri kunobudirira kwechiKristu? (b) Ndiani akagadzwa soMusoro weungano yechiKristu, uye ndeipi imwe nzira inokosha yokuratidzira nayo kuzviisa pasi kwedu poumusoro hwake?
12 Hapana panikiro yokuti kukura kunooneka kunowanikwa neZvapupu zvaJehovha kuri nokuda kwechikomborero chaMwari. Ibasa raMwari. Mukuziva iri idi, zvinopfuurira kuzvishandisa zvimene mukufunda Shoko raMwari nguva dzose. Zvinovakira chinhu chiri chose chazvinodzidzisa mubasa razvo rokuparidza evhangeri paBhaibheri. (1 VaKorinte 4:6; 2 Timotio 3:16) Chimwe chinokosha kukuparidza evhangeri kwazvo kunobudirira kuziva kwazvo kwakazara Uyo Mwari akagadza soMusoro weungano, Ishe Jesu Kristu. (VaEfeso 5:23) MaKristu omuzana rokutanga ramakore akaratidza ikoku kupfurikidza nokubatira pamwe naavo Jesu akagadza savaapostora. Ava varume, pamwe chete navamwe vakuru veungano yeJerusarema, vakaumba mutumbi unodzora wechiKristu womuzana rokutanga ramakore. Ari kudenga Ishe Jesu Kristu akashandisa iri boka ramaKristu akakura mumudzimu kugadzikisa nhau ndokupa nhungamiro kubasa rokuparidza evhangeri. Batira pamwe yokushingaira yaPauro neiyi gadziriro youmwari yakaguma newedzero muungano dzaakashanyira. (Mabasa 16:4, 5; VaGaratia 2:9) Nenzira yakafanana nhasi, kupfurikidza nokubatisisa Shoko raMwari nokubatira pamwe nenzira yokushingaira nenhungamiro inobva kuMutumbi Unodzora, vaevhangeri vechiKristu vanovimbiswa budiriro muushumiri hwavo.—Tito 1:9; VaHebheru 13:17.
Kurangarira Vamwe Savakuru
13, 14. (a) Izanoi iro muapostora Pauro akapa serakanyorwa pana VaFiripi 2:1-4? (b) Neiko kuchikosha kuyeuka iri zano patinenge tichigoverana mubasa rokuparidza evhangeri?
13 Muapostora Pauro akaratidza rudo rwapachokwadi nokuda kwavatsvaki vezvokwadi uye haana kuratidzira chimiro chendangariro choukuru kana kuti chourudzi. Nokudaro, aigona kupa zano vatendi biyake roku‘rangarira kuti vamwe vakuru.’—VaFiripi 2:1-4.
14 Nomutoo wakafanana, vaevhangeri vechiKristu vechokwadi nhasi havana chimiro chendangariro chikuru pakubata navanhu vamarudzi akasiana-siana nemigariro yekare. Mumwe weZvapupu zvaJehovha wokuUnited States, akagoverwa kushanda somufundisi muAfrica, anoti: “Ndinongoziva kuti hatisi vakuru. Zvimwe tine mari yakawanda neinonzi dzidzo inogamuchirika, asi ivo [vanhu vomunzvimbomo] vane mavara anopfuura edu.”
15. Avo vanogoverwa kushanda munyika dzokumwe vanogona sei kuratidzira ruremekedzo rwapachokwadi nokuda kwavadzidzi vanokarirwa?
15 Zvamazvirokwazvo, kupfurikidza nokuratidzira ruremekedzo rwapachokwadi nokuda kwaavo tinogoverana navo mashoko akanaka, tichakuita kuti kuve nyore zvikuru kuti vagamuchire shoko reBhaibheri. Kunobetserawo apo muevhangeri mufundisi anoratidza kuti anofara kugara pakati pavanhu vaakagoverwa kubetsera. Mumwe mufundisi anobudirira uyo akapedzera makore okupedzisira 38 muAfrica anotsanangura, kuti: “Ndinonzwa mukati mangu ndimene zvikuru kuti uyu ndiwo musha wangu, uye vari muungano uko ndakagoverwa ihama dzangu nehanzvadzi. Apo ndinodzokera kumusha kuCanada pazororo, handinzwi ndiri kumusha chaizvoizvo. Vhiki rokupedzisira kana kuti kupfuura ndiri muCanada, ndinonzwa ndichida kudzokera. Ndinonzwa nenzira iyoyo nguva dzose. Ndinoudza vadzidzi vangu veBhaibheri nehama nehanzvadzi kuti ndinofara sei kudzokazve, uye vanoonga kuti ndinoda kuva navo.”—1 VaTesaronika 2:8.
16, 17. (a) Idenhoi iyo vafundisi vazhinji navaevhangeri vomunzvimbomo vakagamuchira kuti vagova vanobudirira zvikuru muushumiri hwavo? (b) Ndichinoitikai icho mumwe mufundisi akava nacho nemhaka yokutaura mumutauro womunzvimbomo?
16 Apo vanowana ndima huru yomutauro wokumwe mundima dzavo dzomunzvimbomo, vamwe vakaita nhamburiko yokudzidza mutauro wacho, vachiratidza kupfurikidza naikoku kuti vanorangarira vamwe kuva vakuru. “MuAfrica yokumaodzanyemba,” anodaro mumwe mufundisi, “pane dzimwe nguva mune kunzwa kwokusavimbana pakati pavanhu vemigariro yekare yeAfrica navanhu vemigariro yekare yeEurope. Asi kutaura kwedu mumutauro womunzvimbomo kunokurumidza kudzinga uku kunzwa.” Kutaura mutauro waavo tinogoverana navo mashoko akanaka iyamuro huru mukusvika mwoyo yavo. Kunoda basa rakaoma nokupfuurira kwokuzvininipisa. Mumwe mufundisi muimwe nyika yeAsia anotsanangura, kuti: “Kuramba uchikanganisa apo unenge uchisekwa nguva dzose nokuda kwezvikanganiso zvako kunogona kuva muedzo. Kungaratidzika kuva kuri nyore zvikuru kurega.” Zvisinei, rudo rwaMwari nomuvakidzani rwakabetsera uyu mufundisi kupfuurira.—Marko 12:30, 31.
17 Nenzira inonzwisisika, vanhu vanotapurwa apo wokumwe anoedza kugoverana mashoko akanaka mumutauro wavo. Pane dzimwe nguva kunoguma nezvikomborero zvisingakarirwi. Mumwe mufundisi munyika yeAfrica yeLesotho akanga achitaura muchiSesotho kumumwe mukadzi, uyo aishanda muchitoro chinotengesa mifanikiso. Rimwe gurukota rehurumende raibva kune imwe nyika yeAfrica rakanga richiona zvivako zvacho uye rakangonzwawo kurukurirano yacho. Rakauya ndokumurumbidza nenzira youshamwari, uye ipapo akavamba kutaura kugurukota rehurumende mumutauro waro rimene. “Neiko musingauyi ku[nyika yangu] ndokushanda pakati pavanhu vedu, sezvo muchizivawo chiSwahili?” rakabvunza kudaro. Nenzira yokungwarira pakutaura, mufundisi wacho akapindura, kuti: “Ikoku kwaizova kwakanaka zvikuru. Asi ndiri mumwe weZvapupu zvaJehovha, uye panguva ino basa redu rakarambidzwa pamutemo munyika yenyu.” “Ndapota,” rakapindura kudaro, “musarangarira kuti tose zvedu tinoshora basa renyu. Vazhinji vedu tinoda Zvapupu zvaJehovha. Zvichida rimwe zuva muchakwanisa kudzidzisa makasununguka pakati pavanhu vedu.” Pane imwe nguva gare gare, mufundisi wacho akafadzwa kuziva kuti Zvapupu zvaJehovha zvakanga zvapiwa rusununguko rwokunamata munyika imwe cheteyo.
Kudisa Kurega Maruramiro
18, 19. (a) Pauro akaedza kutevedzera Tenzi wake, Jesu Kristu, munzirai inokosha? (b) Rondedzera chinoitika (chiri mundima kana kuti chako umene) kuratidza ukoshi hwokudzivisa chisakiso chipi nechipi chokugumbura avo tinogoverana navo mashoko akanaka.
18 Apo muapostora Pauro akanyora kuti: “Ivai vatevedzeri vangu, kunyange sezvo ndiri waKristu” (NW), akanga achangobva kukurukura kudikanwa kwokudzivisa kugumbura vamwe, achiti: “Kana muchidya, kana muchinwa, kana muchiita chinhu chipi nechipi, itai zvose kuti Mwari akudzwe. Regai kugumbusa kana vaJudha, kana vaGiriki, kana [ungano, NW] yaMwari. Seniwo ndinofadza vanhu vose pazvinhu zvose, ndisingatsvaki zvingandibatsira ini, asi zvingabatsira vazhinji, kuti vaponeswe.”—1 VaKorinte 10:31-33; 11:1.
19 Vaevhangeri vakafanana naPauro, avo vanodisa kurega zvimwe zvinhu nokuda kwokubetserwa kwaavo vavanoparidzira kwavari, vanowana zvikomborero. Somuenzaniso, mune imwe nyika yeAfrica, vamwe vanyakuroorana vafundisi vakaenda kuhotera yomunzvimbomo nokuda kwezvokudya kuti vachengete musi wavo wegore negore womuchato. Pakutanga vairangarira kuodha waini nezvokudya, sezvo kushandiswa kune mwero kwezvinwiwa zvinodhakisa kusingashurikidzwi muBhaibheri. (Pisarema 104:15) Asi ipapo ava vanyakuroorana vakasarudza kusaita kudaro kutyira kuti kungagumbura vanhu vomunzvimbomo. “Nguva yakati gare gare,” anoyeuka kudaro murume wacho, “takasangana nomumwe murume uyo akanga ari mubiki pahotera iyoyo, uye takatanga fundo yeBhaibheri naye. Gare gare zvikuru iye akatiudza, kuti: ‘Munoyeuka pamakauya kuhotera nokuda kwezvokudya here? Tose takanga tiri seri kwesuo rekicheni tichikutarirai. Munoona, vafundisi vechechi vakatiudza kuti hakuna kururama kuti isu tinwe. Bva, apo vanouya kuhotera, vanoodha waini norusununguko. Naizvozvo takasarudza kuti kana mukaodha chimwe chinhu chokunwa, hataizokuteererai apo munouya kuzoparidzira kwatiri.’” Nhasi, mubiki iyeyo navamwe vakati avo vaishanda pahotera yacho Zvapupu zvakabhapatidzwa.
Pachine Zvakawanda Zvokuita
20. Neiko kuchikosha kuti titsungirire savaevhangeri vanoshingaira, uye iropafadzoi inofadza iyo vazhinji vari kubata?
20 Sezvo mugumo wetsika ino yakaipa yezvinhu unokurumidza kusvika, vazhinji vachiri kushuva kunzwa mashoko akanaka, uye ndokwokukurumidzira zvikuru kupfuura nakare kose kuti muKristu ari wose atsungirire somuevhangeri akatendeka. (Mateo 24:13) Unogona kufutunura kugoverana kwako muiri basa kupfurikidza nokuva muevhangeri mupfungwa chaiyo kufanana naFiripo, Pauro, Bharnabhasi, Sirasi, uye Timotio here? Vazhinji vari kuita chimwe chinhu chakafanana kupfurikidza nokukumbanira mapoka amapiona uye kuzviita vamene vanowanikwa kubatira munzvimbo dzine kushaiwa kukuru zvikuru.
21. “Suo guru rinotungamirira kumubato” rakazarurirwa vanhu vaJehovha munzirai?
21 Misi ichangobva kupfuura iyi, minda mikuru yokuparidza evhangeri yakazaruka munyika dzeAfrica, Asia, uye Eastern Europe, umo basa reZvapupu zvaJehovha rakanga rakaganhurirwa kare. Sezvakanga zvakaita chinoitika chomuapostora Pauro, “suo guru rinotungamirira kumubato rakazarurwa” kuvanhu vaJehovha. (1 VaKorinte 16:9, NW) Somuenzaniso, vaevhangeri vafundisi vakasvika misi ichangobva kupfuura iyi munyika yeAfrica yeMozambique havagoni kutarisira chiverengero chavanhu vanoda fundo dzeBhaibheri. Tinogona sei kuva vanofara kuti basa reZvapupu zvaJehovha rakanyoreswa pamutemo munyika iyoyo pana February 11, 1991!
22. Kana ndima yedu yomunzvimbomo ichisanoshandwa kana kuti kwete, tose zvedu tinofanira kuva vakatsunga kuitei?
22 Munyika umo nguva dzose takava norusununguko rwokunamata, hama dzedu dziri kufarikanyawo wedzero dzinopfuudzirwa. Hungu, kunzvimbo iri yose tinogara, pachine “zvakawanda zvokuita mubasa raShe.” (1 VaKorinte 15:58, NW) Ikoko sezvakwakadaro, ngatipfuurirei kushandisa nokuchenjera nguva yasara sezvo isu mumwe nomumwe ‘tinoita basa romuevhangeri, tichipedza zvizere ushumiri hwedu.’—2 Timotio 4:5; VaEfeso 5:15, 16.
Unogona Kutsanangura Here?
◻ Chii chiri muevhangeri?
◻ Zviri mumashoko akanaka zvakapfumiswa sei pashure pa 1914?
◻ Basa rokuparidza evhangeri rakafambira mberi sei chifo cha 1919?
◻ Zvinhui zvikuru zvakabetsera budiriro yebasa rokuparidza evhangeri?
[Bhokisi riri papeji 19]
Futunuko Chifo Cha 1939
Rangarira mienzaniso inobva kunyika nhatu uko vafundisi vakarovedzwa paGilead vakatumirwa. Shure muna 1939 kwakanga kune vazivisi voUmambo 636 bedzi avo vakashuma vari kuWest Africa. Pakazosvika 1991 ichi chiverengero chakanga chawedzera kusvikira kuvanopfuura 200 000 munyika 12 dzeWest Africa. Vafundisi vakapawo kuwedzero huru munyika dzeSouth America. Imwe iBrazil, iyo yakawedzera kubva pavazivisi voUmambo 114 muna 1939 kusvikira ku 335 039 muna April 1992. Kukura kwakafanana kwakatevera kusvika kwavafundisi munyika dzeAsia. Mukati meHondo yeNyika II, chiverengero chiduku cheZvapupu zvaJehovha muJapan zvakatambudzwa zvakakomba, uye basa razvo rakasvika pakumira. Ipapo, muna 1949, vafundisi 13 vakasvika kuzobetsera kurongazve basa. Gore iroro rebasa, vaparidzi vasingasviki gumi vakaberekerwamo vakashuma basa romumunda nokuda kweJapan yose, nepo muna April 1992 hwerengedzo huru yavaparidzi yakasvika 167 370.
[Bhokisi riri papeji 21]
ChiKristudhomu Nechinetso Chomutauro
Vamwe vavafundisi vechiKristudhomu vakaita nhamburiko yapachokwadi kudzidza rurimi rwokumwe, asi vazhinji vaikarira vanhu vomunzvimbomo kutaura mutauro wavo wokuEurope. Sokutsanangura kunoita Geoffrey Moorhouse mubhuku rake rinonzi The Missionaries:
“Chinetso chakanga chiri chokuti kuwanwa kwomutauro wemo kwakaoneka kazhinji kazhinji zvikuru kwazvo sokusiri chimwe chinhu kunze kwenzira yokushandura nayo Rugwaro. Nhamburiko duku zvikuru yakashandiswa, navanhu vamwe navamwe kana kuti zvimwe namasangano avanoshandira, mukuva nechokwadi chokuti mufundisi agogona kutaura kuakaberekerwamo norurimi rwake amene nokutaura zvakanaka uko kwoga kunogona kuparira kunzwisisa kukuru pakati pavanhu vaviri. Mufundisi ari wose aizodzidza zivo shomanene yamashoko omunzvimbomo . . . Kupfuurezvo, kurukurirano yaiwanzoitwa mukukwidza nokuderedza inzwi kunokatyamadza nokusingabudiriri kwechinonzi pidgin English, nefungidziro yawo yakakwana yokuti akaberekerwa muAfrica anofanira kuzviisa amene pasi pemipimo yomushanyi wechiNgezi. Pakushatisisa kwako, iyi yakanga irizve imwe ratidziro youkuru hworudzi.”
Muna 1922 School of Oriental and African Studies muLondon yakabudisa mushumo pachinetso chomutauro. “Tiri vomufungo,” wakadaro mushumo wacho, “wokuti mwero wapakati nepakati wounyanzvi unowanikwa navafundisi mumitauro yomunyikamo . . . wakaderera nenzira inodembwa uye kunyange nenzira ine ngozi.”
Vafundisi veWatch Tower Society nguva dzose vakarangarira kudzidza mutauro womunzvimbomo sechakafanira, uko kunobetsera kutsanangura budiriro yavo mumunda wavo woufundisi.